Te Rongorongo man te Moan Beretitentii
E maiu ane Raoiroi n te Onimaki
Te Tia Reirei ao te Tia Karao Toobu
Iai ngkoa karakin te Iutaia ae te tia Karao Toobu ae aki kakoaua te Atua. N te bongina ngke e nakonako ma te tia reirei, e taku, “Iai te bwai ae I aki kona n ota iai. Ti a tia ni mena inanon te aro ibukin te ngaa n ririki. Ma taabo nako ake ko tarai iai te buakaka, urubwai, kewekewe, motibuaka, maraki, baki, ao kakiriwe iai. E taraa n ae te aro e tuai karikirakea te aonaaba teutana. Ngaia ae I titirakiniko, tera tamaroana?”
Te tia reirei e aki kaeka n te tai anne ma e reitinako n nakonako ma te tia karao toobu. E ngae anne a roko n te tabo n takakaro ike ataei, a onrake n te bubu, a takakaro n te bareka.
“Iai te bwai ae i aki oota iai,” e taku te tia reirei. “Taraia ataei akekei. Ti karekei toobu ibukin ngaa n ririki, ao ataei akekei a onrake n te bareka. Tera tamaroan te toobu?”
Te tia karao toobu e kaeka, “Ma te tia reirei, e aki raoiroi bwa ti na bukina te te toobu ibukiia ataei aika bareka aikai. E na kabonganaaki te toobu imwain ae e kona ni kakoroa nanon bonganana.”
Te tia reirei e moangare ao e taku, “Ngaia anne.”
Ti na Kanga ni Maiu?
Te Abotoro Bauro, e taekina te burabeti n O Tetamenti, ni kabwaranakoa bwa tera nanon ae ko na riki bwa te tia kakoaua ngke e koroia, “E Maiu ane Raoiroi n te Onimaki” (I-Rom 1:17).
Tao inanon te rongorongo ae bebete aei ti oota n te kaokoro imarenan te aro are e aki korakora ao akea mwin ana mwakuri ao ake iai irouia te mwaaka ni bita te maiu nakon ae tamaroa riki.
Ma atakina bwa tera ae e nanonaki ni maiu man te onimaki, ti riai n ataia bwa tera te onimaki.
Te Onimaki e raka riki nakon te koaua. E na bwanin kakoauan te Atua n raonaki man te mwakuri.
E raka riki nakon katautauan iangoana.
E raka riki nakon ti te tekateka, katoutou atuura, ao n taekinna bwa ti kariaia. Ngkana ti kangai “E Maiu ane E Raoiroi n te Onimaki,” ti nanonna ti kawakinaki ao ti kairaki man ara onimaki. Ti mwakuri n te aro are e na boraoi ma ara onimaki—tiaki man akean te iango n ongotaeka ma man te atatai ni koaua ao te tangira ni koaua ibukin Atuara ao ibukin te wanawana ae kakawaki are E kaotia nakoia natina.
Te Onimaki e riai n raonaki ma te mwakuri; e rawa n akea maiuna (taraa Iakobo 2:17). Bon ti aki raoi te onimaki. E aki karekea te mwaaka ni bita ae ti temanna, katuka te aonaaba n ti ngaia.
Mwaane ao aine n aia onimaki ni koaua iroun te Tama are i Karawa ae nanoanga—e ngae inanon taai n raraomwa, e ngae inanon taai n nanououa ao kakaitara ngkana aki nooraba raoi ke n oota raoi.
Mwaane ao aine n te onimaki a taua ma nanoia n waaki ni kawaia taan reirei ao a keiaki n tou mwin ana katooto aia Tia Kamaiu ae tangiraki, Iesu Kristo. Te onimaki e kaungaaki ao, riki, e kaungaira bwa ti na rairi nanora nako karawa ao ni waekoa ni kawariia, ni buokiia, ao ni kakabwaiaia raora.
Te Aro n akea te mwakuri ti tebo ma te toobu are e tiku inanon te baoki. E na kona n iai aron kakaawakina, ma n ataakina e uarereke mwaakana ni kaota te bitaki ni karokoa e karaoaki nanon bonganana. Ana euangkerio Iesu Kristo ae kaokaki bon te euangkerio ni mwamwakuri. Ana Ekaretia Iesu Kristo e reirei te aro ae koaua n aron te rongorongo n te kantaninga, onimaki, ao te tangira ae aki bwaka, n ikotaki ma buokakiia tabeman n te aro n te maiu n tamnei ao n rabwata.
Tabeua namwakaina n nako, kainabau, Harriet, ao Ngai ti mwananga ma tabeman natira inanon aonon te Mediterranean. Ti kawari tabeua aia kaembwa taan birinako ao ni kaitibo ma utu man aaba ake a uruakaki n te buaka. Aomata aikai ti aki kain ara ekaretia, ma ngaiia tarira ao mwanera ao a rang kainanoa te buoka n te tai ae waekoa. A rangin n ringaki nanora ngke ti ataia bwa e kanga n teimatoa aia onimaki kaain ara Ekaretia ni uota te ibuobuoki, kamaiu, ao te kantaninga nakoia raora inanon te kainano, n aki ongea aia aro, kain te aba raa, ke reirei.
Te onimaki e raonaki ma te mwakuri ae teimatoa ni kaona te nano ma te akoi, te iango ma te wanawana ao te atatai, ao te tamnei ma te rau ao te tangira.
Ara onimaki e kona ni kakabwaiaia ao n anai nanoia ma te etieti kaain rarikira ao nakoira.
Ara onimaki e kona ni kaona te aonaaba ma te raoiroi ao te rau.
Ara onimaki e kona ni bita te kairiribai nakon te tangira ao ara kairiribai nakon raoraora.
Aomata aika raoiroi, ngkanne, a maiu man te mwakuri n onimaki; a maiu man kakoauan te Atua ao N nakonako ni Kawaina.
Ao anne bon te aeka n onimaki are e kona ni bitiia tatabeman, utu, aaba, ao te aonaaba.