Bwanaaia Aika Itiaki ni Boong aika Kaitira
Te Bwauti ni mwane ae Bua
Kamataata iroun Wilson J. Ong
N te tai ae aki maan I mwaing nakon mweengau ae boou ao I butiia tabeman kain te aro bwa ana buokai ma au karikirake ni mweengau. Inanon nukan au karikirake, I nako ni kabooi tabeua bwai ni mwakuri are tangira katiaana. Ngke e a tia te karikirake, Ia tiba uringa bwa akea au bauti n mwane. E nako nanou ibukina inanon au bwauti ni mwane bwaai ni kabane ake I kainnanoi n ikotaki ma te mwane are I tibwa karekea mairoun au itabon n te ingabong anne. I kaoka kawaiu nakon taabo ake I boobwai iai ma I aki kunea au bwwauti ni mwane. I okira mweengau ao ni ukoukoria ngkana tao e bwaka n taabo tabeua, ma I bon aki kunea. I moanna ni iango bwa tao I konaa ni karekei katooto aika boou n au bwai ni kabane. Ngkanne imwain kitanakin mweengau, raraou e titiraki, “Ko a tia n tataro?”
I waekoa n iangoia, “Eng I a kaman tataro!”
Ma ni koauana, I tuai n tataro ma te nano ni koaua. N oneamwina, I tangiria ma kairoroan nanou iaon katabean Tamau are i Karawa bwa tao Tabena ni buokai ni kakaea au bwauti ni mwane. Ma ngkanne I uringa te koroboki ae tabu ni Itaia 55:8: “Ba tiaki nanomi nako nanou nako, ao tiaki naba arou nako aromi nako, bon ana taekate Uea.”
N te Taabati I nako n taromauri, ao temanna kain te aro are raoun te bong are imwaina e tuangai bwa e tia n tataro ni koaua nakon te Tama i Karawa bwa N na kunea au bwauti ni mwane. E taku bwa e namakinna bwa N na bon kunea. Imwina, ngke I tekateka ni karaoa au kamatebwai ae e onoti, I moanna ni wareware Receiving Answers to Our Prayers iroun Unimwaane Gene R. Cook, kain te membwa n te Itingaun. Te moan iteraniba taekan te karaki ma te kaangaanga ni e bon boraoi ma arou: Natin Unimwaane Cook temwaane e bua ana bauti ni mane, ngaia are a ikotaki aia utu n tataro nakon te Uea bwa a onga ni kunea.
Imwin warekan te taneiai anne, I kataia ni kamwakuria ao I ikotiia kainabau ao natiu n ikotaki. Ti karaoa te kamronron, ao tatabeman ngaira ti a tataro, n ukora te Uea ni buokiira ni kunea te bwauti ni mwane ngkana e boraoi ma Nanona.
I tia mai mwaina ni kakoaua mwaakan te tataro, ma imwiina, ngke I tataro ni karaba, I bubutia te Tama i Karawa bwa e na kaeka ara tataro ni kakorakora aia onimaki kainabau ma natiu.
N te bong are imwina te mwaane e tareboniai. E taku e a tia ni kunea au bwauti ni mwane, n ikotaki ma te mwane. I tang n ai aron te teei ibukin au tataro e kaekaaki ao aia onimaki au utu e a kakorakoraaki.
I ataia bwa Tamara are i Karawa, riki ma natina aika a mwaiti ake a roko, e kaeka nakoira n tatabemaniira ni kaineti nakon Ana tai ao Ana kawai.