Te Katauraoi nakon te Mwananga ae Boou
E maeka te tia Korokaraki i Paraná, Brazil.
N aron Nibwaai, ae ieie nakon te tabo ae tataneiai iai, I kainnanoia ni kamwakura te onimaki iroun te Uea iaon moanakin te utu.
Tamnei © Getty Images
Inanon wiiki imwain au mare ao au kabaebae n te tembora, e moanna n nako nanou ibukin bwaai ni kabane aika n na riai ni karaoi imwain ae i moana au utu ae boou. Irarikin kakukurei aika i namakin n te tai anne, I namakina te nako n nano ibukin bairean ara mwakuri aika boou, bairean raoi ara mwane, kakaean n nen ara bwai, ao tabeu ni kabane n tabeu ae te buuaine. I tangiria ni kakoaua bwa ti moana ara mare n te kawai ae eti man karekean taai inanon ara waaki ibukin bwaai aika kakawaki n aron kawakinan taian tua ao ni kabanea ara tai imarenara e ngae ngke ti nangi n tabetabe ni rmaiura.
Ngke e a kaan roko tain te mare, I miimi n taian mii aika a irekereke ma aekan kaangaanga aika kakaokoro aika a kona n roota te utu. Bukina bwa I roko man te utu ae a tangiriia bon irouia, ma ni kekeiaki naba man aia kangaanga, ni kakamakaki ma kakauntaeka ao uruaki n nano, mii aika buakaka a rotai riki nakon ae a kona n riki. Ngaia ae n te tairiki teuana, n aroia ae a tangiria tabeman, I uti ni maono ao n iangoia n ira ana reirei Titita Neill F. Marriott, te Kauoman ni Kauntira n te Beretitentii n Ataeinnaine ni Kabuta, ae e anga n ana taetae “Yielding Our Hearts to God” (Liahona, Nobembwa 2015, 30–32). I kamatui matam ao n tataro, “Tamara are i Karawa ae Tangiraki, tera ae I kona ni karaoia ni kanakoi bwaai aika buakaka man au utu?”
E waekoa n roko te kaeka ni waekoa ao ni korakora ae kanga iai temanna ae kauka te mataroa iaon atu ao ni katuka te iango ikekei. Te bwanaa, ae maaraara ma ni beebete e kawaekoaai, “Ti karaoa te bwai ae ko riai ni karaoia. Bwaina te onimaki ni kawaim nako.” Te Tamnei e wirikirikii tabeua reirei aika onoti, ao I namakinna bwa I karaoi bwaai aikanne, a na bane n nakoraoi bwaai ni kabane.”
I ngare ao n namakina nanou n onrake n te namakin ae tangira. I waekoa ni mwaninga raraomau ni kabane, bukina bwa I ataia bwa reirei man te tamnei a koaua. I a tia n namakina te Tamnei ae Raoiroi mai imwaina, ma e aki korakora n aron are I karekea n te tairiki anne. I namakina ana tangira Tamara are i Karawa ao ara Tia Kamaiu ni katobibiai, ao I ataia bwa te rau ao kamaiuakiia au utu a kakawaki n aron kakawakina Nakoia ao nakoiu naba.
N aron ae kanga te kakoaua ae karinaki, i uringa te karaki man booki aika tabu—te tai are e tuangaki Nibwaai iroun te Uea bwa e na kabaa te kaibuke: “Ao e koro bukina bwa e taetae te Uea nakoiu, ni kangai: ko na kabaa te kaibuke, n aron ae N na kaotia nakoim, bwa I aonga ni uotia am botanaomata riaon marawa aikai” (1 Nibwaai 17:8; e kairaki karawawataan te iango).
Nibwaai ao ana utu a tia ni mena n te buakonikai inanon ririki aika mwaiti, ni kaitarai aekan kaangaanga n aekaia nako. E kona n tia n namakina te maaku ni moana ana mwananga rinanon marawa ao ni kariaia maakuna bwa e na korakora riki nakon ana onimaki. Ma e aki. E kariaia ao e ongo nakon ana kaetieti te Atua. Iai ana onimaki ae a na koro bukin Ana berita te Atua Te Uea e tuai n tuanga Nibwaai ae ana aki riki angibuaka ke naao ana aki orea te kaibuke. Ma e tuanga Nibwaai bwa ngkana ti irii Ana kaetieti, ao E na kairiia ni kawakiniia ana utu n riaon rte marawa nakon te aba ni berita.
I ataia ae I a tia ni mwananga rinanon te buakonikai inanon ririki aika mwaiti, ma ngkai ti tebo ma ia tei imoan taari, ni katauraoi nakon te mwananga ae boou: te mare. I a tia ni weteaki—ao n au iango anne bon te bwai ae riki nakoia Aika Itiaki ni Boong aika Kaitira—ni kabaa te kaibuke ni kaineti ma ana kaetieti te Atua.
Imwiin are I mareaki ma kainnabau, ao a riki kaangaanga. I bwaka n aoraki, ao ti korakai ni kabaeranta ara kabane mwane ao ni karaoi waaki aika a raraoi aika ti a tia n iangoi bwa ti na irii.
Ma te reirei ae I a tia ni karekea n te tairiki anne e teimatoa ni mena inanou. Ti kataia n reiakinna ni katoa bong ao ni kawakin ana taeka te Atua inanora, n iri aia banna ni katooto aika raraoi ara tia kairiiri aika tangiraki—n raonaki ma Kristo—ao ni katamaroai kateira. I karekea te koaua ae korakora riki n te tataro ao n rinanon ana tangira te Tama ibukira. I moanna n onimaki riki ao ni kerikaaki te maaku. Ti kunea bwa kaangaanga aika ti rinanoi a tia n riki bwa kawai ake a na kairiira nakon ae tamaroa riki. N te bong aei ao mweengara e taraa n ae kangaa mwakoron karawa ae uarereke.
Ti boni mena ngkai naba ni moan ara mwananga, ma te mare ao moanakin te utu bon te rinerine ae te kabanea n tamaroa ae I a tia ni karaoia. Nanou e onrake n te kimwareirei ngke I iangoa taekan te otenanti n te tembora aika ti karekei ao n ataia ae otenanti n te tembora a kabaeaki man ana kariaia te Atua. Ataakin riki kakawakin te utu n ana babaire te Tama are i Karawa ao mimitongin te berita ae tabu ae ti karaoia, n na rangin n tangiria riki ni buokiia utu riki tabeman bwa a na karekei naba otenanti aikanne.
I reiakinna bwa ti na aki raraoma n te bwai ae na riki, bukina bwa “Ba E aki anganira te Atua te nano ae mamaku; ma E anganira te nano ae korakora, ae tatangira te aba, ae kawanawana te aba” (2 Timoteo 1:7). Ti ti kainnanoia bwa ti na ongotaeka, n iri kaetieti aika ti anganaki rinanon booki aika tabu ao aia taeka burabeti ni boong aikai, ao bubuti n te tataro ibukin kaetieti riki tabeua. Ngkana ti karaoi bwaai aikai, ti kona n tokanikai iaon kaangaanga aika irekereke ma kaitira ni bong n rinanon taari ni boong aika kaitira ae kaangaanga ni koaua raoi iai bwa tera te kaangaanga ae ti kaitara ma ngaia, ana bon kamanoaki naake ti tangiriia.