Kaeka mairouia Taan Kairiiri n te Ekaretia
Ko na Kanga ni Kunea te Rau ni Koaua
Man te maroro n te maungatabu ni kabuta n Eberi 2013
Te kantaninga ae e na kakoroaki nanona irouia aomata aika raraoi n taabo nako e a tia n taainako ni karekea te rau n te aonaaba. Ti na aki barannano iaon kakoroan te kouru aei. Ma, Beretitenti Joseph F. Smith (1838–1918) e reirei, “E na bon aki roko nakon te aonaaba te tamnei n rau ao n tangira … ni karokoa aomata a na karekea koauan te Atua ao ana rongorongo te Atua … , ao n ata mwaakana ao ana kariaia are mai karawa.”
Ti kantaninga ni koaua ao n tataro ibukin te rau ae tabangaki, ma bon tabera n tatabemaniira ao utu bwa ti na koroa bukin te aekaki n rau are bon te berita ni kanuangaan te etieti. Te rau aio bon te berita ni bwaintangira n ana mition te Tia Kamaiu ao n anganano ni maiuna.
Te rau e aki ti mano ke n akean te buaka, kakeru, bobuaka, ao kakauntaeka. Te rau e roko man ataakina bwa te Tia Kamaiu e kinaira bwa antai ngaira ao n ataia bwa iai ara onimaki Irouna, n Tangiria, ao ni kawakin Ana tua, ai moarariki inanon bwaai aika riki n urua te maiu ni kataaki ao taai ni kananokawaki (taraa D&C 121:7–8).
“Enga te tabo ae N na kunea iai te rau? Enga te tabo ae N na mano iai ngkana anga ni ibuobuoki a toki ni kaoka kamarurungakiu? (“Enga te tabo ae N na kunea iai te rau?” Anene, nambwa 129). Te kaeka bon te Tia Kamaiu, are bon te buoka ae korakora n te kamaiu ao te tia karikibwai. Boni Ngaia te “te Uea n Raoi” (Itaia 9:6).
Kananorinanoira imatan te Atua, tataro n taainako, rairanano man te bure, n rin te ran babwetito ma te nano ae uruaki ao te tamnei ae raraomwa, ao n riki bwa ana reirei ni koaua Iesu Kristo are boni te katooto n te etieti are bon te kanuanga n reitinakon te rau.
Te Ekaretia bon te tabo ni kamanomano are taan ririmwin Kristo ana karekea te rau. Tabeman aomata aika kairake n te aonaaba a taekinaki bwa ataa te aro ma aki taua te aro. Te namakin n ataa te aro bon te moan mwaneka ae tamaroa. E ngae n anne, bon inanon te Ekaretia are ti na bobotiira, reireiaki, ao kamwarakeaki man ana taeka te Atua ae tamaroa Te moa ni kakawaki, bon man ana kariaia te nakoanibonga n te Ekaretia are e katauraoi otenanti ma berita aika tabu e kabeia utu ni kabane ao ni kakoaua bwa ti tau n tatabemanira nako n okira te Atua te Tama ao Iesu Kristo n te abanuea are te Tiretio. Otenanti aikai e uota te rau ibukina a beritanaki iroun te Atua.
Inanon tembora a bon karaoaki mwaitin otenanti aika tabu aikai ao are bon bwaai n ibuobuoki n te rau ni kamanomano man te aonaaba. Koraki ake a roko n ana tabo te tembora ke n ira kaukan autin te tembora n namakina naba te rau aei.
Te Tia Kamaiu bon te buoka ae korakora n te rau ni koaua. E ngae ngke inanon kakatai n te maiu, ibukin ana Mwakuri ni Kamaiu te Tia Kamaiu ao Ana akoi, te maiu ae raoiroi e na kanuanganaki ma te rau ae onoti (taraa Ioane 14:26–27; 16:33).