Ataakin Am Kakabwaia n te Tamanuea
Taan korokaraki aikai a maeka i Illinois, USA, ao New York, USA, n aron anne.
Kinakin mwakoron am kakabwaia e kona ni buokiko ibukin kairan maium.
Man in maze © Digital Vision Vections/Getty Images
Te maiu e onrake ni babaire ni kaineti bwa tera kawaim ae ko riai n toua inanon maium: Tera te reirei ae n na nako iai? Tera ae I riai ni karaoia? E riai bwa N na nako ni mitinare? Antai ae N na riai ni mare ma ngaia? Ngkana ko angnaki te mwabe bwa e na kairii am iango ibukin maium, ko na iria?
E a tia te Tama are i Karawa ao Iesu Kristo n anganira te mwabe anne—kakabwaia n te tamanuea—bwa e na anganira kawaira inanon maiura. E ngae ngke ti anganaki te bwai n tangira ae te rinerine ni karaoi babaire ni kabonganai oin ara iango, a kona kakabwaia n te tamanuea n anganiko atatai aika nano bwa tera kawai aika a na uota te kukurei ae te kabanea ni korakora.
Ma ti karekean te mwabe e aki tau. Ti riai ni kamatebwai, n ataia, ao ni kabongana nanona inanon te mwabe. Ti tebo ma, ngkana ko karekea ataakin te taetae ae kabonganaki n am kakabwaia n te tamanuea—te tia kairiko ni maium—ko na kona n ataia bwa antai ngkoe n ana iango te Atua ao tera ae e na kanga aron rikim.
Kakaea Rikim
Ma e kakawaki riki, am kakabwaia n te tamanuea e taekina rikim, ke te karinan ni baronga ae onoti n ana baronga Iakobwa ake tengaun ma uoman (are e atongaki imwiina bwa Iteraera) are ko nako mai iai. E ngae ngke tiaki raoi ngaira ana kariki Iakobwa, e reireiniira booki aika tabu bwa ana kariaiakaki kaain te Ekaretia n nakon te bata are Iteraera: E taku te Uea bwa aomata ni kabane ake a karekea te euangkerio a na anganaki aran Aberaam, ao ana iangoaki bwa ana kariki, ao ana teirake ni kamoamoa ngkai e riki bwa tamaia” (Abraham 2:10).
Shelisa Schroeppel mai i Utah, USA, e taku, “Ataakin ae ngai kaain te bata are Iakoba e buokai n ata bukin menau n te maiu aei ao bukin tera I weteaki nakon nakoa n te Ekaretia.”
E kona naba am kakabwaia n te Tamanuea ni kabwarabarai aeka ni kakabwaia are e kaineti ma am baronga ni koaua. Te katooto, a mwaiti kaain te Ekaretia aika kaain te baronga are Eberaim, Te baronga are iai tabeia ae onoti n tibwaua rongorongon te euangkerio ae kaokaki nakon te aonaaba (taraa Te Tua-Kaua 33:13–17; D&C 133:26–34).
Ukoukora Kawaim
Ngkana e kabonganaki raoi, te mwabe e kawakina te tia mwananga bwa e na aki bua. Ti tebo naba, ma te mwananga n te aonaaba aei, am kakabwaia n te tamanuea e na anganiko reirei ao kawaim ibukin maium. Am kakabwaia n te tamnuea e aki ti tuangko te bwai ae ko na karaoia, ma e kona n anga atatai aika raba ibukin te kawai—ngkana e karaoaki ma te onimaki—e kona ni buokiko n ataia ngkana ko ira ana kaantaninga te Tama are i Karawa. Ngkana ko kamatebwaia am kakabwaia n te tamanuea ao ni kataia ni maiu n te aro are e na kaoa Tamnein te Uea, ko kona ni kunea te kamanoaki, te kimwareirei, ao te kawai.
Gabriel Paredes mai Lima, Peru, e taku, “Tabeua reirei ake I anganaki n au kakabwaia I a tibwa tia ni kona ni kabongana ma au utu imwiin are I tia ni kabaeaki ma kainnabau.
“N te tai ae e aki maan n nako ti a tia ni iangoia bwa tera ae ti kona ni karaoia ni kakorakora ao ni karikirakea ara utu ae boou. Ara titiraki e kaekaaki rinanon au kakabwaia n te tamanuea. Inanona I tuangaki bwa n na karao bwa moanibwai aika kakawaki (n au utu) te karinerine, te nanorinano, ao te tangira n au utu, bukina bwa aikai aan ana euangkerio Iesu Kristo aika kakawaki.
“Ngkai ti a tia ni kabanea ara iango n te bwai aei, ti a tia Ngai ma kainabau ni kona n tokanikai iaon kaangaanga. Ti teimatoa ni karekei kaangaanga inanon ara utu, ma ti kukurei. I namakinna ae kanga e kauringai te Uea bwa N na kanga ni karekea te utu are E beritanai iai. I ataia bwa te Uea e taetae rinanon kakabwaia n te tamanuea ao bwa reirei ake inanona a riai ni kabongnaki inanon maiura.”
Ongo Nakon Kaetieti
E na aki mwaakenaki iaon te mwabe bwaai aika kakamaku inanon te kawai, ma ti tekeraoi, bwa kakabwaia n te tamanuea e anganganiira kauring ni kamanoira inanon maiura. Tabeua kauring aikai a buokira ni kamanoira man ana kariiri Tatan; tabeua ana buokiira n ataia bwa ti na kanga n tokanikai iaon te aro n aomata i nanora.
Ibukin Caitlin Carr ae kaain Utah, tabeua kauring inanon ana kakabwaia n te tamanuea aki waekoa ni mataatata, ma kamatebwaiakan ana kakabwaia imwiina e anganna atatai aika boou.
“Ngke I karekea au kakabwaia n te tamanuea, I kauringaki ibukiia aomata aika a kataia n ana nanou bwa n na aki ira te koaua n raonaki ma iango aika a taraa n tamaroa. I aki kabanea raoi au iango nakoiai; Iai au koaua ae matoatoa iaon reirei ake I a tia n reireinaki iai.
“E ngae n anne, te ririki are imwiina I kaitaraaki ma iango ao katei ake, n te moan tai, a taraa n ae a boboto iaon (reirei aika) aki babaka ni kawai ao n tangira ma ni koauana a bon aki boboto iaon reirei aikanne. A taraa ae a roko rongorongo aikai man taabo ni kabane: te tabo ni kareke rongorongo, reirei, ao riki raoraom aika ko rangin ni kinaia. E ngae ngke I ataia bwa ataibwai aikai aki boraoi ma ana kantaninga te Atua, I kunea bwa I tangiria ni boutokai iango n aon te aba aika boou aikai ao te Ekaretia. I waekoa n ataia bwa ‘akea te aomata ae kona n toro irouia tooka uoman’ (Mataio 6:24) ao bwa n na aki onimakin rabakauia aomata. E katoki au raraoma Tamau are i Karawa rinanon booki aika tabu ao n taekina te rau nakon au iango ao nanou. N tokina, e a tia ni kakorakoraaki au koaua ao I a kona ni matoa riki ni kamanoa te bwai ae I ataia bwa e koaua.”
Karikirakei Bwaintangira ao Tarena
E kona naba am kakabwaia n te tamanuea n taekin bwaintangira n te tamnei ao tarena are e a tia te Uea n anganiko ni karikirakea Abanueana. Ngkana e taekina te tarena am kakabwaia are ko aki taneiai ma ngaia, e kona n riki aei ibukina bwa e tuai man reke am tai ni kunea ke ni karikirakea te tarena aei. Rinanon te kakaae ao te mwakuri korakora ao ana ibuobuoki te Uea, ko kona n rikirake ni konabwai ni kabongana te tarena aei, n raonaki ma tarena riki ake tabeua.
Karikirakean am tarena e na buokiko n atai kawai aika onoti ae kona ni buokiko ni kanakoraoiko riki n ana mwakuri te Uea. Nei e Johanna Blackwell kaain California, USA, e iangoi bwaintangira ao tarena n ana kakabwaia e namakinna bwa e na kabotaua arona ma tabeman: “Ngke I wareka au kakabwaia mairoun te tamanuea, I kauringaki bwa I a tia ni kakabwaiakaki ma te bwaintangira ae I kainnanoia ni konai ni kaitarai kataaki ao n ira kawaekoan ana mwakuri te Uea.
“E tuangai au kakabwaia au konabwai n tangira, ni kabwarabure, ao ni karekea te nano n reitaki ma kaain rarikiu. Ngkai I a tia ni kammwakuri bwaintangira aikai, e a tia te Uea ni kakabwaiaai ma te nano ae rikirake n rinanon ao ni karekea te reitaki ma aomata ao katei aika boou. N tokina, e rikirake au koaua bwa ngaira bon natin te Tama are i Karawa ae tangira ao I a tia ni kona ni buokiia tabeman ngke ti bane ngaira ni uokukoria n riki n aron Kristo.”
Ukoukoran Kakabwaia ake A Beritanaki
Kabaneana, ara kakabwaia n te tamanuea e kaoti ana kakabwaia te Tama are i Karawa nakoira ngkana ti teimatoa n onimaki Irouna. Akea raoi te tai ae koaua bwa n ni ngai ae a na kakoroaki raoi iai nanon kakabwaia aikai, ma ti kona n ata anne ngkana ti ongotaeka nakon te euangkerio, a na korobukiia, tao n te maiu aei ke ae na roko.
Te uae Sergio Gutierrez of Nevada, USA, e onimakina ana berita n ana kakabwaia n te tamanuea n tainako ngkana e namakina te raraoma ibukin ana babaire n ana mwakuri nakon taai aika ana roko: “N taai nako ngkana I namakina te aki koaua n au tai ae na roko, ma iai te berita n au kakabwaia n te tamanuea are e aki toki ni buoka raraomwau (ibukin au tai ae na roko). E buokai te berita aei n ataia bwa ti ngkana I mwakuri korakora ao n teimatoa n onimaki, n na karekea te mwakuri ae riai ni kona ni kamaiuia au utu ao ni karikirakea te Ekaretia. I aki ataia raoi bwa tera te kawai n te mwakuri ae n na kekeiaki ni karaoiai, ma karekean te berita aei e anganai te onimaki ao te aki nanokokoraki.”
Ngkana ko ukoukoria bwa tera ana kantaninga te Tama are i Karawa ibukim, ko aki tiku n ti ngkoe. E ataia te Uea bwa ko na kaitara ma kawai aika kakaokoro aika ko kona n rinanoi inanon maium, ngaia ae E a tia n anganiko te mwabe ni kateimatoa maium ni kaineti ma Ana euangkerio. Aki kona kakabwaia n te tamanuea ni karaoi babaire ibukira, ma a kona ni kairiira nakon oin ara kaotioti. Rinanon ara kakabwaia n te tamanuea, e kaotaki nakoira bwa ti kanga n riki bwa mwakoron ana babaire te Uea n ikotiia Iteraera man atakiia ara baronga, ti anganaki oin ara reirei, kaetieti, ao berita; ao ti reieinaki taekan bwaintangira aika onoti ao tarena aika e a tia te Tama are i Karawa n anganiira bwa ti na beku Ibukina. Ni karokoa ae ko kataia ni maiu ni kaineti ma taekan kanoan am kakabwaia n te tamanuea aikai, ko kona n ataia bwa a tia am babaire ae a kaineti ma ana kantaninga te Uea ibukin maium.