Ko Hono Fakaulo Atu Hoʻo Māmá
ʻOku ou fie talanoa kau ki ha ongo finemui ʻoku ou ʻiloʻi naʻá na hoko ko ha ongo tā sīpinga fisifisimuʻa ʻi hono vahevahe ʻo e ongoongoleleí. ʻI he taimi naʻe mei hoko ai e taʻu valu homa ʻofefine ko Nelí, naʻe nofo homau fāmilí ʻi Suisalani. Naʻe fiefia ʻa Neli ke papitaiso ia. Kimuʻa pea hoko hono ʻaho fāʻeleʻí, naʻa mau efiafi fakafāmili ai ʻi ʻapi mo homau kaungāmeʻa ko Tiná. Naʻe akoʻi ʻe he ongo faifekaú ʻa Tina. Ka naʻe ʻikai ke ne fakapapauʻi pe ʻokú ne fie papitaiso nai pe ʻikai.
Hili ʻemau lēsoní naʻa mau kole kia Tina ke ne fai e lotú. Naʻe ʻikai ke poto lelei ʻa Tina ʻi he lea faka-Pilitāniá, ko ia naʻá ne lotu leva ʻi he lea faka-Siainá. Naʻe ʻikai ke mahino kiate kimautolu ʻene leá, ka naʻa mau ongoʻi ʻa e Laumālié ʻi heʻene lotú.
ʻI ha taimi nounou mei ai naʻe ʻeke mai ʻe Neli pe ʻe sai pē ke papitaiso fakataha ia mo Tina ʻi he ʻaho tatau pē. Naʻe ʻikai ke ma ʻiloʻi pe ʻe fēfē ha ongo ʻa Tina ki he foʻi fakakaukau ko iá. Ka naʻa mau lototaha ke tā telefoni ʻa Neli kia Tina ʻo ʻeke pē ki ai. Ne fakaʻohovale kiate kimautolu ʻa e tali ʻio ʻa Tiná!
Naʻe papitaiso ʻa Neli mo Tina ʻi he fakaʻosinga ʻo e uike ko iá. Naʻe toki talanoa ʻe Tina ha talanoa mālie kiate kimautolu kimui ange. Naʻá ne fakamanatu kiate kimautolu ʻa ʻene lotu naʻe fai ʻi heʻemau efiafi fakafāmilí. ʻI heʻene lotú naʻá ne kole ai ki he Tamai Hēvaní ke fakaʻilo kiate ia pe ʻoku totonu nai ke papitaiso. ʻI he taimi naʻe tā telefoni atu ai ʻa Neli ʻi he pō ko iá, naʻe ʻiloʻi ʻe Tina kuo ongona ʻe he Tamai Hēvaní ʻene lotú.
Naʻe hoko foki mo homau kaungāmeʻa ko Sesimaní ko ha faʻifaʻitakiʻanga lelei mo ia kiate kimautolu. Naʻe taʻu 12 ʻa Sesimani. Naʻe hoko hono fāmilí ko homau kaungāmeʻa lelei ʻi he taimi naʻa mau nofo ai ʻi he Hahake Lotoloto ʻo ʻĒsiá. ʻI hono fonuá, naʻe ʻikai lava ʻe he kāingalotu ʻo e Siasí ke talanoa ki he niʻihi kehé kau ki he ongoongoleleí. ʻOku tapui ia ʻi he laó. Ka naʻe fakakaukau ʻa Sesimani ke ne vahevahe ʻa e ongoongoleleí ʻaki ʻene fai ʻa ia naʻe fakahoko ʻe Sīsuú. Te ne lava ʻo fakahā ʻa e ʻofá mo e angaʻofá ki he niʻihi kehé. Ko e fē pē ha feituʻu ne ʻi ai ʻa Sesimani pe ko e hā pē haʻane meʻa naʻe faí, naʻá ne feinga ke ne hangē ko Sīsuú. Ko ha kaungāmeʻa mamae ia ki he niʻihi kehé.
ʻOku fakahā mai ʻe Neli mo Sesimani kiate kitautolu ʻa e founga te tau lava ai ʻo hoko ko ha sīpinga ʻo Sīsū Kalaisí. Te tau lava ʻo fai ʻeni tatau ai pē pe ko e hā hotau taʻu motuʻá pe ko e fē feituʻu ʻoku tau nofo aí.