ʻE anga fēfē haʻaku ʻai ke potupotutatau e loto taʻe fakamaau ki he niʻihi kehé mo hono fakaoleoleʻi ʻo e angahalá?

ʻOku fekau mai ke tau fakamolemoleʻi ʻa e niʻihi kehé pea tuku ʻa e fakamaau fakaʻosí ki he ʻOtuá (vakai T&F 64:9–11), ka ʻoku ʻikai ko ha ʻuhinga ia ke hūfanga ai e faiangahalá. Kapau ʻoku tau feohi mo ha niʻihi ʻoku nau moʻui ʻaki ʻa e tōʻonga faiangahalá, ʻoku totonu ke tau hoko ko ha maama kiate kinautolu ʻo taukaveʻi ʻa e meʻa ʻoku totonú. ʻOku ʻuhinga ʻeni ke tau hoko ko ha tā sīpinga lelei ʻaki ʻetau fakaʻehiʻehi mei he faiangahalá pea ʻoua naʻa tau ʻi ha tuʻunga pe feohi mo ha niʻihi ʻe ala fehuʻia ai ʻetau tuʻunga tāú. Ka ʻoku totonu nai ke tau tuhuʻi tonu ʻa e angahala ʻa e niʻihi kehé ke fakamahino kiate kinautolu ʻa e ngaahi fono ʻa e ʻOtuá mo ʻetau ongo kiate kinautolú? Pea kapau ko iá, ko e fē taimi totonu ke tau fai ai iá pea te tau fakahoko fēfeeʻi ia?

Mahalo ʻoku makatuʻunga ʻa e talí ʻi he tūkunga ʻo e meʻa ko iá, ʻa e faʻahinga vā ʻoku tau maʻu mo e niʻihi ko iá, mo ʻenau ʻilo kau ki he ngaahi fono ʻa e ʻOtuá. Hangē ko ʻení, ʻoku lelei ange ke fepōtalanoaʻaki fakataautaha ki he fāmilí mo e kaungāmeʻá ʻi hano talaange ki ha haʻofanga ʻo hotau ngaahi mahení ke nau fakatomala. Fekumi ki he ueʻi ʻa e Laumālie Māʻoniʻoní. Te ne lava ʻo tataki hoʻo ngaahi leá mo e ngaahi ngāué ke ke lava ʻo fakahaaʻi ʻa e ʻofa totonu ʻoku potupotutataú, faʻa kātakí, mo e tukupā taʻeueʻia ki he ngaahi tuʻunga moʻui ʻa e ʻEikí.