Pōpoaki ʻa e Faiako ʻAʻahí
Koeʻuhí Ke Nau Taha Pē
Ako ʻi he faʻa lotu ʻa e fakamatala ko ʻení pea fekumi ki ha ueʻi fakalaumālie ke ʻiloʻi ʻa e meʻa ke vahevahé. ʻE hanga fēfē ʻe ha mahino e taumuʻa ʻo e Fineʻofá, ʻo teuteuʻi e ngaahi ʻofefine ʻo e ʻOtuá ki he ngaahi tāpuaki ʻo e moʻui taʻengatá?
Naʻe akonaki ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē, “Naʻe aʻusia ʻe Sīsū e uouangataha haohaoa mo e Tamaí ʻaki ʻEne tukulolo ʻi he sinó mo e laumālié fakatouʻosi ki he finangalo ʻo e Tamaí.”
“… Ko e moʻoni he ʻikai ke tau taha mo e ʻOtuá mo Kalaisi kae ʻoua kuo tau ʻai Hona finangaló mo e meʻa ʻoku mahuʻinga kiate Kinauá ko e meʻa ʻoku tau holi lahi taha ki aí. ʻOku ʻikai aʻusia ʻa e faʻahinga tukulolo ko iá ʻi ha ʻaho pē ʻe taha, ka ʻe akoʻi kitautolu ʻe he ʻEikí ʻo fakafou ʻi he Laumālie Māʻoniʻoní, ʻo kapau te tau loto fiemālie ki ai, kae ʻoua kuo malava ke pehē, ʻi he fakalau ʻa e taimí, ʻokú Ne ʻiate kitautolu ʻo hangē ko e ʻiate Ia ʻa e Tamaí.”1
Naʻe akonaki ʻa Linitā K. Pētoni, ko e Palesiteni Lahi ʻo e Fineʻofá ki he founga ke ngāueʻi ai e uouangataha ko ʻení ʻo pehē: “Ko hono fakahoko mo tauhi ʻetau ngaahi fuakavá ko hano fakahaaʻi ia ʻo ʻetau tukupā ke tau hoko ʻo hangē ko e Fakamoʻuí. Ko hono moʻoní ko e faifeinga ia ki he ʻulungaanga ʻoku fakamatalaʻi lelei taha ʻi ha kupuʻi lea ʻo ha himi manakoa: ‘[Te u ʻalu ki he feituʻu ʻokú ke finangalo ke u ʻalu ki aí. … Te u lea ʻaki e meʻa ʻokú ke finangalo ke u lea ʻakí. … Te u hoko ki he meʻa ʻokú ke finangalo ke u hoko ki aí].’”2
Naʻe toe fakamanatu mai foki ʻe ʻEletā Kulisitofasoni “ʻi heʻetau feinga ʻi he ʻaho ki he ʻaho mo e uike ki he uike ke muimui ʻi he hala ʻo Kalaisí, ʻoku ʻiloʻi ʻe hotau laumālié ʻa hono mahuʻingá, mole ai e fefaʻuhi ʻi he lotó, pea ngata ʻa e ngaahi ʻahiʻahí.”3
Naʻe fakamoʻoni ʻa Neila F. Melioti, ko e Tokoni Ua ki he Kau Palesitenisī Lahi ʻo e Kau Finemuí, ki he ngaahi tāpuaki ʻo e faifeinga ke fakafenāpasi hotau lotó mo e finangalo ʻo e ʻOtuá, ʻo pehē: “Kuó u faifeinga ke siʻaki ʻeku holi fakakakano ke fai e meʻa kotoa heʻeku foungá, he kuo faifai peá u ʻiloʻi ʻoku tōnounou fau, taukakapa pea mo taʻefeʻunga ʻeku foungá, ʻi hono fakahoa atu ki he founga ʻa Sīsū Kalaisí. ‘Ko [e founga ʻetau Tamai Hēvaní] ʻa e hala ʻoku fakatau ki he fiefia ʻi he moʻuí ni mo e moʻui taʻengatá ʻi he maama ka hokó.’”4 Fakatauange ke tau faifeinga ʻi he loto-fakatōkilalo ke tau taha mo ʻetau Tamai Hēvaní mo Hono ʻAlo ko Sīsū Kalaisí.
Ngaahi Potufolofola mo e Fakamatala Makehe
Sione 17:20–21; ʻEfesō 4:13; Tokāteline mo e Ngaahi Fuakava 38:27; reliefsociety.lds.org
Tuí Fāmilí Fakafiemālié