Ngaahi Fakakaukau ki he Efiafi Fakafāmili ʻi ʻApí

ʻOku ʻi he makasini ko ʻení ha ngaahi fakamatala mo e ngaahi ʻekitivitī ʻe lava ke fakaʻaongaʻi ʻi he efiafi fakafāmili ʻi ʻapí. Ko ha sīpinga ʻeni ʻe ua.

“Ko e Kato Paʻanga Maná,” p. 72: Mahalo te ke fie kamata ʻaki ʻa e efiafi fakafāmilí hano hivaʻi e “Fili ʻa e Moʻoní” (Ngaahi Himí, fika 146). Te ke lava mo hoʻo fāmilí ʻo fakatātaaʻi ha ngaahi tūkunga ʻo e fili ki he moʻoní. Hangē ko ʻení, ko e hā te ke fai kapau naʻe ʻahiʻahiʻi koe ke ke kākā ʻi ha sivi pe ʻikai fakakau ha tokotaha ki ha ʻekitivitī? Liliu e ngaahi tūkungá ke tatau mo hoʻo tūkunga fakafāmilí.

“Ko e Hā ʻa e Fakataha Alēlea Fakafāmili?” p. 74: Mahalo te ke fie fokotuʻu ha ngaahi lao mo ha taumuʻa ko haʻo teuteu ia ki hoʻomou ngaahi fakataha alēlea fakafāmilí. Kole ki he tokotaha kotoa pē ʻi he fāmilí ke nau tānaki mai ki ai. ʻE lava ke kau ʻi he ngaahi laó mo e taumuʻá ʻa hono tamateʻi e ngaahi ʻilekitulōniká, fefakafanongoʻakí, talanoa ki he ngaahi meʻa ʻoku hanganaki maí, mo hono fokotuʻu ha ngaahi taumuʻa fakafāmili tuʻuloá. Liliu hoʻomou fakataha alēlea fakafāmilí pea ʻai ke fakalata koeʻuhí ke nofo ʻamanaki atu e kakaí ki he ngaahi fakataha alēlea fakafamilí.