Leʻo ʻo e Kau Māʻoniʻoni ʻi he Ngaahi ʻAho Kimui Ní
Fakaheka he Meʻalelé mo e Vahevahe ʻo e Ongoongoleleí
Tā fakatātā ʻa Alan Baker
ʻI heʻeku ʻalu ki he lotú ʻi ha pongipongi Sāpate ʻe taha, naʻe longonoa pea nonga ʻa e fakaʻuli atu ko ia ʻi he tafaʻaki ki ʻuta ʻo ʻIngilaní. Naʻá ku fakatokangaʻi ha fineʻeiki toulekeleka ʻi he veʻehalá. Naʻe pau ke vave ʻeku fakakaukaú pe te u tuʻu nai ʻo ʻeke pe ʻe fie heka mai.
Naʻá ku ongoʻi ʻoku totonu pē ke u tuʻu. Naʻá ne talamai ko hono hingoá ko Mele pea naʻá ne toki aʻu mai pē ki he feituʻu ko iá. Naʻá ku fakakaukau kapau naʻá ne toe tatali ʻo kiʻi fuoloa ange pe kapau naʻe toe kiʻi vave ange ʻeku lelé ne ʻikai ke ma mei fetaulaki. Naʻe taimi tonu pē!
Naʻá ne talamai ʻa e feituʻu naʻe ʻai ke ʻalu ki aí, pea naʻe ofi ia ki he falelotú. Naʻá ku talaange ko ʻeku ʻalu ki he lotú peá u ʻeke ange pe kuó ne ʻosi fanongo ʻi he Siasí. Naʻá ne talamai ʻokú ne maʻu ʻa e tui ki he Fakamoʻuí ka naʻe ʻikai haʻane ʻilo kau ki he Siasí. ʻI heʻema fonongá naʻá ku vahevahe kiate ia ʻo kau ki he ongoongoleleí.
ʻI heʻeku tuku ʻa Mele ki he feituʻu naʻe ʻalu ki aí, naʻá ku talaange ʻe ʻatā pē ke ma toe foki ʻi heʻeku meʻalelé ʻo ka tuku ʻa e lotú. Naʻá ne tali lelei ia, pea naʻá ma alea ke fetaulaki ki he falelotú. ʻI heʻeku hū atu ki he lotú, naʻá ku maʻu ʻa e ongo faifekaú peá u kole ha tatau ʻo e Tohi ʻa Molomoná ke ʻoange ki hoku kaungāmeʻa foʻoú. ʻI he taimi naʻá ne aʻu mai ai ki he falelotú ʻi he tuku ʻa e lotú, naʻe fakamaheni kiate ia ʻa e kāingalotú mo vahevahe ʻenau fakamoʻoní.
ʻI heʻema fokí ne u talaange kia Mele ʻe malava pē ke ne ako lahi ange kia Sīsū Kalaisi ʻi haʻane lau ʻa e Tohi ʻa Molomoná. Naʻá ku toe talaange foki ʻa e feituʻu te ne lava ʻo maʻu ai ʻa e fakamatala ki he hā ʻa e Fakamoʻuí ki he kau Nīfaí. Neongo naʻe taimi nounou pē ʻene feohi mo e Kāingalotú, ka naʻá ku ʻiloʻi pē naʻá ne ongoʻi ha meʻa. Naʻá ku tuku ʻa Mele ʻi he feituʻu naʻá ma fetaulaki aí. Naʻe ʻikai ke u ʻamanaki te ma toe fetaulaki.
ʻI heʻeku foki mei he ngāué ʻi he ʻaho hono hokó, naʻe hoko ʻeku ʻeveʻevá ke u fononga ai ʻi ha hala naʻe ʻikai ke u faʻa angamaheni ki ai. Naʻá ku ʻohovale lahi ʻi heʻeku toe sio kia Melé! Naʻá ne malimali ʻi he taimi naʻá ne sio mai ai kiate aú. Naʻá ku fiefia ke u toe fakaheka ia ʻi he meʻalelé.
Kuo teʻeki ke u toe fetaulaki mo Mele talu mei he taimi ko iá, ka ʻi heʻeku manatu pē ki he aʻusia ko ʻení, ʻoku ou houngaʻia koeʻuhí naʻe ʻomi ʻe he ʻEikí ha faingamālie ke u vahevahe ai ʻa e ongoongoleleí. ʻOku ou ʻiloʻi ʻoku tāpuekina kitautolu ʻe he ʻEikí ʻi Heʻene taimi tonu pē ʻAʻana.