Leʻo ʻo e Kau Māʻoniʻoni ʻi he Ngaahi ʻAho Kimui Ní
Fakafiemālie hili ha Tama Tō
Tā fakatātā ʻa Allen Garns
ʻI ha uike ʻe hongofulu mā valu ʻo ʻeku feitamá, naʻá ku ʻā hake ʻo fakatokangaʻi naʻá ku tuʻutoto. Naʻá ku loto-hohaʻa ʻi he ʻikai ke tuʻu ʻa e totó, ne u fakakaukau leva ke u fakavavevave ki he falemahakí.
Lolotonga e fakaʻuli lōloa ki he falemahakí, naʻá ku fakaʻamua mo lotua ʻe lelei ʻa e meʻa kotoa pē. Naʻá ku fakakaukau ko e kovi taha ʻe ala hokó ko hano fekauʻi au ʻe he toketaá ke u tokoto ʻi ha ngaahi ʻaho lahi.
ʻI he taimi ne u tokoto ai ʻi falemahakí, naʻe fakahoko ʻe he kau ngāué ha ngaahi sivi. Naʻa nau ʻiloʻi naʻe ʻikai ke tā e mafu e pēpeé. Ko e meʻa naʻe hokó naʻá ku “tama tō” (fetal demise). Naʻe ʻikai ke toe lava ʻe he toketaá ke fai ha faitoʻo kiate au ʻi he taimi ko iá, naʻá ne fakaʻatā leva au mei falemahaki.
Naʻá ku foki lotomamahi mo tailiili ki ʻapi. Naʻe ʻikai ke u lava ʻo mohe he pō ko iá. ʻI heʻeku ʻā hake ʻi he pongipongi hono hokó, naʻe ueʻi au ke u ʻalu ki ha sēsini ʻenitaumeni pongipongia ʻi he temipalé.
ʻI he fakaʻosinga ʻo e sēsiní, naʻá ku siofi ʻa e ongo foʻi mama mali mo e mama fakamaʻu ʻi hoku nimá. Ko ha mama ia ʻo ʻeku kui fefine uá ʻa ia naʻe fakahingoa ki ai aú. Naʻá ne mālōlō ʻi hoku taʻu nimá, pea naʻá ku toki laukonga kimuí ni mai kau ki heʻene moʻuí. Naʻá ku manatuʻi naʻe tā tuʻolahi ʻene aʻusia ʻa e tama toó ʻi he taimi naʻá ne kei taʻu uofulu tupu aí.
Ne talu ʻeku faifeinga he pongipongi ko iá ke mapukepuke hoku loʻimatá ʻi heʻeku lotomamahí mo e manavaheé, ka ʻi he momeniti ko iá, naʻá ku ongoʻi ha loto nonga moʻoni. Naʻá ku ongoʻi naʻe fakafiemālieʻi au. Naʻe aʻusia heʻeku kui fefine uá ʻa e ngaahi faingataʻa tatau ʻi heʻene moʻuí, pea naʻe faitokonia ia ʻe he Fakamoʻuí. Naʻá ku ongoʻi fakapapau te Ne tokonia foki mo au.
“Te ne toʻo kiate ia ʻa honau ngaahi vaivaí, koeʻuhi ke fonu hono lotó ʻi he ʻaloʻofa, ʻo fakatatau ki he kakanó, koeʻuhí ke ne ʻafioʻi ʻo fakatatau ki he kakanó ʻa e founga ke tokoniʻi ai ʻa hono kakaí ʻo fakatatau ki honau ngaahi vaivaí” (ʻAlamā 7:12).
ʻOku ou houngaʻia moʻoni koeʻuhí ko e nonga ʻokú te maʻu ʻi he taimi ʻokú te ʻalu ai ki he temipalé, koeʻuhí ko ha tukufakaholo ʻo ha ngaahi kui faivelenga, pea hiliō aí, koeʻuhí ko e feilaulau fakalelei ʻa e Fakamoʻui ko Sīsū Kalaisí.