Ngaahi Tali mei he Kau Taki ʻo e Siasí
Founga ke Maʻu ai ha Fakamoʻoní
Mei ha lea ʻi he konifelenisi lahi ʻo ʻEpeleli 2008.
“Ko e ʻuluaki sitepu ki hono maʻu ʻo ha faʻahinga ʻilo, ko e holi moʻoni ke ʻilo ia. ʻI he tafaʻaki ʻo e poto fakalaumālié, ko e sitepu hono hokó ko e kole ki he ʻOtuá ʻi he lotu fakamātoato. Hangē ko ia ʻoku tau lau ʻi he fakahā ʻi onopōní, ʻoku pehē ai, “Kapau te ke kole, te ke maʻu ha fakahā hoko mo e fakahā, pea mo ha ʻilo hoko mo e ʻilo, koeʻuhí ke ke ʻiloʻi ʻa e ngaahi meʻa liló mo e ngaahi meʻa fakamelinó—ʻa e meʻa ʻoku ʻomi ʻa e fiefiá, ʻa e meʻa ko ia ʻoku ʻomi ʻa e moʻui taʻengatá” (T&F 42:61).
Ko e meʻa ʻeni ne tohi ʻe ʻAlamā ʻo fekauʻaki mo e meʻa naʻá ne faí: “Vakai, kuó u ʻaukai mo lotu ʻi he ngaahi ʻaho lahi koeʻuhi ke u ʻiloʻi ʻa e ngaahi meʻá ni ʻe au. Pea ko ʻeni ʻoku ou ʻiloʻi ʻe au ʻoku moʻoni ia; he kuo fakahā ia ʻe he ʻEiki ko e ʻOtuá kiate au ʻaki hono Laumālie Māʻoniʻoní” (ʻAlamā 5:46).
ʻI heʻetau holi pea fekumí, ʻoku totonu ke tau manatuʻi ko e fakamoʻoní ʻoku ‘ikai maʻu taʻe ngāueʻi ia ka ko ha founga ngāue ia ʻoku fie maʻu ai ke tau fai ha me‘a. Naʻe akonaki ʻa Sīsū ʻo pehē: “Pea ko ia ia ʻe fai ki hono finangaló, te ne ʻilo ʻa e akonakí, pe ʻoku ʻi he ʻOtuá ia, pe ko ʻeku lea ʻiate au pē” (Sione 7:17).
ʻOku ʻi ai ha founga ʻe taha ʻo e fekumi ki he fakamoʻoní ʻoku ngali fakaofo ʻi hono fakafehoanaki atu ki he ngaahi founga kehekehe ʻo hono maʻu ʻo ha ʻilo kehé. ʻOku tau maʻu pe fakamālohia e fakamoʻoní ʻi hono toutou fakahoko iá. Ne fokotuʻu mai ʻe ha tokotaha ʻoku lelei ange hono maʻu ʻo ha fakamoʻoni ʻi heʻetau tuʻu ʻo fakahoko iá, kae ʻikai ko ʻetau lotu pē ʻo kole ke maʻu ha fakamoʻoni.
ʻOku matuʻaki mahuʻinga e fakamoʻoni fakatāutahá ki heʻetau tuí. Neongo iá, ʻoku mahuʻinga ki heʻetau moʻui fakalaumālié ʻa e ngaahi meʻa ko ia kuo pau ke tau fai ke maʻu, fakamālohia, mo tauhi ha fakamoʻoní. Ke toe tānaki atu ki he ngaahi meʻa kuo ʻosi fakamatalaʻí, ʻoku fie maʻu ke tau maʻu ʻa e sākalamēnití ʻi he uike kotoa pē (vakai, T&F 59:9) kae lava ke tau maʻu ʻa e talaʻofa mahuʻinga ko ia “ke ʻiate [kitautolu] hono Laumālié maʻu ai pē” (T&F 20:77). Ko e moʻoni ko e Laumālie ko iá, ʻoku maʻu mei ai ʻetau fakamoʻoní.