Mei Pālesiki Sapolo
ʻOku mau nofo ʻi ha tafaʻaki kehekehe ʻo e māmaní, ka ne mau ongoʻi tatau ʻi he taimi ne langa ai e ngaahi temipalé ʻo ofi kiate kimautolú!
Ko hoku hingoá ko Lesieli. ʻOku ou nofo ofi ki he Temipale Pālesi Falaniseé.
ʻOku fuʻu mahuʻinga ʻa e temipalé ki hoku fāmilí. Kimuʻa pea toki langa ʻa e Temipale Pālesí, naʻa mau faʻa ō tuʻolahi ʻi he taʻu ʻi ha ngaahi fononga fakafāmili ki he Temipale Felengifuti Siamané. ʻOku houa ʻe 10 ke lele meʻalele ki ai mo foki mai!
Naʻa mau saiʻia ke mamata ki hono langa ʻo e temipale foʻoú. ʻI he tuku ʻa e lotú he Sāpate kotoa pē, naʻe lele ofi atu ʻemau ongomātuʻá ke mau lava ʻo sio ki he tuʻunga ʻo e langá. ʻUluakí naʻa nau holoki ʻa e fale motuʻá pea keli ha fuʻu luo. Pea nau kamata leva ke langa ʻa e temipalé ʻo māʻolunga ange. ʻIkai fuoloa kuo tuʻu e fale ʻo e ʻEikí!
ʻOku ou vēkeveke mo hoku ngaahi tokouá ke ō ʻi ha ʻaho ki he temipalé. Ko hoku tokoua lahi tahá, ʻEsitā, pea ko ia ʻe fuofua kau atu ki hono fakahoko e papitaisó. ʻOku mau tatali loto vēkeveke foki ke hoko homau taimi ke ō aí. ʻOku mau saiʻia ʻi he temipalé mo fiefia ke tuʻu ha taha ʻi homau koló tonu pē!
Ko hoku hingoá ko Kosei. ʻOku ou nofo ofi ki he Temipale Sapolo Siapaní. Naʻá ku saiʻia ke tangutu ʻi he matapā sioʻata hoku falé ʻo mamata ʻi he langa ʻo e temipalé.
ʻI he lolotonga ʻo e ʻoupeni hausí, naʻá ku fakaafeʻi hoku kaumeʻa mamaé ke mau ʻalu. Naʻá ne pehē naʻe fakaʻofoʻofa ʻa e meʻa kotoa pē.
ʻOku ou saiʻia ke lau ʻa e fakatāpui ʻo e temipalé ko hono ʻaho fāʻeleʻí ia. Ko hoku ʻaho fāʻeleʻí foki ʻa e ʻaho ko iá. Pea mo Palesiteni Monisoni foki! Naʻá ku lava mo ʻeku ongomātuʻá ke ʻi he loto temipalé ʻi he taimi naʻe fakatāpui aí.
ʻOku ou fakamālō lahi ke nofo ofi ki he temipalé. Ko e taimi ʻoku faingataʻa ai hoku ngaahi ʻahó ʻi he akó, ʻoku ou lava ʻo kolosi ʻi hono kelekelé ʻi heʻeku foki ki ʻapí. ʻOku ou ongoʻi e ʻofa ʻa e Tamai Hēvaní kiate aú ʻi he taimi ʻoku ou ʻi ai aí. ʻOku ou nofo ʻo ʻamanaki atu ki he taimi te u lava ai ʻo hū ki loto ke fakahoko ʻa e papitaisó mo mali kimui ange ai.