Piki Maʻu
ʻOku nofo ʻa e tokotaha naʻá ne faʻú ʻi ʻIutā, USA.
ʻOku tokoni lahi e ngaahi kaungāmeʻá ʻi he tuʻunga faingofua—pe faingataʻa—ʻo ʻetau moʻui ʻaki ʻetau ngaahi tuʻunga moʻuí.
Naʻá ku tupu hake mo ha ngaahi kaungāmeʻa naʻe mēmipa he Siasí, pea naʻá ku fiefia ke papitaiso ʻo hoko ko ha mēmipa. ʻI he taimi naʻá ku hiki ai ki ha feituʻu ʻe taha ʻo e fonuá ki he ʻunivēsití, ne kamata ke akoʻi au ʻe he kau faifekaú. Meʻapangó, he naʻe ʻai ʻe he mālohi mei hoku ngaahi toʻu foʻoú ke faingataʻa hono moʻui ʻaki e ngaahi tuʻunga moʻui ʻo e ongoongoleleí. Naʻe fakaʻaongaʻi ʻe hoku kaungā ako taʻu ʻuluakí ha taimi lahi ʻi he paati inu ʻolokaholó. Naʻe teʻeki ke u ʻahiʻahiʻi kimuʻa ʻa e ʻolokaholó, ka naʻe teke taʻetuku au ʻe hoku ngaahi kaungāmeʻa foʻoú ke u inu.
Naʻá ku ʻilo naʻe moʻoni ʻa e ongoongoleleí, ka naʻe faingataʻa ke tekeʻi e fakatauele mei hoku toʻú.
Naʻá ku kamata lotua ki he Tamai Hēvaní ha ivi ke fai e fili ʻoku totonú. Naʻe teʻeki ai ke u maumauʻi e tuʻunga moʻuí, ka naʻá ku manavasiʻi naʻa ʻikai ke u maʻu e ivi ke fakasītuʻaʻi ʻa e ʻolokaholó ʻi ha taimi ʻe toe ʻomi ai. Naʻá ku ʻofa ki hoku ngaahi kaungāmeʻa naʻa mau tui tataú.
Naʻá ku ʻalu ʻi ha pō Tokonaki ʻe taha ki ha paati mo ha kakai ʻi heʻeku falemohé. Ne ʻikai toe tatali ʻa e inu kotoa hoku ngaahi kaungāmeʻá mo fakalotolahiʻi au ke u ʻuluaki ʻahiʻahiʻi ʻa e ʻolokaholó.
Naʻe fakataueleʻi au. Naʻá ku toʻo ʻa e ipu pia naʻe mono maí. Naʻá ku hiki hake ia ki hoku ngutú, taʻefiemālie kae fiefia ʻi heʻeku maʻu e tokanga hoku ngaahi kaungāmeʻá. Ka naʻe luelue mai ʻa Niki, ko ha tamasiʻi ʻoku ʻiloa ʻi he konaá, ki heʻemau kulupú.
Naʻá ne ʻeke mai, “Naʻe ʻikai ke ke inu ʻe koe, ko ia?”
Naʻá ku tali ange, “Teʻeki ai.”
Naʻe pehē mai leva ʻa Niki, “Kapau te ke inu, te ke fakameʻapangoʻia ai ʻi he ʻaho kotoa pē he toenga ʻo hoʻo moʻuí.”
Naʻá ku ʻohovale. Naʻá ku ʻilo naʻe moʻoni ia. Naʻe ʻikai ke u fie inu. Naʻá ku loto au ke u kau ki he Siasí. Naʻá ku fakafoki ʻa e ipú peá u mavahe mei he pātí, mo fakamālō ʻi he ʻikai ke u fai ha fili koví.
Naʻá ku ʻalu ʻi he pongipongi hono hokó ki he lotú, fetaulaki mo e ongo faifekaú, ʻo fokotuʻu ʻa e ʻaho ki hoku papitaisó. Talu mei he ʻaho ko iá mo ʻeku fakamamaʻo mei he ngaahi paati ʻolokaholó. Naʻá ku maʻu ha ngaahi kaungāmeʻa foʻou ʻi he lotú naʻe tatau honau tuʻunga ʻulungāngá mo ʻenau tūʻunga moʻuí mo au. Naʻá ku kei kaungāmeʻa pē mo e kakai ʻi homau falemohé, ka naʻá ku fakamahinoʻi ange ʻeku ngaahi tuʻunga moʻuí. ʻI he taimi naʻa nau ʻilo ai e mahuʻinga ʻo e ngaahi meʻa naʻá ku fakamahuʻingaʻí, naʻa nau fakaʻapaʻapaʻi pea ʻikai ke nau toe teke au. Naʻa nau tali mo fakaʻapaʻapaʻi ia ʻi heʻeku mavahe mei he lokí ʻi heʻenau sio ʻi he ngaahi heleʻuhila taʻetāú pe fanongo ki he ngaahi fasi taʻetāú.
Naʻe fakamālohia ʻeku fakamoʻoní ʻe he aʻusiá ni, pea te u feinga ke ʻoua naʻa teitei holoki ʻeku ngaahi tuʻunga moʻuí koeʻuhí ko e mālohi fakatoʻú. ʻOku ou toe ʻiloʻi foki ko e founga lelei taha ke fakafepakiʻi ʻa e ngaahi fili faingataʻá ke ke ʻiloʻi hoʻo ngaahi tuʻunga moʻuí pea piki maʻu ki ai mei he kamataʻangá.
ʻOku ou ʻilo ʻoku tali ʻe he Tamai Hēvaní ʻeku ngaahi lotú pea fakaivia mo tekeʻi ʻa e ʻahiʻahí. ʻOku ou houngaʻia ʻi hono fakalotolahiʻi au ʻe he Laumālie Māʻoniʻoní ke u fai ʻa e fili totonú. ʻOku ou ʻiloʻi ko e ngaahi tuʻunga moʻui ʻo e Siasí ʻoku ʻomi ia ke maluʻi kitautolu, pea ʻoku ou fakamālō naʻe tokoni ʻeku fili ke tauhi kinautolú ke u fili ai ke kau ki he Siasí.