Haʻu, ʻo Muimui ʻIate Au—Maʻá e Houalotu ʻo e Lakanga Taulaʻeiki Faka-Melekisētekí mo e Fineʻofá

October 2017

Haʻu, ʻo Muimui ʻIate Au—Maʻá e Houalotu ʻo e Lakanga Taulaʻeiki Faka-Melekisētekí mo e Fineʻofá

Kamata ʻi Sānuali 2018

Fakafeʻiloaki ha aʻusia foʻou ʻi he Sāpaté maʻá e kakai lalahí

First Presidency — Kuo tau ako ʻi ha ngaahi taʻu lahi ʻa e ngaahi tohi ʻo e *Ngaahi Akonaki ʻa e Kau Palesiteni ʻo e Siasí*. Te tau kamata fakaʻaongaʻi ʻi he 2018, ʻa e ngaahi pōpoaki ʻo e konifelenisi lahí ke nofotaha ʻetau akó ʻi he ngaahi akonaki ʻa e kau palōfita moʻuí, kau ʻaposetoló, mo e kau taki kehe ʻo e Siasí.

identify needs — Kau Faiako Fakaʻapí mo e Kau Faiako ʻAʻahí

counsel together — Ngaahi Fakataha ʻi he Sāpaté

Ko ha Aʻusia Foʻou ʻi he Sāpaté

ʻI Sānuali 2018, ʻe liliu ʻa e ngaahi houalotu maʻá e ngaahi kōlomu ʻo e Lakanga Taulaʻeiki Faka-Melekisētekí mo e Fineʻofá. ʻOku kau ʻi he ngaahi liliu ko ʻení ʻa e ngaahi nāunau ʻoku tau fakaʻaongaʻí—ʻe fetongi e ngaahi tohi ʻo e Ngaahi Akonaki ʻa e Kau Palesiteni ʻo e Siasí ʻaki ha fakamamafa lahi ange ʻi he ako mei he ngaahi pōpoaki ʻo e konifelenisi lahí, fealēleaʻaki fakatahá, mo hono ako e ngaahi kaveinga makehe kuo filifili ʻe hotau kau taki māʻolungá.

Ka ko e liliu mahuʻingamālie tahá ʻoku kaunga ia ki he founga ʻoku tau fakaʻaongaʻi ai ʻa e ngaahi nāunau ko ʻení ke fakahoko ʻaki e ngaahi taumuʻa totonu ʻo ʻetau ngaahi houalotu ʻi he Sāpaté.

Ko e Taumuʻa ʻo ʻEtau Ngaahi Houalotú

Kuo fokotuʻu ʻe he ʻOtuá ʻEne ngaahi foha mo e ngaahi ʻofefine fuakavá ki he ngaahi kōlomu lakanga fakataulaʻeikí mo e Fineʻofá ke tokoni ke fakahoko ʻEne ngāué. ʻOku hoko ha meʻa mālohi ʻi he taimi ʻoku tau fakatahataha ai ʻi he malumalu ʻo e tataki ʻo kinautolu ʻoku nau maʻu ʻa e ngaahi kī ʻo e lakanga fakataulaʻeikí. Ko ia neongo e mahuʻinga ʻo e fakahinohino ʻo e ongoongoleleí, ka ko e ngaahi houalotu ʻo e lakanga fakataulaʻeikí mo e Fineʻofá ʻi he Sāpaté, ʻoku ʻikai ko ha ngaahi kalasi pē. Ko ha ngaahi houalotu ngāue foki ia ʻa ia ʻoku tau ako fakataha ai ʻa e ngaahi pōpoaki mei he konifelenisi lahí, fealeaʻaki fekauʻaki mo e ngāue ʻo e fakamoʻuí, mo fokotuʻutuʻu ke fakahoko ʻa e ngāué. ʻE tokoni ʻa e ngaahi liliu ʻe ʻomi ʻi he 2018, ke tau fakakakato ai ʻa e ngaahi taumuʻá ni.

Ngaahi Fehuʻí mo eTalí

Ko e liliu ko ʻení ko ha nāunau fakalēsoni foʻou—pe ʻoku mahulu hake ia ai? Mahalo ʻe hangē ʻa e ngaahi nāunau foʻoú ko ha nāunau fakalēsoní, ka ko ha founga foki ia ke malava e ngaahi kōlomu ʻo e Lakanga Taulaʻeiki Faka-Melekisētekí mo e Fineʻofá ʻo fakalahi ʻenau kau atu ki he ngāue ʻa e ʻOtuá pea mo hono feau e ngaahi fie maʻu fakalotofonuá. ʻOku ʻomi ʻe he liliú ni ha faingamālie fakataha ki hono fekumi, fealeaʻaki, mo feau e ngaahi fie maʻu ko iá.

Ko e hā ʻe nofotaha ai ʻetau tokangá lolotonga e ngaahi houalotu he Sāpaté? ʻE kamata ʻi Nōvema ʻo e 2017, hono fakakau ʻa e ngaahi nāunau ke fakaʻaongaʻi ʻi he ngaahi houalotu Lakanga Taulaʻeiki Faka-Melekisētekí mo e Fineʻofá he Sāpaté, ʻi he ngaahi makasini ʻo e konifelenisi lahí ʻi he Liahona mo e Ensign. ʻE nofotaha ʻa e tokanga ʻo e fakataha fakamāhina ʻe ua ʻi he ngaahi pōpoaki ʻo e konifelenisí, pea ʻe ʻoatu ki he kau takí mo e kau faiakó ʻa e ngaahi fakakaukau ki hono tokoniʻi e kāingalotú ke nau aleaʻi mo fakaʻaongaʻi e ngaahi pōpoaki ko iá. ʻE fakaʻaongaʻi ʻa e ngaahi Sāpate ʻUluakí ki he fealeaʻaki fakataha ke feau e ngaahi fie maʻu fakalotofonuá pea ko e ngaahi Sāpate faá ke ako ha tefito kuo fili ʻe hotau kau taki maʻolungá. Vakai ki he taimi-tēpile ʻo e fakataha fakamāhiná ʻi he tafaʻaki ʻe taha ʻo e pēsí ni.

ʻOku ʻuhinga ki he hā ke fealeaʻaki fakataha fekauʻaki mo e ngaahi fie maʻu fakalotofonuá? ʻOku “fealeaʻaki” (T&F 107:89)ʻa e ngaahi kōlomu ʻo e Lakanga Taulaʻeiki Faka-Melekisētekí mo e Kau Fineʻofá ʻi he Sāpate ʻuluaki ʻo e māhina takitaha. ʻOku fakaʻaongaʻi ʻa e ngaahi houalotu ʻo e Sāpate ʻuluakí ke fekumi ki he ngaahi fie maʻu fakalotofonuá mo fealeaʻaki fakataha ki he ngaahi founga ke feau ai e ngaahi fie maʻu ko iá, ʻi he malumalu ʻo e kau taki lakanga fakataulaʻeikí pe Fineʻofá. ʻE malava ke kau ʻi he ngaahi tefito ki he fealeaʻaki ʻi he Sāpate ʻuluakí ʻa e founga ke fakatupulaki ai ʻa e fetuʻutaki mo e ngaahi mēmipa ʻo e fāmilí, ngāue tokoni ʻi he koló, mo akoʻi ʻa e toʻu tupu ʻi he uōtí pe koló. ʻI he ngaahi fakataha hono hokó, ʻoku fakamanatu ʻe he kōlomú, kulupú, pe Fineʻofá ʻa e ngaahi fokotuʻu fakakaukaú mo e ngaahi ngāué.

ʻOku tatau nai ʻa e nāunau fakalēsoni ko ʻení mo e Haʻu, ʻo Muimui ʻIate Au maʻá e toʻu tupú? Neongo ʻoku kehe ʻa e ngaahi tefito mo e ngaahi nāunau ʻo e Haʻu, ʻo Muimui ʻIate Au—Maʻá e Ngaahi Houalotu ʻo e Lakanga Taulaʻeiki Faka-Melekisētekí mo e Fineʻofá mei he Haʻu, ʻo Muimui ʻIate Au maʻá e toʻu tupú, ka ʻoku tatau ʻa e founga ki hono akoʻí mo akó. Ki ha ngaahi fakamatala lahi ange fekauʻaki mo hono ako mo akoʻi e ongoongoleleí, vakai ki he Faiako ʻi he Founga ʻa e Fakamoʻuí, ʻi he teaching.lds.org.

ʻOku ʻikai ko ha faiako au. ʻOku fie maʻu nai ke u totongi ha Liahona pe Ensign? ʻE toe lahi ange hoʻo aʻusiá ʻo kapau te ke lau ʻa e ngaahi pōpoaki ʻo e konifelenisi lahí pea ʻomai kinautolu ki hoʻo ngaahi fakataha he Sāpaté. Te ke lava ʻo maʻu ʻa e ngaahi pōpoaki ʻilekitulōniká ʻi he conference.lds.org pea ʻi he Gospel Library app pe ko hono totongi e Liahona pe Ensign (vakai store.lds.org).

Fēfē kapau ʻoku ʻikai maʻu ʻa e makasini ʻo e konifelenisi lahí ʻi heʻeku lea fakafonuá? ʻOku maʻu atu ʻa e ngaahi pōpoaki ʻo e konifelenisi lahí ʻi he ngaahi lea fakafonua lahi ʻi he conference.lds.org pea ʻi he Gospel Library app, pea ʻe maʻu atu ʻa e ngaahi nāunau fakalēsoní ʻi he ComeFollowMe.lds.org. Kapau ʻoku ʻikai maʻu ʻa e ngaahi nāunau fakalēsoní ʻi hoʻo lea fakafonuá ʻo tatau pē ʻi he ʻinitanetí pe ʻi he makasiní, vakai ki he Fakahinohino ki he Nāunau Fakalēsoni ʻo e 2018 ki ha toe fakamatala lahi ange.

Ko e fē taimi te tau kamata ai ke ako ʻa e ngaahi pōpoaki foʻou ʻo e konifelenisi lahí? Te mou kamata ako ʻa e ngaahi pōpoaki ʻo e konifelenisi ʻo ʻOkatopa 2017 ʻi Sānuali 2018. Hili iá, ʻe fili hoʻomou kau taki fakalotofonuá ʻa e taimi ke kamata fakaʻaongaʻi ai ʻa e ngaahi pōpoaki mei he konifelenisi hokó—fakafuofua ki Mē mo Nōvema ʻo e taʻu kotoa.

Ko hai ʻokú ne fili ʻa e pōpoaki ʻo e konifelenisi lahí te mau akó? ʻOku fealeaʻaki fakataha hoʻomou kau taki fakalotofonuá pe ko e fē pōpoaki konifelenisi te ne feau lelei taha e fie maʻu hoʻomou kōlomú, kulupú, pe Fineʻofá. ʻE malava ke ako ʻe ha kulupu taulaʻeiki lahi, kulupu kaumātuʻa, mo e Fineʻofá ʻi he uooti pe kolo tatau, ha ngaahi pōpoaki kehekehe kae lava ke feau ʻa e ngaahi fie maʻu kehekehe.

Taimi-Tēpile ʻo e Lakanga Taulaʻeiki Faka-Melekisētekí mo e Fineʻofá he Sāpaté

Kamata ʻi Sānuali 2018

	Tefito	Tataki ʻe he
Sāpate ʻUluakí	Fealeaʻaki fakataha fekauʻaki mo e ngaahi fie maʻu fakalotofonuá	Palesitenisī pe takimuʻa fakakulupu
Sāpate Uá mo e Tolú	Ngaahi pōpoaki fakamuimuitaha ʻo e konifelenisi lahí	Palesitenisī pe takimuʻa fakakulupu pe faiako ne uiuiʻí
Sāpate Faá	Ngaahi tefito pau kuo fili ʻe he kau taki māʻolunga ʻo e Siasí	Palesitenisī pe takimuʻa fakakulupu pe faiako ne uiuiʻí
Sāpate Nimá	Tefito kuo fili ʻe he pīsopelikí	Pīsopelikí pe ko ha taha ʻoku nau vahe ki ai

ʻE maʻu ʻa e ngaahi fakahinohino ki he ngaahi houalotu ko ʻení ʻi he Liahona ʻo Nōvemá mo e Ensign, ʻi he Gospel Library app, pea ʻi he ComeFollowMe.lds.org.