Ko Hono Maʻu ʻo e Fakaʻapaʻapaʻi Kitá ʻo fakafou ʻi he Moʻui Fakafalala pē Kiate Kitá

José Alberto Navas (i hono fakamatalaʻi kia Meliame Suiní)

Seni Hosei, Kosita Lika

Naʻá ku ʻosi mali pea naʻe ʻi ai ʻeku fānau ʻe toko tolu, pea ʻikai haʻaku ngāue. Naʻe ʻi ai ha nounou fakangāue ʻo ʻikai haʻaku toe ʻamanaki. Naʻá ku hohaʻa ki he malu hoku fāmilí, pea ʻikai ke u toe falala kiate au.

Naʻe fakalotolahiʻi au ʻe hoku uaifi ko Kalá, ke u kau ʻi ha kulupu moʻui fakafalala pē kiate kita. Naʻe fakamā kiate au ke u tali naʻe ʻikai ke u ngāue, ka naʻá ne fakalotolahiʻi au ke u kau ʻi he kulupú kau lava ʻo tauhi homa fāmilí.

Naʻá ku fakatoupīkoi ka naʻe fai pē ha feinga. Naʻá ku fakatokangaʻi ʻi heʻeku kau ʻi he kulupú ʻe lava ke mahuʻinga ʻeku poto he lea faka-Pilitāniá ʻi he ʻātakai ngāué. Ne u ʻosi ako e lea faka-Pilitāniá ʻi heʻeku ngāue fakafaifekaú, ka ko e fakamatala pē kau ki he meʻa fakalotú naʻá ku ʻiloʻí. Naʻá ku kau ʻi he ngaahi kalasi lea faka-Pilitānia naʻe ʻomi ʻe he Siasí ke fakaleleiʻi ʻeku ʻilo ki he ngaahi foʻi leá. ʻI haʻaku foki mai ʻi ha ʻaho ʻe taha mei heʻeku kalasi lea faka-Pilitāniá, ne mono mai ʻe Kala kiate au ʻa e telefoní.

“Ko hai?” Ko ʻeku fehuʻí ange ia.

Naʻá ne tali mai, “ʻOku ʻikai ke u ʻilo ʻe au.” “ʻOku nau lea faka-Pilitānia.”

Ko ha fakafofonga ia ʻi he maʻuʻanga ngāué mei ha taha ʻo e ngaahi kautaha lalahi taha ʻi Kosita Liká, ko haʻane kole mai ke ne ʻinitaviu au. Naʻá ku moʻutāfuʻua, ka naʻe lelei ʻaupito pē ʻa e ʻinitaviú. Naʻá ku toki ʻilo ki mui ange ko Kala naʻá ne fokotuʻutuʻu ʻa e ʻinitaviú.

Naʻá ku maʻu ʻa e ngāué, pea naʻá ku manatuʻi e founga ʻo hono tokoniʻi au ʻe heʻeku kulupu moʻui fakafalala pē kiate kitá. Peá u fakakaukau leva ki he founga te u fakaʻaongaʻi lelei ange ai ʻa e meʻa naʻá ku akó. Naʻá ku kamata ke kumi ki ha toe ngāue lelei ange pea naʻá ku maʻu ha ngāue. Naʻá ku ngāue leva ke fokotuʻu haʻaku pisinisi langa.

ʻOku ʻikai ke u lavelave ʻiloa pe naʻá ku mei ʻi fē mo hoku fāmilí ka ne taʻeʻoua e kamata ne mau maʻu mei he polokalama moʻui fakafalala pē kiate kitá. Naʻá ku ako ke loto fakatōkilalo mo kole tokoni ki he ʻEikí. Naʻá ku toe ako foki ke fakangofua kinautolu ne nau fie tokoniʻi aú ke nau tāpuekina ʻeku moʻuí. ʻOku mau maʻu ha ngaahi tāpuaki lahi fau. ʻOku ou maʻu he taimí ni ʻa e fakaʻapaʻapaʻi kitá, pea te u lava ʻo tāpuakiʻi hoku fāmilí ʻaki e paʻanga ʻoku ou maʻú. ʻOku ou ʻiloʻi ʻoku tāpuakiʻi kitautolu ʻe he Laumālié ʻi he taimi ʻoku tau loto fakatōkilalo aí.