Ko e Fakatupu ʻo ʻEku Pisinisi Keke Laisé

Lordita Yagomyom

Misamisi ʻOkisitenitolo, ʻOtu Filipainí

Naʻá ku fie ʻave hoku fohá ke ngāue fakafaifekau, ka naʻe ʻikai feʻunga hono fakatau ʻo e kilo ʻe taha (pāuni ʻe 2) ʻo e bibingka (keke laise) he uiké ke lava ai ʻo tokoniʻi ia ʻi he ngāue fakafaifekaú.

Naʻe tokoni fakapaʻanga hoku fohá ki he fāmilí pea naʻe fuʻu hohaʻa ki homau tuʻunga fakapaʻangá ke ne ongoʻi fiemālie ʻi haʻane mavahe. Ko ha fāifeinga taʻetuku ia ke maʻu ʻe homau fāmilí ha paʻangá. Naʻá ku laukau ʻaki hoku foha taʻu 25 ʻi heʻene fie ngāue maʻá e ʻEikí, ka naʻá ku fakatokangaʻi te ne fie maʻu ha faʻahinga mana ke fakahoko ʻene fakaʻānaua ke ngāue fakafaifekaú.

Naʻá ku kau leva ki ha kulupu moʻui fakafalala pē kiate kita. Naʻá ku ʻiloʻi ʻe tāpuekina hoku fāmilí kapau te u tomuʻa ngāue mo tui. Naʻe ueʻi au ʻi he lolotonga ʻo ha fakataha ʻe taha ke u ʻalu ki ha feituʻu fefakatauʻaki. Naʻá ku mamata ai ki ha kakai fefine tokolahi ʻoku nau fakatau ha fanga kiʻi meʻakai tuʻufonua. Naʻá ku alea ai mo ha fefine ʻe taha. Naʻá ku talaange ʻe tuku ʻeku koloá he pongipongí mo ia ke ne fakatau pea toki tānaki ʻa e tupú ʻi he fakaʻosinga ʻo e ʻahó. Naʻe ʻaonga ʻa e fokotuʻutuʻú kiate kimaua fakatouʻosi. Naʻe ʻikai fuoloa kuó u maʻu mo ha kau faifakatau kehe. Naʻe tupulaki ʻeku pisinisí ʻo aʻu ki ha kau faifakatau ʻe toko 10 he lolotonga ʻo ʻeku ʻi he kulupu moʻui fakafalala pē kiate kitá.

Naʻá ku ako ke fakamavahevaheʻi ʻeku paʻanga fakafoʻituituí mei he paʻanga ʻo ʻeku pisinisí pea ʻai mo haʻaku vāhenga. Naʻá ku ako ke tuku ʻeku fakamole taimi ʻi hono ngaohi ʻo e koloa naʻe ʻikai fakatauá kae tokanga taha ki he koloa ʻoku tupu leleí. Naʻá ku toe ako foki ki he founga fakamāketi ʻi he mītia fakasōsialé. Naʻe tokoni mai hoku hoa ngāue mei he kulupu moʻui fakafalala pē kiate kitá ke u fokotuʻu ha ʻakauni Facebook. Pea mei ai, ne mau ako fekauʻaki mo hono fakahingoá mo e anga ʻo hono faʻó. Naʻe iku ʻo tupu ʻeku pisinisí ʻo aʻu ki ha tuʻunga ʻe ala liʻaki ai ʻe hoku husepānití ʻene ngāue fakatuʻasino faingataʻá kae ngāue mo au.

Ne ʻeke mai ʻe ha taha kimuí ni mai pe ʻoku tuʻunga fēfē ʻeku fakatau atú. Naʻá ku talaange fiefia ki ai ʻoku ou fakatau he taimí ni ha keke laise kilo ʻe 12 (pāuni ʻe 26).

Naʻá ne pehē, “ko e kilo ʻe 12 ʻi he uiké ʻoku sai ʻaupito!”

Naʻá ku talaange, “ʻIkai, tokoua.” “ʻOku ou fakatau ha kilo ʻe 12 ʻi he ʻaho.”

Naʻe talamai ʻe hoku fohá kimui ange naʻe fiefia ʻi he lava ʻeku pisinisí he taimí ni ke feau ʻemau ngaahi fie maʻú.

Naʻá ne pehē, “ʻOku ngalingali te u lava he taimí ni ʻo ngāue fakafaifekau taimi kakato.”

ʻOku ngāue he taimí ni ʻi he Misiona Filipaini Seni Pauló. ʻOku ou fakafetaʻi koeʻuhí ko e polokalama moʻui fakafalala pē kiate kitá. Naʻe fakamātoato moʻoni ʻa e ʻEikí ʻi Heʻene folofola, “Ko ʻeku taumuʻá ke tauhi ʻa ʻeku kau māʻoniʻoní” (T&F 104:15).