Mavahe mei he Tōʻonga “Fakatamaiki Angamahení”
Tukunoaʻi e lau ʻa e māmaní. ʻOku fēfē ʻa e ʻafio mai ʻa e Tamai Hēvaní kiate koé? Te ke lava ʻo moʻui fakatatau mo ʻEne vīsone ki he meʻa te ke malavá.
ʻOku lahi e lau ʻa māmani fekauʻaki mo e toʻu taʻu hongofulu tupú he ʻahó ni. Mahalo kuó ke ʻosi ʻilo ha niʻihi ʻo e ngaahi angafaí pe fanongo ʻi ha lāunga ʻa ha taha fekauʻaki mo e “longaʻi fānau ʻo e ʻaho ní.” ʻOku lahi foki mo ha ngaahi fakatotolo mo ha ngaahi fika fekauʻaki mo kimoutolu—homou anga ʻi he mītia fakasosialé, meʻa ʻokú ke fakatau maí, pea naʻa mo e lōloa ʻo hono maʻu ʻo hoʻo tokangá.
Ka ʻoku pehē ʻe Palesiteni Lāsolo M. Nalesoni ko e Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻoku “taʻe-fakafiemālie” ki ai ʻa e taimi ʻoku fanongo ai ki hono fakamatalaʻi ʻe he kau fakatotoló ʻa ʻenau ngaahi fakatotolo fekauʻaki mo e toʻu kei talavoú. Naʻá ne pehē, “Ko e moʻoni, ʻoku ʻikai ke u fuʻu mahuʻingaʻia he lau ʻa e kau mataotaó kau kiate kimoutolú, ʻi he meʻa kuo fakahā mai ʻe he ʻEikí kau kiate kimoutolú.”1
ʻOku ʻikai fie maʻu ʻe he ʻEikí ia ha ngaahi fakatotolo pe tōʻonga angafai ka ne toki ʻafioʻi kimoutolu. ʻOku ʻikai ke Ne lau kimoutolu ko ha fakamatala fakafika pe ko ha taha kuo mafasia ʻi he founga ʻo e feinga ʻa “māmani” ke fakamatalaʻi kimoutolú.
Naʻe pehē ʻe Palesiteni Tietā F. ʻUkitofa, Tokoni Ua ʻi he Kau Palesitenisī ʻUluakí, “ʻOku ʻikai ngata pē ʻEne ʻofa ʻiate koé ʻi he tuʻunga ʻokú ke ʻi ai he ʻaho ní, ka ʻi hoʻo toe hoko ko ia ko e tokotaha nāunauʻia pea mo e māmá, ʻokú ke malava ai pea mo maʻu ha holi ke aʻusiá.2
ʻOku ʻikai ʻafioʻi ʻataʻatā pē koe ʻe he ʻOtuá; ʻokú Ne ʻofa ʻiate koe.
Fie mavahe mei he tōʻonga ʻa e māmaní? Kamata vakai kiate koe ʻi he founga ʻoku ʻafioʻi mai koe ʻe he Tamai Hēvaní mo e kau tamaioʻeiki kuo filí. Fie fakafepakiʻi e ngaahi fakakaukau angamahení? Ko e taimi ʻeni ke ke tuʻu ai ʻo ngāué! Naʻe fakamanatu ʻe Kalaisi ʻi hono taʻu 12 ki Heʻene mātuʻa fakamāmaní naʻe fie maʻu ke Ne “fai ʻa e ngāue ʻa [ʻEne] Tamaí” (Luke 2:49).
Naʻe ʻikai ke Ne fuʻu kei siʻi, pea ʻoku pehē pē foki mo kimoutolu. Ko e fehuʻi hokó leva ʻeni: ʻE lava fēfē ke ke fai e ngāue ʻa hoʻo Tamai Hēvaní?
Ko ʻEne “ngāué” ʻoku fekauʻaki kotoa ia mo hono fakahoko “ʻo e moʻui taʻefaʻamate mo e moʻui taʻengata ʻa e tangatá” (Mōsese 1:39), ko ia te ke lava ʻo fakahoko e ngāue ʻa hoʻo Tamaí ʻaki hono fai hoʻo lelei tahá ke aʻusia ho tuʻungá pea mo hoko ko ha taha ʻokú ne tokoniʻi ʻa e niʻihi kehé ke nau aʻusia mo kinautolu honau tuʻungá.
Ko e taimi ʻeni ke ke fatongia ʻaki ho kahaʻú. Ko e hā te ke lava ʻo fai he taimí ni ke fakapapauʻi ʻokú ke aʻusia ʻa e tuʻunga ʻoku ʻafioʻi ʻe he Tamai Hēvaní te ke lava ʻo aʻusiá, ʻo ʻikai ʻi ʻitāniti pē ka ʻi he moʻúi ko ʻení foki?
ʻOkú ke fie mali ʻi he temipalé? Tukupā he taimí ni ke ke fakakaukau, lea, pea mo tōʻonga maʻa. ʻOkú ke sioloto atu ki haʻo ako ʻi he ʻunivēsití? Fakatupulaki he taimí ni ha ngaahi taukei ako lelei. ʻOkú ke fie ngāue fakafaifekau? Tānaki atu ʻa e Malanga ʻAki ʻEku Ongoongoleleí ki hoʻo ako ʻo e ongoongoleleí (tautautefito ki he vahe 3). ʻOkú ke fie tokonaki maʻa ha fāmili? Ako he taimí ni ki he founga ʻo hono faʻu mo tauhi ha patisetí.
Te ke lava foki ʻo vakai ki he ngaahi meʻa ʻokú ne ʻai ke ke fiefiá he taimí ni. ʻOkú ke saiʻia ʻi he fiká? Tā e pianó? Faʻu talanoá? Hokohoko atu pē ia! Vakai pe ʻoku ʻi ai ha ngaahi founga te ke lava ai ʻo fakalakalaka: ngaahi kalasi ako, fakahinohino he ʻinitanetí, ngaahi feʻauhi, ngaahi ako ngāue, mo e alā meʻa pehē.
Fakangata mo fakafepakiʻi e ngaahi fakakaukau angamahení! Puleʻi ho kahaʻú. Ko e hā ʻokú ke fai ke ke aʻusia ai ho tuʻunga lelei tahá? Fakahoko mai ke maʻu ʻilo ʻaki haʻo ʻīmeili ki he liahona@ldschurch.org pe tuku ha fakamatala ʻi he LDS Youth Facebook pe ngaahi peesi Instagram.