Ko e Tokoní, Peni Vahevahe ʻe Taha ʻi he Taimi
Naʻe kamata kotoa ia ʻi he taimi naʻe fokotuʻu ai ʻe homau siteikí ha ngāue ke tokoni ki he kau kumi hūfangá. Naʻá ku saiʻia moʻoni ʻi he ngāué, peá u kole ange leva ki heʻeku faʻeé ke ne fakamatala ia ki heʻeku faiako he akó, pea naʻe fie fai ʻe he faiakó ha meʻa mo e kalasi faá. Naʻá ku ʻalu mo hoku tuofefine ko Metí mei he matapā ki he matapā ʻo kole ha tokoni fakapaʻanga, ke tā ha sīpinga ki he ngāué.
Ne hoko mai ʻa e ʻaho ke fakamatala ai ʻa e ngāué ki he toenga ʻo e kalasi faá. Naʻá ku kiʻi tailiili. Ko hono moʻoní, naʻá ku fuʻu manavahē, ka naʻá ku fai ʻeku lelei tahá. Naʻá ku fakamatala ki he toenga ʻo e kalasi faá ʻa e meʻa ne mau fie maʻu ki he naunau ako maʻá e kau kumi hūfangá. Naʻá ku fakamatala fekauʻaki mo ʻema ō mei he ʻapi ki he ʻapi, mo fakatukupaaʻi kinautolu ke nau feinga ke toe lelei ange ʻiate au ʻi he tānaki ʻo e paʻangá. Naʻa mau ngaohi fakataha ha nāunau ʻe 100 tupu. Naʻa mau fakahū ki ai ha ngaahi pepa ako, peni vahevahe, mo ha ngaahi nāunau ako kehe. Naʻa mau tānaki atu foki ha kiʻi tohi ʻo pehē, “ʻOku talitali lelei koe ki Siamane.”
Naʻá ku ʻave mo ʻeku fineʻeikí ʻa e ngaahi nāunaú ki he nofoʻanga kumi hūfangá. He ʻikai ke u pehē naʻe sai ʻa e nofoʻangá, ka naʻe ʻi ai ha faiʻanga vaʻinga mo ha feituʻu ki he ako fakaʻeketēmiká. Naʻe ʻi ai ha lēlue ʻi he veʻe nofoʻangá naʻe fuʻu leʻolahi, pea ne talamai ʻe he fānaú kiate au ʻoku ongo hangē ko e ngaahi vakapuna seti ʻoku faʻa puna ofi ki Sīlia pea mo e ngaahi feituʻu hangē ko iá. Mahalo ʻoku ongo hangē ha pomú ki he longaʻi fānau kuo nau fanongo ki ai ʻi honau fonua tupuʻangá.
Naʻá ku fetaulaki mo ha longaʻi fānau tokosiʻi ʻi he nofoʻangá ʻoku mau taʻu tatau, kau ai ʻa Taniela, ko ha taha veimau lelei moʻoni. Naʻe ʻikai maʻu haʻaku faingamālie ke vaʻinga veimau mo ia, ko ha meʻa kovi ia he naʻá ku manako he veimaú, ka naʻa nau fakaafeʻi au ke mau vaʻinga fusipolo mo pingi-pongo. Ne talamai ʻe he tamaiki tangatá kiate au ʻoku nau taʻelata mo fie maʻu moʻoni ke mavahe mei he nofoʻangá ʻo toe foki ki he akó.
Hili ʻemau vaʻinga fusipolo mo e pingi-pongó ne ma tufa leva ʻa e fanga kiʻi nāunaú. ʻOku ou ongoʻi lelei ʻi heʻeku lava ʻo fai ha faʻahinga angaʻofa maʻá e longaʻi fānau ne nofo ʻi he nofoʻangá.