ʻŌʻōfaki e Niʻihi ʻOku Heé ʻAki e ʻOfá

Ako ʻi he faʻa lotu e fakamatala ko ʻení pea fekumi ki ha ueʻi fakalaumālie ke ke ʻiloʻi ʻa e meʻa ke ke vahevahé. ʻE teuteuʻi fēfē ʻe he mahino e taumuʻa ʻo e Fineʻofá ʻa e ngaahi ʻofefine ʻo e ʻOtuá ki he ngaahi tāpuaki ʻo e moʻui taʻengatá?

Naʻe pehē ʻe Palesiteni Tietā F. ʻUkitofa ko e Tokoni Ua ʻi he Kau Palesitenisī ʻUluakí, “Ko hono moʻoní ʻoku ʻikai ha fāmili ia ʻe haohaoa.” “Ko e hā pē ha palopalema ʻoku fehangahangai mo ho fāmilí, ko e hā pē ha meʻa kuo pau ke ke fai ke fakaleleiʻi kinautolu, ko e kamataʻanga mo e ngataʻanga ʻo e founga ke solovaʻakí ko e manavaʻofá, ʻa e ʻofa haohaoa ʻa Kalaisí.”¹

Naʻe pehē ʻe Linitā K. Pētoni, ko e Palesiteni Lahi mālōlō ʻo e Fineʻofá fekauʻaki mo kinautolu ʻoku ʻikai ke nau kau kakato ʻi he ongoongoleleí: “ʻOku ʻofa e Tamai Hēvaní ʻi he kotoa ʻo ʻEne fānaú. … ʻE tatau ai pē pe ʻoku nau ʻifē—ʻi loto pe mavahe mei he halá—ʻokú Ne fie maʻu ke nau foki mai ki ʻapi.”²

Naʻe akoʻi ʻe Palesiteni Siosefa F. Sāmita (1838–1918), “Tatau ai pē pe ko e hā ha lahi ʻo e hē [ʻa hoʻo fānaú], … ko e taimi te ke lea ai kiate kinautolú, ʻoua naʻa fai ia ʻi he ʻita, ʻoua naʻa fai ia ʻi he fakapuhopuhaʻa, pe ʻi he laumālie ʻo e tukuakiʻi.” “Lea kiate kinautolu ʻi he manavaʻofa.”³

Ne toe fakaongo mai ʻe ʻEletā Pelenite H. Nilasoni ʻo e Kau Fitungofulú, ʻa e fakahinohino ʻa e Fakamoʻuí kiate kinautolu ʻoku nau maʻu ʻa e konga siliva ʻe hongofulú pea mole ʻa e tahá: “Kumi pē ki ai kae ʻoua leva kuo maʻu ia. Kapau ko e tokotaha ʻoku hē pe molé ko hao foha pe ʻofefine, tokoua pe tuofefine, … ka hili ʻa e meʻa kotoa pē te tau lava ʻo faí, te tau kei ʻofa pē he tokotaha ko iá ʻaki hotau lotó kotoa. …

ʻOfa pē ke ta maʻu ʻa e fakahā ke ʻiloʻi ʻa e founga lelei taha ke tau tokoniʻi ai ʻa e niʻihi ʻoku ʻauhē ʻi heʻetau moʻuí, pea mo e taimi ʻe fie maʻu ai, ke tau maʻu ai e faʻa kātaki mo e ʻofa ʻetau Tamai Hēvaní pea mo Hono ʻAlo ko Sīsū Kalaisí, ʻi heʻetau ʻofa, fakaongoongo, pea mo tatali ki he foha maumau koloá.”⁴

Naʻe pehē ʻe Palesiteni Henelī B. ʻAealingi, ko e Tokoni ʻUluaki ʻi he Kau Palesitenisī ʻUluakí: “Kuó u ʻosi lotu ʻi he tui ke feinga mo ongoʻi ʻe ha taha naʻá ku ʻofa ai, ʻa e mālohi ʻo e Fakaleleí. Kuó u ʻosi lotu ʻi he tui ke tokonia kinautolu ʻe ha kau ʻāngelo ko e tangata, pea naʻe hoko ia.

“Kuo ʻosi fokotuʻutuʻu ʻe he ʻOtuá ha ngaahi founga ke fakahaofi ai ʻEne fānaú takitaha.”⁵

Ngaahi Potu-folofola mo e Fakamatala Makehe

Mātiu 18:12; ʻAlamā 31:35; 3 Nīfai 13:32; T&F 121:41–42;

reliefsociety.lds.org

Relief Society seal — Tui Fāmili Fakafiemālie