O Upumoni e Lima na Fesoasoani e Tuu Mea ua Tuanai i se Vaaiga Talafeagai
O le malamalama i lo tatou talafaasolopito e aofia ai se faagasologa o le aoaoina ma le iloaina lena e mafai ona faamalolosia ai a tatou molimau, fesoasoani e puipuia ai mai le le mautonu, faamatala mai tala e sili ona manaia, iloatino ai aoaoga faavae moni, ma faaalualu ai i luma o tatou manatu. Ae, a aunoa ma le vaaiga talafeagai, e mafai ona avea mea ua tuanai ma se puna o le le mautonu lea e faaitiitia ai le molimau ma fatuina ai le masalosalo.
O nei mataupu faavae e lima mai ia Keith Erekson, faatonu o le Potutusi o Talafaasolopito o le Ekalesia, e mafai ona fesoasoani ia i tatou ia malamalama i mea ua tuanai.
1. Ua le o toe i ai ni mea ua tuanai—ua na o ni fasi vaega o loo totoe. Mai la tatou vaaiga i le taimi nei, ua tele lava ina le toe i ai ni mea o le vaitaimi ua tuanai. Ae peitai, o loo i ai pea ni fasi vaega o mea ua tuanai. E ao ona tatou suesue i faamaumauga o loo i ai ae ia manatua e le o i ai uma mea ua tuanai.
2. E le tautatala mea moni, ae o tagata faamatala tala. Talu ai e le atoatoa vaega o loo i ai o mea ua tuanai, ua taumafai ai nisi o tagata e sosoo ia vaega e faamatala ai se tala. E ao ona tatou mafaufau ma le faaeteete i taimi uma po o ai o loo faamatalaina ia tala, po o faapefea ona latou faamatalaina, ma aisea ua latou faamatalaina ai.
3. O mea ua tuanai e ese mai i mea i le taimi nei (ma e le afaina lena mea). A o tatou saili ia malamalama i fasi vaega o mea ua tuanai ma tala na faamatala e uiga i ai, tatou te iloa ai o vaaiga ua tuanai e ese mai o tatou vaaiga. O tulaga faaletino uma o aafiaga o le tagata soifua, e suia i le aluga o taimi i auala e laiti ma tetele.
4. O manatu le faavaea i aso nei ua mimilo ai [uiga] o mea ua tuanai. Talu ai o taimi ua tuanai na ese mai i o tatou vaitaimi, o lea e tatau ai ona tatou faaeteete e aua ne’i o tatou faia ni tala le faavaea e uiga i mea ua tuanai e faavae i o tatou manatu ma tulaga faatauaina i le taimi nei. E masani lava, o na mea ua tatou manatu o ni faafitauli i taimi ua tuanai, o le mea moni ua na o ni masalosaloga le lelei na faia i le taimi nei.
5. O le aoaoina o talafaasolopito e manaomia ai le lotomaualalo. Mai la tatou vaaiga i aso nei, e mautinoa lava ua tele atu mea ua tatou iloa nai lo o mea na iloa e i latou na auai e uiga i le taunuuga o le vaitaimi ua mavae, ae e matuai itiiti foi ni mea ua tatou iloa e uiga i o latou aafiaga o le ola ai i na vaitaimi ua mavae. E manaomia le lotomaualalo e faailoa atu ai tatou te le iloa mea uma, ia faatali ma le onosai mo nisi tali, ma faaauau pea ona aoao.