Auala na Tusi ai e se Faifeautalai e Tusiata i le Alatele Lona Faatuatua
Ina ua iu ina ou agavaa e auauna atu i se misiona, sa valaauina a’u e auauna atu i le Misiona a Niu Sila Aukilani, e faaaoga ai le gagana Toga. E ui lava ina o a’u o se tagata Toga, sa ou tauivi ma le gagana Toga. Sa tele ni tala na ou fia fai atu ai, ae ona sa le mafai ona ou tautala i le gagana, o lea sa laiti, faigofie ma le sa’osa’o ai a’u tala
Ou te fiafia i lenei talalelei ma ou te fiafia foi i le tusiata i le alatele, o lea na ou filifili ai e tuufaatasi le lua lea. Sa ou tuuina i totonu ia a’u tusitusiga paia, o se api mo atatosi, o penitala malala, o peni matamea, ma apa vali faapasi. Sa talie au soa ma fesili mai, “O a au mea e fai i apa vali faapasi?” Sa ou fai atu i ai, “Atonu e le’i mafai ona ou tautala i le gagana, ae e mafai ona ou faaali atu i isi la’u molimau.”
Mo le taimi na totoe o la’u misiona, sa ou faaaogaina ai le tusiata i le alatele—i luga o pepa, ae le o fale—faapea ma le Agaga e aoao ai isi e uiga ia Keriso. Atonu o se mea faavalevalea i la outou faalogo, ae na aoga. E toatele tagata sa le’i fia faalogo i la’u savali, o lea na ou tusia ai o se atatosi. Sa matala faitotoa ma loto o tagata ina ua ou ta’u atu ia i latou sa ou faia le tusiata i nofoaga faitele. Latou te le’i talitonu ia te a’u. Sa latou setiina le taimi i le tolu minute, a o ou tositosia le upu faatuatua a o o’u aoaoina i latou e uiga i ai. Sa i ai ia i latou le toatele o e na lagona le faamasinoina ma le le alofaina. E mafai ona ou molimau atu, o le faatuatua ia Keriso e mafai ona tatou lagona ai Lona alofa ma le faamagaloga, ma e mafai ona fesoasoani mai o Ia ia i tatou ia suia mo le lelei sili atu. Sa ia fesoasoani mai ia te au.
O tausaga o sauniuniga mo la’u misiona na mafai ai ona ou maua se molimau i le Togiola a Keriso ma Lona mana, e fesoasoani ou te faatoilalo ai o’u vaivaiga ma faaaoga o’u malosiaga e faasoa atu ai i isi le mea na ou iloa. I le faaiuga, sa aoga lava le fitu tausaga.