F&T ma le Au Peresitene Aoao o le Aualofa
Mai se tusiga o le faamanatuina o le 175 tausaga o le Aualofa.
E faapei le galulue faatasi ai ma perofeta?
Linda K. Burton, Peresitene Aoao o le Aualofa: “E pei lava o Iesu Keriso o se puipuiga mo tamaitai i Ona aso, ua faapea lava i Ona Aposetolo i o tatou aso. O o tatou perofeta e sailiili ma le maeaea i a latou filifiliga, e saili i taimi uma lava manatu ma le malamalama o tamaitai i le Ekalesia. Ou te moomoo i tamaitai uma i le Ekalesia ia mafai ona vaai ma faalogo ma lagonaina le mea matou te oo i ai i a matou fegalegaleaiga ma perofeta, tagatavaai ma talifaaaliga i se tulaga masani.”
E faapefea ona tuufaatasia e le Aualofa tamaitai mai le salafa o le lalolagi?
Carole M. Stephens, Fesoasoani Muamua: “O lo tatou faatuatua i le mana o le taulaga togiola a le Faaola o le mea sili lea e faalotogatasi ai i tatou. O lo tatou alolofa mo lo tatou Tama Faalelagi ma le malamalama e uiga i Lana fuafuaga sili o le fiafia e fusia faatasi ai i tatou a o tatou saili atu i le ola e faavavau. O o tatou uso e nofofua, faaipoipo ma ni fanau, po o le faaipoipo e aunoa ma ni fanau. O loo i ai e ua maliliu a latou tane ma i latou o e ua tatala faaipoipoga. O lo matou faamoemoega ina ia mafai ona matou galulue uma i le lotogatasi ma ia tasi ao matou oo ina malamalama i lo matou faasinomaga, la matou galuega ma lo matou faamoemoega.”
O le a se mea o i ai i le Aualofa e ofoina atu i tamaitai talavou?
Linda S. Reeves, Fesoasoani Lua: “O i tatou uma lava ‘o afafine o lo tatou Tama Faalelagi, e alofa ia i tatou, ma e tatou te alolofa ia te Ia.’ I le Aualofa, e te iloa ai ua sili atu lo tatou tutusa nai lo le tatou eseese. … Ua faauigaina e le lalolagi le taua o tamaitai. O le faatusatusaina o i tatou i mea ua tatou vaai ma faalogo i ai i le lalolagi e mafai ona tatou lagona ai e pei o le mea lea e tatau ona tatou i ai. O lenei e sili atu nai lo se isi lava taimi, tatou te manaomia uma ina ia manatua o lo tatou taua e maua mai i le avea o se afafine o le Atua—e le mai le mea o loo faaalia mai e le lalolagi e tatau ona tatou i ai. O lo tatou malosi e sau mai lo tatou sootaga ma lo tatou Tama oi le Lagi, lo tatou Faaola, ma le tasi ma le isi o ni uso i le talalelei.”
[vitio]