Ngaahi Tefitoʻi Moʻoni ʻo e Faiako ʻAʻahí
Fetuʻutaki mo Ia ʻi ha Faʻahinga Founga, Taimi, pe ha Feituʻu Pē
Ko e faiako ʻaʻahí ko e tokoni. Naʻe tokoni ʻa Sīsū ʻi ha faʻahinga taimi mo ha feituʻu pē. Te tau lava ʻo fai ʻa e meʻa tatau.
ʻOku ʻuhinga ʻa e “tokoní” ke fai ha ngāue, tokangaʻi, pe ha poupou ʻe langomaki ki he fiemālie pe fiefia ʻa ha niʻihi. Ko e faiako ʻaʻahí ʻoku ʻuhinga ia ke ʻiloʻi ha ngaahi founga ke tokoni ai kiate kinautolu ʻoku tau ʻaʻahi ki aí. Naʻe tokoni ʻa Sīsū Kalaisi ki he taha kotoa—ʻi ha faʻahinga taimi pe feituʻu pē. Naʻá Ne fafangaʻi e toko 5,000, fakafiemālieʻi ʻa Mele mo Maʻata ʻi he mālōlō hona tuongaʻané, mo akoʻi ʻEne ongoongoleleí ki he fefine ʻi he vaikelí. Naʻá Ne fakahoko ia koeʻuhí ko ʻEne ʻofa ʻaufuatoó.
Te tau lava ʻi heʻetau muimui ki Heʻene sīpingá, ke ʻilo mo ʻofa ʻi he fefine takitaha ʻoku tau ʻaʻahi ki ai, mo manatuʻi ko e ʻofá ko e fakavaʻe ia ʻo e meʻa kotoa pē ʻoku tau fakahokó. [ʻI he taimi ʻoku tau] lotua ai ha tataki ke ʻilo e founga ke tokoniʻi ai ia mo fakamālohia ʻene tuí, “ʻoku ʻikai lava ke taʻofi e kau ʻāngeló ʻi heʻenau hoko ko [hotau] kaungā ngāué.]”1
Talu mei hono fokotuʻu ʻo e Fineʻofá ʻi he 1842 ʻo aʻu mai ki he ʻahó ni, kuo tokolahi ha kakai kuo faitāpuekina ʻe he ngāue tokoni ʻa e kau fafiné. Hangē ko ʻení, ko Sōana Sionisoní ko ha uitou taʻu 82, ʻoku ʻaʻahi mo hono hoa faiako ʻaʻahí ki hona kaungāʻapi taʻu 89 mo puke ʻi he niumōniá. Ne na fakatokangaʻi ʻoku ʻikai feʻunga ʻena ʻaʻahi tuʻo taha ʻi he māhina ki hona kaungāʻapí, peá na kamata leva ke ʻaʻahi fakauike ʻo na aʻutonu pe telefoni ki ai.
Ki he kau faiako aʻahi kehé, mahalo ko e lelei taha ke fai ki ha fefine he māhina ko iá, ko ha text pe ʻīmeili ʻo fakalotolahiʻi. Ko e ʻēlito ʻo e faiako ʻaʻahí ko e fetuʻutaki fakatāutahá mo e fakafanongo ʻi he loto ʻofá. ʻOku tokoni ʻa e tekinolosia fakaonopōní mo e ʻaʻahi fakahangatonú, ke tau fakahoko ia ʻi ha faʻahinga taimi, feituʻu mo ha founga kehekehe lahi. 2 Ko e tokoni ʻeni hangē ko ia naʻe fai ʻe Sīsuú.
Tuí, Fāmilí, Fakafiemālié