Kae ʻOua Ke Tau Toe Feʻiloaki
Ko e Taumuʻa ʻo e Fakatupú
Mei he “Celestial Marriages and Eternal Families,” Ensign, May 1980, 15–18. Naʻe toki fakatonutonu e sipelá mo e fakaʻilonga leá.
Te tau takitaha lava ʻo ʻai hotau ʻapí ko ha hēvani ʻi māmani.
Tau fakakaukauʻi muʻa … e taumuʻa hono fakatupu ʻo e māmaní. ʻOku fakamahinoʻi ʻe he folofolá naʻe taumuʻa ia ke … ʻi ai ha feituʻu ke nofo ai ʻa e ngaahi foha mo e ngaahi ʻofefine ʻo e ʻOtuá ʻi he moʻui fakamatelié mo fakamoʻoniʻi ai, ʻoku nau taau ʻi hono tauhi ʻo e ngaahi fekaú, ke toe foki ki he ʻao ʻo e ʻOtuá ʻa ia naʻa nau omi mei aí.
Hili hono Fakatupu ʻo e māmaní, “Naʻe folofola ʻa e ʻOtuá, Ke tau ngaohi ʻa e tangatá ʻi hotau tataú, mo hotau angá. …
“Ko ia naʻe ngaohi ʻa e tangatá ʻe he ʻOtuá ʻi Hono tataú, naʻá Ne ngaohi ia ʻi he tatau ʻo e ʻOtuá; naʻá Ne ngaohi ʻa kinaua ko e tangata mo e fefine.
“Pea naʻe tāpuakiʻi ʻa kinaua ʻe he ʻOtuá, pea folofola ʻa e ʻOtuá kiate kinaua, Fanafanau, mo fakatokolahi, mo fakakakai ʻa māmani, pea pule ki ai” (Sēnesi 1:26–28).
Ko e taimi naʻe fakatupu ai ʻe he ʻOtuá ʻa e fefiné mo Ne ʻomi ia ki he tangatá, naʻá Ne folofola:
“Ko ia ʻe tukuange ai ʻe he tangatá ʻa ʻene tamaí mo ʻene faʻeé, kae pīkitai ki hono ʻunohó: pea te na kakano taha pē” (Sēnesi 2:24).
ʻIo, ko e malí naʻe tuʻutuʻuni ʻe he ʻOtuá, pea ʻoku tau maʻu ha toe ngaahi fakamoʻoni fakafolofola ʻi he ʻosi ʻo e ʻuluaki lave ki he husepānití mo e uaifí, naʻe hoko ʻa e kakai tangatá mo e kakai fefiné ko e ngaahi husepāniti mo e ngaahi uaifi ʻi ha ngaahi ouau mali. … ʻOku ʻikai ke tau ʻi hení ke “kai, inu, pea mo fiefia” ʻataʻatā pē (2 Nīfai 28:7). …
ʻOku mahuʻinga ke mahino kiate kitautolu, he ʻoku tau lava ʻo ako mei he folofolá, ko e ʻOtuá ʻoku taʻengata, ko ʻEne ngaahi fakatupú ʻoku taʻengata, pea ko ʻEne ngaahi moʻoní ʻoku taʻengata. Ko ia, ko e taimi naʻá Ne foaki ai ʻa ʻIvi kia ʻAtama ʻi he malí, ʻe taʻengata ʻa e fakatahaʻi ko iá. …
… Ko e taimi ʻoku mahino ai ki he mātuʻá ʻa e taumuʻa ʻo ʻenau moʻuí, ko e fānau fakalaumālie moʻoni kinautolu ʻenau Tamai ʻi he Langí pea ʻoku ʻi ai honau fatongia ke faʻu ha sino maʻá e niʻihi kehé, ʻoku nau toki fiefia leva ʻi he mana ʻo e fanauʻí ʻi heʻenau ʻiloʻi ʻoku nau kaungā-ngāue mo e ʻOtuá ʻi he fakatupu ʻo e fānau takitaha ki he ʻapi ko iá. …
ʻOku ou ʻiloʻi ʻe lava ke tau takitaha ngaohi hotau ʻapí ke hoko ko ha hēvani ʻi māmani ʻo fakafou ʻi he ongoongolelei ʻo Sīsū Kalaisí pea mo hono tauhi ʻo e ngaahi fekau ʻa e ʻOtuá mo e ngaahi fuakava ʻoku tau fai mo Iá, lolotonga ʻetau teuteuʻi kitautolu mo ʻetau fānaú ke tau toe foki hake ki heʻetau Tamai Hēvaní.