Fakafaingofuaʻi ʻa e Efiafi Temipalé: Ngaahi Tokoni ʻe 6 ke Fakafaingofuaʻi ʻa e ʻAʻahi ki he Temipalé
ʻOku laui miliona ha ngaahi meʻa te ne lava ʻo taʻofi koe mei hoʻo ʻalu ki he temipalé. Ko e ʻai ko ia ha tohi māhina hangē ko ʻení ko ha taha pē ia ʻo e ngaahi founga ke fakafaingofuaʻi ʻa hoʻo ʻalú, ne mau fakatahatahaʻi mai hili haʻamau kole atu ke ʻomi hoʻo ngaahi fakakaukaú ʻi he Facebook. ʻE lava ke tokoni atu e ngaahi fakakaukau ko ʻení ke ke maʻu ʻa e ngaahi tāpuaki ʻo e ʻalu maʻu pē ki he temipalé, ʻo tatau ai pē pe ʻokú ke tuku ha taimi makehe mei hoʻo femoʻuekiná ke ke ʻalu tokotaha pe mo hao kaungāmeʻa ke ʻoua naʻá ne ʻalu tokotaha.
Maʻá e Ngaahi Fāmili ʻoku ʻi ai ʻenau Fānau Īkí
Fakahoko ha efiafi teiti ʻi he temipalé. Fakafetongi ha taha ʻo hoʻo ngaahi efiafi teití ʻaki haʻamo ʻaʻahi ki he temipalé. Ko e hā pē ʻa e palani ʻokú ke faʻa fakahoko ki hono tokangaekina e fānaú ʻi he taimi ʻokú ke ʻalu ai mo hoʻo hoá ʻo teití, ʻe lava ke kei fakahoko pē meʻa tatau ka mo ʻalu ʻo seisini ʻi he temipalé kae ʻikai ko e kai efiafi mo e sio faiva. Te ke kei lava pē mo ho hoá ʻo maʻu ha taimi lelei ke mo feohi, ka ʻoku tānaki siʻi atu ki ai ʻa e tāpuaki ʻo e ʻalu ki he temipalé.
Fakafetongi kauleka: Kumi ha fāmili ʻe taha ʻoku nau loto ke fakataimi-tēpileʻi ha taimi ke vaʻinga ai hoʻomo fānaú lolotonga hoʻo ʻalu ki he temipalé; pea fakafetongi ʻo fakahoko pē ʻa e meʻa tatau maʻanautolu.
Kaimeʻakai & Vaʻinga: Hangē ko e fāmili ko ia ʻi he talanoa “Ko ha Tāpuaki kuo Talaʻofa Mai ʻi hoʻo ʻAlu ki he Temipalé,” ʻa ia ko ha ʻeveʻeva ʻaho ʻe taha pe fakaʻosinga ʻo e uiké. ʻAve ʻa e fāmilí kotoa; ʻalu ha taha ʻo e ongomātuʻá ʻo sēsini kae ʻave leva ʻe he taha e kauleká ʻo kaimeʻakai pe ko ha maʻu meʻatokoni pe kai maʻamaʻa. Pea ʻalu leva e tahá ʻo sēsini kae ʻalu leva ʻa e tahá ʻo ʻave ʻa e kauleká ke nau vaʻinga ʻi he paʻaké pe lue takai holo ʻi he kelekele ʻo e temipalé.
Maʻá e Taha Kotoa
Taimi Makehe: Kapau ʻoku malava, pea tauhi maʻu pē ha taimi-tēpile ke ʻaʻahi ki he temipalé (fakauike, māhina, taʻu). ʻE hanga ʻe hoʻo ʻalu maʻu peé ʻo ʻai ke ke lava ʻo palani ki ai pea ʻe tokoni ia ke fakamuʻomuʻa hoʻo ʻalu ki he temipalé.
Tukupā: Tuku ha taimi pea fakatukupaaʻi koe ke ke muimui ki ai. Kapau ʻoku faingataʻa ke tuku ha taimi, ʻahiʻahiʻi ʻa e taimi pongipongí; ko e taimi lahi ʻoku ʻikai faʻa femoʻuekina e temipalé ia he pongipongí.
Kumi ha taha ke mo kaungā ʻalu: Kapau ʻoku fiu feingaʻi ke ke ʻalu ʻiate koe pē ki he temipalé, kumi hao kaungāmeʻa ke mo kaungā-ʻalu! ʻOua te ke ilifia ke fetuʻutaki ki he ongo faiako fakaʻapí, faiako ʻaʻahí, pe ko ha mēmipa kehe ʻo e uōtí ʻo kole ange ke mo kaungā ʻalu ki he temipalé.