Ko ʻEtau Tafaʻakí
Naʻá ku Fakaʻaongaʻi ʻEku Tuí
Tā fakatātaaʻi ʻe David Malan
Naʻe taʻofi ʻeku vaʻinga pingipongo mo hoku kaungāmeʻa ko ʻEfilií ʻe ha tukituki ʻe tolu ne fai ʻi hono matapā muʻá. Naʻá ku fanongo ki ha leʻo foʻou naʻe ongo faikehe he lea faka-Hilikeinoní, ko ʻemau lea fakafonuá.
Ne lele atu ʻa ʻEfilī ki he matapaá, he naʻe ʻamanaki ki ai. Naʻe pehē mai kia au, “Haʻu!” “ʻOku ou loto ke ke feʻiloaki mo hoku ongo kaungāmeʻá!”
Naʻá na sote hina mo hēkesi pea ne na ō mai ke akoʻi e tokoua siʻi ʻo ʻEfilií ke teuteu ki he papitaisó. Naʻá ku lea faka-Pilitānia ange, pea naʻá na ʻohovale ʻo na kole mai pe teu fie fakatonulea he lolotonga ʻo ʻenau talanoa mo e tokoua ʻo ʻEfilií.
Naʻá ku fakakaukau au ko hoku fatongiá pē ke hoko ko e fakatonulea. Ka naʻá ku iku ʻo kau atu ʻi he ongo ki hoku lotó ʻena ngaahi leá. Naʻá ku maʻu ha ongo ʻoku ʻikai ke lava ʻo fakamatalaʻi, ko ha ongo fiefia naʻe toka fuoloa, kuo teʻeki ai ke u maʻu ki muʻa.
Naʻá ku kole ki he ongo faifekaú ʻi he hili ʻa e meʻa naʻe hokó, ke na akoʻi hoku fāmilí. Ka ʻi he taimi naʻá na ō ange aí, naʻe fakahā ʻe heʻeku ongomātuʻá he ʻikai ha taha ia ʻi homau fāmilí ʻe Siasi.
Naʻá ku loto ke papitaiso, peá u fakaʻaongaʻi leva ʻeku tuí. Naʻá ku ʻaukai mo lotu. Naʻá ku feinga ke hoko ko ha faʻifaʻitakiʻanga kiate kinautolu.
Hili ha taʻu ʻe ua, naʻe fāifai pea fakamolū e loto ʻo ʻeku tangataʻeikí ʻo fakamoʻoni he tohi ʻoku loto ki hoku papitaisó ʻi he tui mo e poupou ʻofa ʻa e Tamai Hēvaní. ʻOku ou fiefia ke pehē ko ʻeku koloa mahuʻinga tahá ʻa ʻeku fakamoʻoni ki he ongoongolelei kuo fakafoki maí.
Arnel M., Negro Occidental, ʻOtu Filipainí
Mei he Palaimelí ki he Kau Finemuí
Naʻá ku pehē maʻu pē ʻoku faingataʻa ke liliu ki ha tūkunga foʻou. Ko e ʻuhinga ia naʻá ku tailiili ai ke hiki mei he Palaimelí ki he Kau Finemuí. Naʻe faikehe e taimi-tēpilé kiate au ʻi he kamataʻangá. Naʻe mātuʻaki kehe ʻaupito e ʻātaki ʻo e Kau Finemuí—hala ha taimi hiva, hala ha taimi feʻinasiʻaki. Ne mau lotu Mutuale foki he lolotonga ʻo e uiké.
Ne u fie maʻu pē ke u kau atu mo ongoʻi fiemālie, pea naʻá ku ʻahiʻahiʻi leva ʻeku taimi tēpile foʻoú. Naʻá ku lotu lahi, mo kamata ke anga ki he founga angamahení mo kau fakataha mo e kau finemui kehé.
Naʻe kamata ke u fakatokangaʻi ʻi he fakalau atu ʻa e ngaahi uiké e ʻuhinga naʻá ku kau ai he polokalama ʻa e Kau Finemuí. Naʻá ku ako lahi ange ki he ongoongoleleí, naʻá ku maʻu ha ngaahi faingamālie lahi ange ke maʻu ha kiʻi lelei ʻi he uike takitaha, pea naʻá ku lava ʻo ʻalu ki he temipalé ʻo ongoʻi e Laumālie ʻo e ʻEikí ʻi Hono falé.
ʻOku ou houngaʻia he taimí ni ʻi he Kau Finemuí. ʻOku ou fiefia ʻi heʻeku tuku ange ha faingamālie ki he liliu ko ʻení pea naʻe tokoni ʻeku Tamai Hēvaní ke u fai ia.
Bethany W., Folōlita, USA
Ko e Loto Maʻá: ʻOku Mahuʻinga Ange ia ʻi ha Feʻauhi
Naʻá ku kau ʻi ha kalapu tohi ʻi heʻeku ʻi he kalasi valú. Naʻa mau fakataha he māhina kotoa pē ke aleaʻi ha tohi, pea naʻa mau fai ha feʻauhi ʻi he fakaʻosinga ʻo e taʻú ke sio pe ko e timi ʻa hai naʻe ʻilo lahi taha ki he tohi takitaha. Ko e lao ne mau poupouʻi maʻu peé ke lau pē e ngaahi tohi ʻoku leleí.
ʻI ha māhina ʻe taha, naʻá ku ongoʻi naʻe ʻikai lelei e tohi ne u hoko ki ai hono laú. Ka naʻe fie maʻu ke u lau ia kapau ne u loto ke mālohi ʻeku timí ʻi he feʻauhí. Naʻe ʻikai ke u loto ke nau tōlalo. Hili ha ngaahi vahe, kuo fakaʻau ke toe kovi ange tohí. Fāifai, peá u taʻofi. Naʻá ku ʻilo naʻe ʻikai totonu ke u lau—naʻe mahuʻinga ange ʻeku maʻa fakalaumālié ʻi he ikunaʻi ʻo e feʻauhí.
Ka naʻá ku mātuʻaki hohaʻa ke fakahā ki heʻeku timí. Naʻá ku lotu ki he Tamai Hēvaní ʻi he pō kimuʻa pea fakataha ʻemau kalapú, ke tokoni mai ke u loto toʻa ke fahangahangai mo kinautolu.
Naʻá ku mātuʻaki hohaʻa lahi ʻi he ʻaho hono hokó. Ne u tangutu mo ʻeku timí. Naʻe ʻamanaki ke u fakamatala ki he taha kotoa ʻi he kamata pē ʻa e fakatahá naʻe ʻikai ke u lava ʻo lau e tohí. Ka naʻe tuʻu hake ʻa e takí ʻo kole fakamolemole, ʻoku teʻeki ai ke u lea. Naʻá ne pehē kuo teʻeki ai ke ne lau ʻa e tohí kimuʻa pea toki fokotuʻu ʻi he lisi ʻo ʻemau ngaahi tohí pea ʻikai ke ne ʻilo pea ko e hā naʻe ʻi lotó. Naʻá ne pehē te ne toʻo mei he lisí. Naʻá ku fakamālō ki he Tamai Hēvaní ʻi heʻeku aʻu ki ʻapí.
ʻOku ou ʻilo ko e taimi ʻoku tau tauhi ai ʻetau tuʻunga moʻuí, ʻoku tokangaʻi kitautolu ʻe he ʻEikí. ʻOku ʻikai ke ne tokangaʻi maʻu pē ʻa e tūkungá ʻo hangē ko ia naʻá ne fai maʻakú, ka te Ne foaki maʻu mai pē ha loto toʻa ke tau fai ha ngaahi fili lelei.
Ashleigh A., ʻIutā, USA