Ko Hoku Kaungāʻapi Faikehé
ʻOku nofo ʻa e tokotaha naʻá ne faʻú ʻi Vikatōlia, ʻAositelēlia.
Naʻá ku ʻi he tuʻunga maʻulalo taha ʻo ʻeku moʻuí ka naʻe liliu e meʻa kotoa pē ʻe heʻeku ʻalu mo hoku kaungāʻapí ki he lotú.
Tā fakatātaaʻi ʻe Rafael Mayani
Naʻá ku loto mamahi ʻi he ngaahi taʻu siʻi kuo hilí koeʻuhí he naʻá ku ongoʻi hangē naʻe ʻikai ha taha ke ma talanoá. Naʻe mamaʻo hoku fāmilí pea naʻe ʻikai ke ʻi ai haku ngaahi kaungāmeʻa, pea ʻikai ke u toe mākupusi ai ʻa e fakakaukau ke toe hoko atu e moʻuí.
Naʻá ku nofo mo e tokoua ʻeku fineʻeikí mo hono malí, pea ko e meʻa pē naʻá na talamai ke u faí ke u talanoa mo e kaungāʻapí. Naʻá na pehē ʻoku faikehe, peá na faʻu ha ngaahi talanoa fekauʻaki mo ia ke fakailifiaʻi au mei ai.
Neongo ia, naʻe kole mai mo ha ongo kiʻi tamaiki fefine ʻoku mau taʻu tatau, ʻi ha Tokonaki ʻe taha, ke tokoni ʻi hono ʻai ha ʻā. Naʻá ku loto ki ai pea mau ngāue leva.
Naʻá ku fakatokangaʻi ʻi he hili ʻeku siofi e ongo kiʻi tamaiki fefiné, ko ha ongo tamaiki lelei, pea kamata leva ke mau talanoa, ʻo fakaiku ai ki ha pōtalanoa fekauʻaki mo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe lahi ʻeku ngaahi fehuʻi naʻá na talí. Ne u mālieʻia ai. Naʻe fakaafeʻi au ʻe hoku kaungāʻapí ke mau ō ki he lotú ʻi he ʻaho hono hokó, ke u sio pe te u saiʻia ai. Naʻe tōlalo ʻeku moʻuí, peá u fakakaukau he ʻikai haʻaku meʻa ʻe mole ai.
Naʻá ku ongoʻi ha loto nonga naʻe ʻikai mahino kiate au ʻi heʻeku hū atu ʻi he matapaá ʻi he pongipongi hono hokó, ka naʻá ku ʻiloʻi ko e falé ni ko e feituʻu ia naʻe fie maʻu ke u ʻi aí. Naʻe fakafeʻiloaki au ki ha ongo faifekau ʻi he pongipongi ko iá, pea naʻá ku fakatokangaʻi ʻa e founga ne nau ʻilo ai ʻoku moʻoni ʻa e Siasí.
Naʻe kamata ke u fanongo ki ha ngaahi lēsoni kehekehe mei he ongo faifekaú. Naʻe ʻikai ke u mei lava ʻo kole ki he Tamai Hēvaní ke Ne fekauʻi mai e ongo faifekau ʻofa, tokanga, pea mo fakalaumālie ko iá, ʻi ha taimi ʻe toe lelei ange. Naʻá ku maʻu ʻi heʻena tokoní ʻa e ʻilo naʻá na maʻu ki he ongoongoleleí.
Naʻá ku ongoʻi ʻoku totonu ke u lotu ke ʻiloʻi pe naʻe moʻoni ʻa e meʻa naʻá na lea ʻakí, ʻi he hili ʻeku fanongo ki heʻena vahevahe hono tokoniʻi kinaua ʻe heʻena ʻilo ki he Tamai Hēvaní, ʻi he ngaahi faingataʻá. Naʻá ku ongoʻi ha fiefia, nonga, pea mo ha fiemālie lahi, ʻi he hili ʻeku lotú. Naʻá ku ʻilo kuo maʻu ʻeku talí ʻi he pō ko iá, ʻo fou mai he Laumālie Māʻoniʻoní.
Kuo tupulekina vave ʻeku fakamoʻoní, ʻi heʻeku maʻu ʻa e ʻilo ko ʻení. Kuó u siotonu moʻoni, talu ʻeku kau ki he Siasí ʻi he 2013, ki he ngaahi tāpuaki kuo foaki mai ʻe he ʻilo ʻetau Tamai Hēvaní. ʻOku ou fakamālō ko e ongo faifekau ko iá pea mo hoku kaungāʻapí ʻi hono fakaafeʻi au ke u haʻu kia Kalaisí.