Ko e Ngataʻanga Nai ʻEni ʻo ʻEku Moʻuí?

Samson Ho, Hong Kong, China

Ko ha tamai moʻui lelei au ʻa ha ongo kiʻi tamaiki fakaʻofoʻofa pea mo e husepāniti ki ha uaifi hoihoifua mo ngāue mālohi. Naʻe ʻi ai haʻaku ngāue maʻuʻanga moʻui mo ha vāhenga tuʻu maʻu. Naʻe ngali tokamālie ʻa e moʻuí, ka naʻe kamata ke holofa ia ʻi he taimi naʻe mahino ai ʻoku ou puke he kanisaá (nasopharyngeal), ko ha fokoutua kanisā hāhāmolofia ki he ʻulú mo e kiá.

Naʻá ku lolotonga hoko ko e tokoni ki he pīsopé he taimi ko iá, pea naʻa mau lolotonga fakahoko ʻemau feʻauhi pasiketipolo fakataʻú ʻi he ʻapi siasí ʻi he taimi naʻá ku kamata ongoʻi ai ʻoku ou puke lahí. Naʻá ku ʻalu ke sio ki he toketaá, peá ne talamai ʻi he ʻosi ha ngaahi sivi lahi, ʻoku ou ʻi he tuʻunga fika 4 ʻo e kanisaá. Naʻá ku hohaʻa mo mavasiʻi. Naʻá ku fakakaukau pe ko e ngataʻanga nai ʻeni ʻo ʻeku moʻuí pea ko e hā ʻe hoko ki hoku fāmilí kapau te u mate. Ko e meʻa pē taha te u lava ʻo falala moʻoni ki ai ki ha fakahinohino mo ha fakafiemālié ko ha lotu ki he Tamai Hēvaní.

Hili ha ʻaho ʻe tolu ʻo ʻeku lotu taumaʻú, naʻá ku ongoʻi hangē naʻe fanafana mai ha kihiʻi leʻo siʻi, “ʻOua ʻe manavasiʻi.”

Talu mei ai, mo e ʻikai ke u toe fakakaukau ki he ilifia ke maté. Naʻe kei faingataʻa pē e ngaahi meʻá kiate au. Naʻe ʻi ai ha taimi naʻe ʻikai ke u lava ai ʻo folo ʻa e meʻakaí pea naʻá ku fuʻu puke lahi ke toe mohe, ka naʻe ʻikai ke u teitei foʻi pe tafoki mei he ʻOtuá—pea kuó Ne tāpuakiʻi au.

Kuo laka hake ʻi he taʻu ʻe 18 e mole ʻa e kanisaá. ʻOku ʻikai ke u ʻilo pe ko e hā e fuoloa ʻe tuku mai ʻe he ʻOtuá ke u moʻui aí, ka ʻoku ou fiefia heʻeku lava ʻo tokoni ki hoku ngaahi tokouá mo e tuofāfiné. ʻOku ou ʻiloʻi ʻoku ʻikai teitei tuku pe liʻaki kitautolu heʻetau Tamai Hēvaní. Pea kapau ʻoku tau loto ke maʻu ʻa e ngaahi tāpuakí mei he ʻOtuá, ʻoku ʻikai totonu ke tau liʻaki ia.