Leʻo ʻo e Kau Māʻoniʻoni ʻi he Ngaahi ʻAho Kimui Ní
Tali ki Hoʻomou Ngaahi Fehūfiaʻakí
Tā fakatātā ʻa Allen Garns
Naʻe fakaʻosiʻosi ʻeku ngāue fakafaifekaú ʻi he Misiona ʻIlinoisi Sikākou Sauté, pea ne u maʻu haʻaku ngofua makehe ke u ʻalu ki ha feituʻu ne u ʻi ai kimuʻá ke maʻu meʻatokoni efiafi mo e fāmili Telemiló. Naʻá ku ngāue ʻi ha taʻu kakato ʻe taha ʻi honau uōtí pea naʻa mau vāofi.
Naʻe poupouʻi au ʻe Misa Telemilo lolotonga ʻemau maʻu meʻatokoni efiafí, ke u vahevahe ha pōpoaki fakafiefia ʻe taha ʻi heʻeku fononga foki ki ʻapí. Naʻá ne pehē ʻe tuku mai ʻe he ʻEikí ha taha ʻi heʻeku folaú te ne fie maʻu ʻeku tokoní. Naʻá ku palōmesi ange te u fakahoko ia.
Naʻá ku toe lotu foki ke maʻu ha fakamahino ʻe tali ʻe he ʻEikí ʻeku feilaulau ʻo ngāue fakafaifekaú, ʻo kamata mei he taimi ko iá ʻo aʻu ki heʻeku mavahe mei Sikākoú.
Hili ha uike ʻe tolu mei ai, naʻá ku heka he vakapuna te u foki ai ki ʻapí. ʻI heʻeku ofi atu ki hoku tangutuʻangá, kuo hanga hake taha naʻe tangutu hoku tafaʻakí. Naʻá ne pehē mai, “Mani ē!” “ʻOku ʻikai ke u tui ki ai!”
Ko ʻeku ʻuluaki fakakaukaú pē, “Tāmani, ʻokú ne fehiʻa ʻi he kau Māmongá!” ʻI heʻeku tangutu hifó naʻá ne talamai, ko hono hingoá ko Keli pea ko ha papi ului foʻou ia. Naʻá ne fakahaaʻi ʻene fiefia ʻi he tangutu ofi ange ki ai ha faifekaú. Ne talamai ʻe Keli ko e taha fakamuimui taha naʻá ne tangutu he veʻe tafaʻaki ʻo ha taha naʻe fehiʻa he kau Māmongá pea naʻe ʻikai angaʻofa ʻi heʻene fakamatalaʻi ʻene fakakaukau ki he tui fakalotu foʻou ʻa Kelí. Naʻe puputuʻu ʻa Keli pea ʻi ai haʻane ngaahi fehuʻi. Naʻá ne lotua ha tali mo ha fakafiemālie.
Naʻá ku lotu loto pē mo fakamoʻoni ki he moʻoni ʻo e ongoongoleleí pea mo e ʻofa ʻa e ʻOtuá ki Heʻene fānaú, kau ai mo ia. Naʻá ku talaange ki ai e faleʻi naʻe fai mai ʻe Misa Telemiló. Naʻá ku talange kuo teuteu ʻe he ʻOtuá ʻa e momeniti mahuʻinga ko ʻení maʻana tokotaha pē.
Naʻe fakamālō mai ʻa Keli mo fakatē loʻimata pē. Naʻá ne toe pehē foki, “ʻOku ou lava pē ʻo tala ko ha faifekau lelei koe pea ʻoku tali ʻe he ʻEIkí hoʻo feilaulaú.” Naʻá ku ongoʻi ʻi he momeniti ko iá e ʻofa lahi ʻa e ʻOtuá kiate aú. Ko au leva ne hoko atu e tangí. Naʻá ku fakatē loʻimata mo fakamālō ange kia Keli, ʻi heʻene hoko ko e tali ki heʻeku lotú. Naʻá ku tali mo haʻane toe ngaahi fehuʻi siʻi kehe, peá ma fetongi tuʻasila ʻīmeili. Ne
tūʻuta ʻemau folaú peá ma fepōpoakiʻaki ʻi heʻene lue ki heʻene vaka hokó. Te u fakafetaʻi maʻu pē ʻi he finangalo ʻa e Tamai Hēvaní ke tāpuakiʻi kimaua ʻaki ha ngaahi founga pelepelengesi pehē.