Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko e Tokangaʻi ʻEku Kiʻi Pēpē Puké mo Hoku Uiuiʻí
ʻI he taimi ne ui ai au ko ha tokoni ʻi he houalotu ʻa e Kau Finemuí ʻi hoku uōtí, naʻá ku tali e uí, ka naʻá ku hohaʻa ki he founga ʻe fakahoko aí. Naʻá ku ongoʻi taʻe-mateuteu, pea naʻá ku fekuki mo ha faingataʻa.
ʻI he māhina ʻe tolu kimuʻa pea maʻu e uiuiʻi ko ʻení, naʻe fanauʻi ʻeku kiʻi pēpē tangata ko Nikolasí, hili ia haʻaku feitama faingataʻa. Naʻe fie maʻu ke tokangaʻi fakafaitoʻo maʻu pē ia. Hili ha ngaahi uike siʻi mei hono fāʻeleʻí, kuo ʻasi ha foʻi ʻila lanu kulokula ʻi hono laʻimatá pea kamata ke mafola māmālie. Ne pehē ʻe heʻemau toketaá ko ha foʻi ngungu ka ʻe pulia hili e taʻu taha ʻa Nikolasí. Ka naʻe vave e tupu ʻa e foʻi ngungú. Naʻá ne kāpui hono tamaʻulí pea kapau he ʻikai faitoʻo, te ne uesia ʻene sió.
Ne mau fai leva e fili faingataʻa ke kamata e kimó. Naʻe ʻikai tali ʻe he kiʻi sino vaivai ʻo Nikolasí e faitoʻó. Naʻe mofi fakaʻaho, pala hono sinó, pea tutue. Naʻe tupu he meʻá ni haʻane faʻa tangi lahi. Naʻe fakaʻau ʻo faingataʻa ange ʻaupito ke fakahoko hoku uiuiʻí ʻi he ngaahi tūkungá ni. Naʻe ʻikai ke u ʻilo pe te u lava ʻo fakahoko.
Meʻamālie, he naʻe poupouʻi au ʻe hoku husepānití. Naʻá ma fakatou ongoʻi, ʻoku totonu ke u hoko atu. Naʻe toe tokoniʻi foki au ʻe he palesiteni ʻo e Kau Finemuí. Ko ha fefine faivelenga mo faʻa-kātaki ia. Naʻe tokoni ke u fakatokangaʻi ha ngaahi lelei naʻá ku maʻu pea mo tokoni ke u ʻilo ha ngaahi founga te u lava ai ʻo ngāue, ka naʻe ʻikai ke u fakakaukau ki ai.
Naʻe tokoni ʻeku feohi mo e kau finemuí he uike kotoa peé ke toʻo ʻeku fakakaukaú mei he ngaahi huhu, ngaahi sivi angamahení mo e kau toketaá. Ne taʻofi ai hono fakamoleki noaʻia hoku taimí he fakaʻofaʻia pē ʻiate aú pe fakafehuʻia e ʻuhinga ʻoku hoko ai ʻeni ki heʻeku kiʻi tamá. Ne hoko hoku uiuiʻí ko ha tāpuaki, pea ʻikai hano taimi, kuo tupu ʻa Nikolasi pea fakangata leva ʻa e faitoʻó. Naʻe hoko ʻa Nikolasi ko ha kiʻi tamasiʻi fiefia mo moʻui lelei ne ivi lahi.
Kuo tokoniʻi au ʻe he tokoni ki he ngaahi ʻofefine loto toʻa ko ia ʻetau Tamai Hēvaní ke u ikunaʻi ʻeku ngaahi ongoʻi taʻetāú, pea fakatupulaki ha feongoʻiʻaki fakakaumeʻa taʻengata, ʻilo hoku ngaahi talēnití, pea mo fakalakalaka ʻi hoku ngaahi fatongia ko e faʻē mo e uaifí.
ʻOku ʻikai ke ʻave maʻu pē ʻe he ʻEikí ʻa e ngaahi faingataʻá meiate kitautolu, ka ʻoku ou ʻiloʻi ʻaki hoku lotó kotoa ʻokú Ne finangalo maʻu pē ke tokoni ke tau maʻu ha ivi ke fakafepakiʻi kinautolu.