Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko ʻEku Lotu he Funga Falé
Tā fakatātaaʻi ʻe Carolyn Vibbert
Naʻá ku kaka ʻi ha ʻaho ʻuha ʻe taha he faʻahitaʻu fakatōlaú ki he fata hoku falé ʻo ʻilo ai ha tutulu. Naʻe tafe hifo ʻa e vaí ʻi he muiʻi faʻo ʻo e ʻató ʻi ha vahaʻa ʻo ha ongo foʻi sā. Naʻá ku ʻosi fai ha ngaahi monomono lahi ki hoku ʻapí ʻi he ngaahi taʻu kimuʻá, pea naʻe ʻikai ke u manavasiʻi ke toe ʻahiʻahiʻi ha ngāue foʻou. Ka naʻá ku fehangahangai ʻi he taimi ko ʻení mo ha palopalema fakafoʻituitui ʻo ʻikai ke u loto lahi fēfē. Naʻe ʻikai ke u ongoʻi ne u maʻu ha ivi fakaeloto ke fakaleleiʻi e tutulú, neongo naʻá ku ʻilo ne ʻi ai ha meʻa naʻe fie maʻu ke fai kimuʻa pea hoko mai e faʻahitaʻu momokó.
Hili ha uike ʻe taha pe ua, naʻá ku kaka ki he funga falé mo ha kiʻi hele ngāue, hele tutuʻu, mo ha meʻafana valitā ʻató. Naʻá ku fakakaukau ko e meʻa pē ʻoku fie maʻú ke u kumi ʻa e tupuʻanga ʻo e tutulú pea ʻoposi ʻaki ia e valitā pipikí. Ka naʻe ʻikai ke u teitei ʻiloʻi ʻa e feituʻu ne kamata mei aí. Naʻá ku ongoʻi loto foʻi. Naʻá ku kiʻi mālōlō ʻo fai ha lotu, ʻo kole ki he ʻEikí ke ne tataki au ki he feituʻu totonú ke u lava ʻo fakaleleiʻi e tutulú. Naʻá ku ʻamanaki te ne fakahinohino mai e foʻi feituʻú. Ka, naʻe haʻu ki heʻeku fakakaukaú ha foʻi lea: fakatotoloʻi.
Naʻe ʻikai ko e tali ʻeni naʻá ku fie maʻú, ka naʻá ku kamata ke vakai takai. Naʻe fakamamaʻu hoku matá ki ha fakamanava. Naʻá ku taʻaki leva ha foʻi laʻi ʻato ʻe ua he veʻe fakamanavá ʻo fakatokangaʻi e meʻa naʻe ngali ko e tupuʻanga ia ʻo e tutulú. Naʻá ku tuʻusi leva e konga valitā motuʻa mo pakupakú kae ʻoposi ʻaki ha konga valitā foʻou. Naʻá ku fetongi e ongo laʻi ʻató, pea teʻeki ʻosi ha houa ʻe taha, kuó u fakakakato e ngāué. Naʻe hiki hake hoku loto mamahí, peá u ongoʻi fiefia ʻi he meʻa kuó u fakahoko ke fakaleleiʻi ʻa e palopalemá. ʻI he ʻuha hono hokó, naʻá ku vakaiʻi ʻa e fatá, ka naʻe mātuʻu pē!
Naʻá ku fakakaukau ai kia ʻOliva Kautele, ʻa ia naʻe “ʻikai fakakaukau tuku kehe pē ke kolé” (T&F 9:7). Naʻá ku fakaʻamu au, ʻo tatau mo ia, ke foaki mai pē ʻe he ʻEikí ha tali vave ki heʻeku lotú ʻo ʻikai ke u toe fai ha meʻa. Pea naʻá ku fakakaukau ki he lahi e fiefia hoku lotó ʻi he taimi naʻe pau ai ke u feinga ke “fakakaukauʻí” (T&F 9:8)—ke fakatotoloʻí. Naʻá ku ako ai ʻoku ʻikai fai ʻe he ʻEikí ʻa e meʻa kotoa pē maʻatautolu. ʻE tokoni mo fakahinohinoʻi kitautolu, ka ʻoku toe fie maʻu foki kitautolu ke tau fai e meʻa ʻoku tau lavá, ʻiate kitautolu pē, koeʻuhí he ʻoku tupu ai ha tupulaki fakafoʻituitui.