Rongorongo ni Kairiiri man te Aono
N na Riki Bwa Am Taura
E tabeaianga n tainako te Uea irouia Ana toro ao e a tia ni karaoa ana motinnano nakoia. E karaoi motinnano aikai rinanon Berita.
Nakon Iotua e tua te Uea, “. . . arou ngke I memena iroun Mote, ao ai arou naba ni memena I roum: N na bon aki kakiko, ao N na bon aki kitaniko. Kona korakora ma n ninikoria.”
Nakoia ana utu Riaai ngke a mwananga nakon te aba ni Berita, te Uea e tua, “Ao N na riki naba bwa am taura i nanon te rereua . . . kam na ataia bwa kam kairaki irou.”
Ni bong aikai n Aonon te Betebeke iai Riaai ao Iotua ake a tia n uringa tamaroan te Uea ao kakabwaia ni maiuia n taai akekei ao ngkai. E taekinaki bwa “te ururing bon kanikinaean te kakaitau”. Rinanon nako ara Aono ti a tia ni kaoia taanga ni mitinare aika kaara bwa a na roko ni beku ni mwakoron nako te Betebeke n tabo ake a tabe n rikirake iai te Ekaretia. Irouia naake a tia ni beku ao a teimatoa ni beku, bon aroia ni manga anga nakoia naake a tibwa rairaki nakon te Ekaretia. Taanga aika mitinare bon oin te Ekaretia are e a kaman waakinaki mai i mwaina n ririki aika a bwakanako, ngke mitinare mai Amerika a roko n reireiniia aia bakatibu ake a butimwaea te euangkerio. Nakanne ngaia taan moan rairaki, n te moan tai a aki rang taneiai ma aia aro ae boou, n ai aroia naba membwa ake a tibwa kaina te Ekaretia n tabo ake e a tibwa tabe n rikirake iai te Ekaretia. N te tai aei ti weteia taanga ni mitinare ni boong aikai man katabwenaan te Ekaretia bwa a na roko ni buoka kakorakoraaia tariia ao mwaneia ni karikirakea te Ekaretia. Ni koauana, a “riki bwa taura”. Tamnein te Uea e na kakoaua rinanon aia banna ni katooto, bwa man ana kairi te Uea are a kairaki iai. Ara taanga ni mitinare a buokiia ao a kaota nakoia aron karaoan ao maiuakinan reirein te euangkerio inanon maiuia.
Mitinare aika taanga a karekea te bitaki ngkai a kaoti aia namakin ao a reireiniia membwa n te Ekaretia ma rikirakeia n aron kairan te Taromauri, ao aron karaoan nanon te euangkerio inanon maiuia ni katoa bong. Iai katei nako aika a kakaokoro irouia aomata n tabo aika Papua New Guinea, Toromon, Vanuatu, Mwatiare ao Kiribati. Ara taanga ake a beku a roko mai Samoa ao Tonga, ai aroia naba kain Samoa ao Tonga ake a maeka I Amerika, Nutiran ao Aotiteria. Iai naba tarira mai Papua New Guinea, ma buuna ake a beku.
Iangoa aia koaua taanga ake a tia ni beku, ke n tiku ni beku:
“Ara mition ae uoua ririkina n aban Toromon bon te kabanea n tamaroa are ti a tia ni karekea inanon maiura . . . are e a tia ni buokiia ni karekea kamatoakin ara koaua . . . n ota n ana tangira Tamara are I Karawa ao ara Tia Kamaiu ibukira, ao ni kabane Natina. Ti a tia n namakina te kamarurungaki ao te kakorakoraaki ao ‘n nakonako ao n aki bwaka’. Ti kakoauai kakai ao bain te Uea inanon maiura ma aika a Itiaki n rikiraken te mwakuri”. —Tari Viiga ao Titita Lupe Fuimaono, Pesega Samoa Titeiki
“Ibukin ririki aika a bati, I beku iaan aia kairiiri Titeiki Beretitenti aika a kakaokoro bwa te kiraaka n te Titeiki. Atatai ao taneiai ake I karekei, a tia ni katauraoai ni beku ao n ibuobuoki bwa te Nakoanibonga ao te tia kairiiri ni botaki n te Daru Papua New Guinea Titeiki. Ti iangoa aei bwa te kakabwaia. Te beku ibukin te Uea ma toau n akea tokina Titita Taala, bon te kakabwaia n tainako”. —Tari Lamese ao Titita Loreta Taala, Pago Pago Samoa Maeao Titeiki
“Ara mwakuri ni ibuobuoki i Papua New Guinea e rang n nano iroura, riki ibukin te Tari Jackson, ae bon kain te aba. Ara beku ti tangiria riki n okira PNG n tataekina ana euangkerio are e kaokaki iroun Iesu Kristo nakoia ara utu ao ara aomata. Kabonganaakin arara are ti uouotia n tainako ni katoa bong e anganiira te korakora ae rianako n te Onimaki ao te kantaninga. . . .” —Tari Peter ao Titita Serena Jackson, Eight Mile Plains Titeiki Aotiteria
“Kam rabwa ibukin karokoaia taanga aika rang kakateke bwa a na beku ikai i PNG. E rang korakora aia ibuobuoki ibukin karikirakean te Ekaretia ao kakorakoraia membwa ikai. A beku bwa taan kairiiri, kaunganano, taan kataneiai ao taan Reirei n aia Mwaanga ao n aia uoote. A buokiia naba ara Mitinare n buokiia aika tiaki membwa ao aika membwa aika aki kakaonimaki n kaokiia nakon waaki ni kakukurei aika a bwanin. N tokina, I a noora te rikirake ni mwaitia aika a ira te bootaki n toa. Tititati a ibuobuoki n te Moanrinan, Kairake n Ataeinnaine ao Bootaki n Aine, ni Kakorakoraia bootaki akanne”. —Mition Beretitenti Finau Hafoka, Papua New Guinea Port Moresby Mition
N aia beku, ara mitinare aika taanga a katea te Ekaretia. Bon ngaiia taan ibuobuoki rinanon te Uea ae a uota otan Ana euangkerio nakoia aomata ao te aba. A unikaki koraa inanon nano ao Iango aika tauraoi ni karekei. Ana berita te Uea bon te kakoaua, “E na mena i angataimi ao n angamaingimi, ao Tamneina e na mena inanomi, ao Ana anera a mena i buakomi, n tabeki ngkami rake.”