Ana Iteraniba te Aono
Tibwauaan Rabakauna n te Riki n Toronibwai
E ngae ngke e kaikawaaki n te Katorika, Kabuaa e kaina te Aro ae te Boretetanti ma iroun buuna ngke e mare. Imwiina—inanon 11 te ririki e kaitibo ma kain te aro ae te Koaua, ma e ataia inanona bwa iai te bwai ae kakaawaki ae bua.
N te taina e kaitibo ma mitinare n te LDS (Aika Itiaki ni Boong aika Kaitira) n rianna n te kawai. E kateia ao e kaoia mitinare mwaane bwa a na roko ni kawaria bwa e na ongora taekan aia Ekaretia. E kaonaki n te rau ngke e a ataia bwa ngaia iai te bwai ae e a tia ni bua man maiuna n tamnei . . . bon bwanin ana euangkerio Iesu Kristo—ao ngkai e a reke irouna!
Kabuaa e bwabetitoaki bwa te membwa ngaia n Ana Ekaretia Iesu Kristo ibukiia Aika Itiaki ni Boong aika Kaitira inanon 2000. E tangiria ni kabane natina bwa a na kaina te Ekaretia; ni kukureina ae bati . . . a bane ni kainna!
Kabuaa bon te aine ae korakora ana Onimaki ao e nanomatoa. Ibukin kangaanga ake a roko man te Aoraki ae te tioka, Kabuaa e koreaki waena ma e bon aki katokia man ana waaki ni karaoi bitineti aika uoua ao karaoan nakoana n te Ekaretia—E roko n tabo nako ma okona.
E ngae ngke e mate buuna uoua te ririki n nako, e namakina bwa e rang kakabwaiaki irouia natina niiman aika a ikawai ake a tararuaia. E namakina te kakabwaia bwa e teimatoa ni kona ni kuukana kanana ni mweengana ao n tabetai e katauraoi amwarake aika a onoti man te mai, are e kabonakoa n angiin te tai.
Kabuaa e reke ana tai n ira te kiraati n te riki n Toronibwai are e kairaki man te Ekaretia iaon aron moan waakinan ao karaoan te bitineti ae uarereke. N tekeraoina, e kakabwaiaki bwa iai mwakoron abana ae mena irarikin te kawai iaon Tarawa are e tei iai ana bitineti n iteran te kawai. E moan waakina kateana inanon 2009. Teuana bon te titoa ae uarereke are irarikin te kawai. Are teuana kanga ai aron te tabo ae uarereke are ana taan bobwai, aika mwaane ao aine, a roko mai iaon aba, n uotii bwaai ni Kiribati ake a karaoi ao amwarake nakoina bwa e na kabonakoi—Kabuaa e karakai booia ao e karekea ana raka ngkai a kaboaki bwaai akanne.
E ngae ngke e rotaki n te bubu ni katobibia te titoa ake a mena iai te bwai ni Kiribati, e bon teimatoa n taebubuaki bwa ana akea te bareka. Bwaai ake a kabonakoaki e butimwaai ni karinii ni kabane ni moa man waa aika uarereke ao te Uu ibukin rawean te rabono taian tibuta aika a matamata aika a toka mataia ao—ai bwaai ni katamaroa aika a karaoaki man te buuroo. Aika a kaboaki naba, bon te beneka ae karaoaki man te karewe ae manging—te karewe ae manging ae nneaki n te bwatoro are e kaitiakaki ao e manga kaboakinako are a kabongana kain te aba ni kamaraa iai aia ika.
Boon bwaai a kauarerekeaki n te kabanea ni booraoi; bon tii temanna te tia mwakuri, te manatia n te titoa, ngkai Kabuaa are ngaia ae tararua ana KAB.T Bwain Kiribati titoa. Iai te raitinti n te bitineti ae kabwakaaki ao boon te iti.
Kabuaa e iangoia bwa bon te kakabwaia ae tamaroa te riki n Toronibwai, ao n aron Beretitenti Thomas S. Monson, e nang kukurei n tibwaia ma tabeman, bwai ake e reiakinii.
Ngkai e beku bwa te beretitenti n te Bootaki n Aine e kaitibo n tainako ma aine aika e aki tau aia mwane ke akea aia mwane ake a na kabooi aia bwaai aika a kainnanoi n maiuia. E kakamwakuri ni kaungaiia aine n te Bootaki n Aine bwa a na irii kooti n te riki n Toronibwai are e a tia n iria. E taetae naba nakoia aika tiaki membwa n te komiunitii ao e kaoia aine bwa a na roko ni kaina te kiraati n te LDS riki n Toronibwai. Angiina a bon rang ni mama n te moan tai, ao a mama n ira te kooti, ma e kaungai nanoia Kabua ao ni buokiia bwa ana tokanikai iaon mamaaia ao ni boong aikai a mwaiti aine aika a karekemwane ni buokiia ao ni boutokaiia aia utu.
Kabuaa bon kain Teaoraereke 2nd Uoote.