Ana Iteraniba te Aono
Teuana-imwiin-Teuana
Teuana imwiin teuana Taabia Kabaua e katoai aroka n tebokii inanon ana onnaroka—akea te ooti ke te raanga n ran ae karaoaki; e kakoaua raoi bwa ni kabane aroka nako a karekea te ran are a kainnanoia bwa ana rikirake. Buuna Temwarin e aki toki n buokiia n itiia te ran man aia mwanibwa ao e uotia nakon te onaroka inanon te bwaketi ae bubura ae te buraetitiki—karaoana ni kabane e bon rang ni matoatoa.
Akea te ununiki ae bwainaki i Kiribati—bon akea te aba ae tauraoi ibukina ao te aba bon anon te bikebike—are e bon aki tau ibukin kamaiuan aroka ibukin uaanikai ao bukinikai. E ngae ngke amwarake aika boou a uotaki iaon kaibuke, bwaai n aron irikomaiu ao kai n amwarake a kona ni kangaanga rokoia ao n tabetai a bane imwain manga rokon te kaibuke.
Tabeman kain te tabo a uniki kainamwarake aika kain amwarake ni buoka kamwarakeaia aia utu ma tabeman a uniki aika a bon tau ni kabooi nakoia kain te kaawa ake tabeman. Taabia Kabaua e kabooi tabeua ana uaanikai, n ikotaki ma turee ni kabwebwe, man te kiakia ae uarereke, are e katokaaki iaon ana tabo n ana onaroka are e kaitara mwain te kawai. Te tai ni bobwai n te moaningabong ao e toki n te tairiki—tain te aba.
E kararoaia kamea ake aiwa ao ataei ake a takakaro man arokana ni katea ana oo man te karaun are e a tia ni kabonganaki. Rabwan te kaa ake a aki kabonganaki bwa ana bwai n ununiki—ngkana ko maeka n te atimwakoro ae tionako, ko kabonganai bwaai nako ake a tauraoi ake a kona n reke.
Ana onaroka Taabia e aki rang bubura n aia kainibaire kain tinaniku, ma e nakoraoi ibukin unikakin kabiti, tibiniti, bwaukin, tomato, raoki meron, ao uoota meron ao bwaingan.
Taabia ao Temwarin bon kaaro irouia natiia aika 11—ngaia are a taneiai ni mwakuri korakora. irarikin ao i tinanikun aia onaroka iai naba aia beeki ao aia moa.
Inanon tain te Reirei, Taabia bon te tia kamwarake naba n ana Reirei te Ekaretia Moroni High School. E kabonakoi amwarake aika a beebete ma a kamarurung, uoua te tai n te bongina, are e karaoaki man te raiti ao bwain aona n aron te moa, ika ae karewe ni mangiingii ao te tomato ao n tabetai te kaabiti. Ataein te Reirei a kabooi kanaia n tii $1.30. Temwarin e karaoi ana keeke ake e korokorei ao e kabonakoi mwakorokoroia nakoia ataein te reirei.
Te riki n Toronibwai e tangira te tai ae abwabwaki ao te mwakuri korakora, ma Taabia e aki kona ni karaoia n te anga riki teuana, ao e kukurei n reireiniia natina aron te ununiki. E tatangiria naba n ibuobuoki n te Ekaretia ao imwain ae e bitaki te Kooram n te Nakoanibonga ae te Merekitereka n te maungatabu ni kabuta inanon Maati 2018, e riki bwa te kauoman ni kauntira n aia kurubu ibonga aika rietata. Temwarin e a tibwa kamotirawaaki man nakoana te kauoman ni kauntira n ana uoote n te Bootaki n Aine—taanga aikai a ira Eita 2nd Uoote I Tarawa.