Rikaļoor ro Rem̧ool an Rilo̧mo̧o̧r
Jemaron̄ en̄jake lan̄lōn̄ eo ejjeļo̧k jem̧ļo̧kin n̄e ad Rilo̧mo̧o̧r im gospel eo An rej erom̧ ļōmļōm peļaakin ijo jej kalōk mour ko ad ie.
Ejaad ittino ilo bok in Kallim̧ur Mokta ilo Haggeai ej juon kōmeļeļe in juon kurup in armej ro me remaron̄ kar kōjerbal naan in kapilōk eo an Elder Holland. Rej likjab ilo aer kar jab likūt Kraist ilo ioļapļap in mour ko aer im jerbal ko aer. Haggeai ej jin̄n̄aik kōn uno jet pija im naan ko me rej letok kōļmenļo̧kjeņ ilo an kakkōļ armej rein kōn aer amņak wōt ilo m̧ōko m̧ōer rem̧m̧an ijjeļo̧kin aer kalōk tampeļ an Irooj:
“En̄in juon iien n̄an ami jokwe ilo m̧oko im̧wemi me em̧ōj kalbubuki lowaan, ke m̧wiin ej jeepepļo̧k?
“Innām kiiō, āindein an Jeova in inelep ba, Kom̧win kōļmānļo̧kjeņ kōn iaļ ko ami.
“Eļap ami kar ekkat, ak edik ami kar m̧adm̧ōd. Komij m̧ōn̄ā ak jab mat, idaak ak jab booļ, kōņak nuknuk ak jab māāņān, im bōk oņān ami jerbal n̄an likūt wōt ilo pāāk ko rettal.
“Āindein an Jeova in inelep ba, Kom̧win kōļmānļo̧kjeņ kōn iaļ ko ami.”1
Kwoj ke baj iakwe kōmeļeļe kā kōn men ko rewaan me kwoj kaorōki m̧oktata ko me ejjeļo̧k tokjeer ilo mour indeeo ilōn̄ļo̧k men ko an Anij?
Ilo juon iien kweilo̧k in kwojkwoj ikar pād ie, juon mijenede me ej kab rooltok jān mijen ekar kouti juon baba eo me ekar kakaduikļo̧k ļōmņak in ilo jejjet ke ekar ba n̄an ajri ro, “Ta eo jej aikuji ijin ej kadikļo̧k Wi-Fi im kōļapļo̧k Nipai!”
Kōn aō kar jokwe ilo West Africa ium̧win ļalem iiō ko, ikar lo elōn̄ waanjon̄ak ko kōn armej ro rej likūt gospel eo m̧oktata ilo iminene im jab jook kake. Juon waanjon̄ak ej etan juon jikin kōm̧m̧an neen wa im juon jikin pejnej n̄an kōpeļani wheel in wa ko ilo Ghana. Armej eo an pejnej eo ekar likūt etan “Thy Will Alignment.”
Jemaron̄ en̄jake lan̄lōn̄2 eo ejjeļo̧k jem̧ļo̧kin n̄e ad Rilo̧mo̧o̧r im gospel eo An rej erom̧ ļōmļōm peļaakin ijo jej kalōk mour ko ad ie. Mekarta, epidodo an ļōmļōm in erom̧, ijjeļo̧kin, men ko an laļ in, ijo gospel eo ej pād āinwōt ad pepe in kāālōt ak āinwōt pād ilo jikin jar ium̧win ruo awa aolep jabōt. N̄e en̄in ej jekjek eo, ejjeļo̧k oktak n̄e jenkar likūt oņād ilo “pāāk ko rettal.”
Haggeai ej ba n̄an kōj bwe jen wūjlepļo̧k—n̄an erom̧, āinwōt jej ba ilo Australia, “wūjlepļo̧k” kōn mour kōn gospel eo. Armej rej wūjlepļo̧k n̄e rej ba ta eo rej ba kōn er em̧ool.
Ikar ekkatak jidik kōn erom̧ wūjlepļo̧k im kōmaat am̧ ilo iien ikkure rugby. Ikar ekkatak bwe ke ikar ikkure kōn aolepān aō kajoor, ke ikar kōmaat aolepān aō, itok limo eo aō ilo ikkure ekar kanooj ļap.
Iiō in ikkure eo aō em̧m̧an tata ilo rugby kar iiō eo ālkin aō kar high school. Team eo me ikar pād ie rekar jim̧or kanooj kapeel im ļap aer wūjlepļo̧k. Team eo am ekar bōk tūp ilo iiō eo. Ijoke, juon raan kōm kar ikkure ippān juon team rekar lukkuun jemakade, im ālkin ikkure eo kōm kar kajjojo bōk ro jeram n̄an juon eb eļap im ej kōm̧m̧an aolep iiō ilo kaļōj eo am. Ikar ļōmņak bwe kōnke ikkure enaaj kar juon ikkure epidodo, ij aikuj kajjieon̄ kōjparok eō make jān jorrāān bwe in maron̄ lukkuun m̧ōņōņō ilo iien eb eo. Ilo ikkure eo, kōm kar jab lukkun wūjļepļo̧k am ilo kar tekōļ ko repen eo me kōm ej aikuj kar, im kōm kar luuj. Bwe en kar nanaļo̧k wōt, ikar kōjem̧ļo̧k ikkure eo ilo an ebbōj im kilep tiiō ekar jab kakkure paaktokū n̄an iien date eo aō eļap. Bōlen ikar aikuj ekkatak juon men.
Juon bar en̄jake eoktakļo̧k ekar waļo̧k ilo juon bar ikkure tokālik me ikar lukkuun wūjlepeļo̧k aō. Ilo juon tōre ikar ettōr kōn lukkuun kōttōpar ilo juon iien tekōļ; ikar kajju en̄jake metak ilo turin meja. Jema ekar katakin eō bwe ij aikuj jab kōtļo̧k bwe team eo juon en jeļā ke imetak, ikar wōnm̧aanļo̧k wōt im ikkure ilo ikkure eo. Bon̄ōn eo, ke ikar kajjieon̄ m̧ōn̄ā, ikar lo bwe ikar jab maron̄ ikkūk. Jibbon̄ōn eo tok juon, ikar etal n̄an aujpitōļ, ijo X-ray ekar kapene ke at laļ ko aō rekar jorrāān. Lon̄iū ekar kilōk ium̧win jiljino wiik ko tokālik.
Katak ko ikar ekkatak jān bōrabōļ in kōn tiiā eo ebbōj im at laļ eo erub. Kōjekdoon ememļo̧kjeņ ko aō kōn aō kar batur m̧ōn̄ā ko reppen iumin jiljino wiik ko ke ikar m̧ōn̄ā wōt m̧ōn̄ā ko retutu im pidodo, ikar jab ajļo̧k kōn at laļ ko aō me rerub kōnke tōprak eo aō ekar itok jān leļo̧k aolepān aō. Ak ikar ajļo̧k jidik kōn tiiō eo ebbōj kōnke ej kōkaļļein aō kar jab wūjlepļo̧k.
Leļo̧k aolepān ad ejjab meļeļein bwe jenaaj wōnm̧aanļo̧k wōt ilo ad jepooļ kōn kōjeraam̧m̧an ko ak aolep iien ewōr tōprak. Ak ej meļeļein bwe jenaaj aolep lan̄lōn̄. Lan̄lōn̄ ejjab en̄jake m̧ōņōņō eo ekadu kitien ak m̧ōņōņō eo me an jidik wōt iien. Lan̄lōn̄ ejjeļo̧k jem̧ļo̧kin im ej bōk jikin kōn kijejeto ko ad me Irooj ej errā kaki.3
Juon waanjon̄ak kōn errā in ij kōnono kake ej kōn bwebwenatoon Oliver Granger. Āinwōt an kar Būreejtōn Boyd K. Packer ba: “Ke rekar kakoik Rikwojarjar ro jān Kirtland, … Oliver ekar pād wōt bwe en wiakake joko jikier kōn jon̄an eo me emaron̄e. Ekar jab lukkuun ļap kōjatdikdik ke emaron̄e kar tōprak. Im, aaet m̧ool, ekar jab tōprak!”4 Kar kappeiki jān Būreejtōnji eo Kein Kajuon n̄an kōm̧m̧ane juon jerbal me epen, n̄e ejjab ban maron̄. Ak Irooj ekar nōbar e ilo utiej kōn jab tōprakin kijejeto ko an ilo naan kein:
Ij keememej karejera Oliver Granger; lo, em̧ool Ij ba n̄an e bwe etan enaaj pād ilo ememej ekwōjarjar jān epepen n̄an epepen, indeeo im indeeo, Irooj ej ba.
“Kōn menin, e en niknik kate kōn lo̧mo̧o̧ren eo an Presidency eo Kein Kajuon an Kabun̄ eo Aō, … im n̄e ej wōtlo̧k enaaj bar jerkak, bwe katok eo an naaj ekwōjarjarļo̧k n̄an eō jān ļapļo̧k eo an, Irooj ej ba.”5
Menin emaron̄ m̧ool ippād wōj—ejjab kōn tōprak ko ad ak ijjeļo̧kin kōn wūjlepļo̧k im kijejeto ko me eļap tokjeer n̄an Irooj.
Bar juon waanjon̄ak kōn rikaļoor ro rem̧ool an Jisōs Kraist ej juon eo m̧ōttad ejitenbōro ilo Côte d’Ivoire ilo West Africa. Sister in em̧m̧an im eniknik ekar en̄taan kōn kōļmānļo̧kjeņ, im bar jet kōwaan ko renana, ilo ānbwin, jān ļeo pāleen ium̧win juon tōre aeitok, im āliktata rekar jepel. Ekar jab ebbweer kōn tōmak eo an im em̧m̧an eo an, ak kōn an lāj n̄an e, ekar lukkuun metak ium̧win juon tōre eaitok. Ilo naan ko an make, ekar kōmeļeļeiki ta eo ekar waļo̧k:
“Men̄e ij ba ikar jeorļo̧k an bōd, aolep iien ikar kiki kōn kinej; ikar mour aolep raan kōn kinej. Ekar āinwōt juon metak ilo buruō. Elōn̄ kōttan ij jar n̄an Irooj n̄an joļo̧k en̄jake in jān eō, ak ekar lukkuun ļap an metak jon̄an ikar lukkuun tōmak bwe in kar mour kake ilo aolepān tōre in aō mour. Ekar ļapļo̧k an metak jān tōre eo ej jako jinō ke ikar dik wōt; ekar ļapļo̧k an metak jān tōre eo ej jako jema im barāinwōt ļaddik eo nejū. Ekar āinwōt ke ekar erakrak im penej buruō, letok n̄an eō ļōmņak in ke ij pojen jako jabdewōt iien.
“Jet iien ko jet ikar kajjitōkin eō make ta eo Rilo̧mo̧o̧r enaaj kar kōm̧m̧ane ilo jekjek in ipād ie, im inaaj aikuj kar ba, ‘Ekanooj in eddo menin, Irooj.’
Innem juon jibbon̄ ikar kappukot metak ko me rej itok jān menin ilo buruō im lalļo̧k n̄an m̧wūlaļ in, kappukote ilo jetōb eo aō. Ekar ejjeļo̧k jikin ikar loi ie. Kōļmānļo̧kjeņ eo aō ekar m̧ōkaj an etale aolep un ko ikar aikuj [kar] en̄jake metak, ak ikar jab en̄jake metak. Ikar kōttar aolepān raan eo n̄an lale eļan̄n̄e inaaj kar en̄jake metak in ilo buruō; ikar jab en̄jake. Innām ikar bukwelōlō im kam̧m̧oolol Anij kōn an kar kōm̧m̧an bwe pinmuur eo an Irooj en kūrm̧ool ilo n̄a.”6
Sister in kiiō ej m̧ōņōņō im em̧ōj an liāp ippān juon em̧m̧aan eo em̧m̧an im etiljek eo me ej iakwe e ilo m̧ool.
Kōn menin, m̧wil ta ko m̧wilid me remenin aikuj eļan̄n̄e jej rikaļoor ro rem̧ool an Kraist? Im ta eo tokjen gospel eo n̄an kōj n̄e jej kōm̧m̧an “kajekdoon iaļ ko [ad],” āinwōt an Haggai ba?
Em̧m̧an ippa waanjon̄ak eo kōn m̧wil eo ejim̧we me kar kwaļo̧k jān jemān Kiin̄ Lamonai. Kwonaaj keememej jinoin an kar illu ke ej jeļā bwe ļaddik eo nejin ej m̧ōttaik Ammōn, juon riNipai—armej ro me RiLeman ro rej kōjdat er. Ekar jibwe lōn̄tak jāje eo an bwe en ire ippān Ammōn im ekar ilbōk ke jāje eo an Ammōn ej pād buruōn. “Kiiō kiin̄ eo, kōnke eaar mijak n̄e naaj kar bōk mour eo an, eba: Eļan̄n̄e kwōnaaj dāpij mour eo aō inaaj lewōj n̄an eok jabdewōt kwōnaaj kajjitōk, em̧ool n̄an jimattan in aelōn̄ in.”7
Kile kajjitōk eo an—jimettan in aelōn̄ eo an kōn mour eo an.
Ak tokālik, ālkin an meļeļe kōn gospel eo, ekar bar kōm̧m̧an juon an kajjitōk. “Kiin̄ eo eba: Ta inaaj kōm̧m̧ane bwe in maron̄ bōk mour indeeo in eo kwaar kōnono kake? Aaet, ta inaaj kōm̧m̧ane bwe in maron̄ ļotak ilo Anij, im jloļo̧k jetōb nana in ekōlibaakļo̧k ilo ānbwinnū, im bōk Jetōb eo An, bwe in maron̄ obrak kōn lan̄lōn̄, bwe maron̄ in jamin joļo̧k eō ilo raan eo āliktata? Lo, eba, inaaj juļo̧k aolep m̧weiuk ko aō, aaet, inaaj eļļo̧k jān aelōn̄ in kiin̄ eo aō, bwe in maron̄ bōk lan̄lōn̄ in eļap.”8
Iien in, ekar kōpopo bwe en aje aolepān aelōn̄ in eo an, kōnke gospel in eļapļo̧k tokjen jān aolep men ko ewōr ippān. Ekar wūjlepļo̧k ad kōn gospel eo.
Kōn menin, kajjitōk eo n̄an kōj kajjojo ej, jej ke bar wūjlepļo̧k ad kōn gospel eo? Kōnke utiej bōro jejjab wūjlepļo̧k! Im Anij ejjab juon eo ej lutokleplep nōbar n̄e kwoj māāņān jidik.9
Ejjeļo̧k men ettino, ak jabdewōt itok limo, ak jabdewōt taitōļ, ak jabdewōt social media, ak jabdewōt video game ko, ak jabdewōt ikkure, ak jabdewōt iaiao kōn kam̧ōņōņō ko, ak jabdewōt men ioon laļ in me eļapļo̧k an aorōk jān mour indeeo. Kōn menin kapilōk eo an Irooj n̄an aolep armej ej “kōļmānļo̧kjeņ kōn iaļ ko am̧.”
En̄jake ko aō relukkun waļo̧k ilo naan ko an Nipai: “Ij m̧ōņōņō ilo alikkar; ij m̧ōņōņō ilo m̧ool; ij m̧ōņōņō ilo aō Jisōs, bwe Eaar lo̧mo̧o̧ren aō jān hell.”10
Jej ke rikaļoor ro rem̧ool An eo Ekar letok aolepān An n̄an kōj? E eo ej make wōt im ad Rijojomar ippān Jemān. E eo ekar Make lukkuun wūjlepļo̧k ilo Katok in Pinmuur eo An im kiiō ilo iakwe eo An, An tūriam̧o̧, im An ikdeleel n̄an kōj ej n̄an bōk lan̄lōn̄ indeeo? Ij akweļap n̄an aolep ro rej ron̄jake im riiti naan kein: Jouj, jouj im jab kōjejtokjen aolepān wūjlepļo̧k ko am̧ m̧ae iien kotōpar juon iien me kojaje kake, iien ko ilju im jekļaj. Kwon wūjlepļo̧k am̧ kiiō im en̄jake lan̄lōn̄! Ilo etan Jisōs Kraist, Amen.