Jeļā, Iakwe, im Eddōkļo̧k
Jen aolep itok n̄an meļeļe ijo koņaad ilo jerbal in karejar in eļap bwe jen erom̧ eļapļo̧k āinwōt E.
Ilo 2016 Tabernacle Kuwaer eo ilo Temple Square raar itok im lotok Netherland im Belgium. Im kōnke iaar bōk koņaaō ilo m̧akūtkūt in em̧m̧an, ekar wōr aō iien n̄an alooje kalojooj in aer ruo kōttan.
Ilo iien kalojooj eo aer iaar ļōmņak kōn kijejeto in eļap ilo aer kōm̧akūt tok kuwaer in eļap kōn jon̄an lōn̄ in uwaer. Ekar itok limoū kōn kein kōjan̄jan̄ gong kileplep eo, eo ekar pen im ļap wōņāān n̄an jilkinto jilkintak ejjab āinwōt violin, trumpet, ak kōjanjan̄ ko jet im epidodo inneeki. Ak ļōmņake jon̄an aer lukkun kōjerbale gong in, ikar kile ke jidik wōt iien aer kōjerbale, ak ejjab āinwōt kein kōjan̄jan̄ ko jet reddikļo̧k emakijkij kōjerbali ilo iien kalojooj eo. Iaar kōļmenļo̧kjeņ bwe n̄e ejjab ainikien kein kōjan̄jan̄ gong eo, iien kalojooj eo aer eban kar āindein im barāinwōt kijejeto eo aer n̄an jilkinļo̧k kein kōjan̄jan̄ gong kileplep eo n̄an kijo̧o̧ne lom̧aļo.
Jet iien jemaron̄ en̄jake ke jej, āinwōt kein kōjan̄jan̄ gong kileplep eo, ebwe ijo koņaan n̄an kōjan̄jan̄ ilo iien kalojooj eo. Ak kōtļo̧k bwe in ba n̄an kom̧ ke ainikiōmi ej kōm̧m̧an eļap oktak.
Jej aikuji aolep kain kein kōjan̄jan̄ ko. Jet iaad epidodo aer ekkatak im em̧m̧an aer katak ilo jikuuļ, ilo an ro jet wōr aer tōļan ilo jerbal in art. Jet ripija ak rijin̄n̄a im ri ekkaļ ak nōōj, rej kōjparok, ak katakin ro jet. Aolep eddo kein reoktaktak eļap aikuji n̄an boktok jeļā im itok limo im aorōkier n̄an laļ in.
N̄an ro rej en̄̄jake ke ejjeļo̧k koņaer ak tōmak ke rej jab aorōk ak jejtokjeir n̄an ro jet, n̄an ro jet remaron̄ en̄jake ke rej pād ilōn̄ tata ak eļap tokjeer ilo laļ in, im jabdewōt ej pād ikōtaan en̄̄jake kein ruo, ikōņaan kōnono n̄an kom̧ ennaan in.
Jekdo̧o̧n ia eo kwoj pād ie ilo iaļ eo an mour in, jet iami remaron̄ en̄jake eļap eddo im ekōm̧m̧an bwe kwon ļōmņak ejjeļo̧k tokjōm̧ ilo iaļ in. Ikōņaan karuwaineneik eok n̄an diwōjtok jān marok n̄an ilowaan meram eo. Meram eo an gospel in enaaj lewaj okmānāān im kōmour im enaaj jipan̄ eok meļeļe lukkuun wōn kwe im unin am̧ pād ilo mour in.
Jet iaad em̧ōj aer kar ito itak ilo iaļ ko rem̧o̧, n̄an kajjeon̄ pukot m̧ōņōņō ie.
Em̧ōj karuwaineneik kōj jān eo ej iakwe kōj, Jemedwōj Ilan̄, n̄an etetal ilo iaļ eo an rikaļoor im jepļaakļo̧k n̄an Ippān. Ej iakwe kōj kōn juon iakwe ewāppen.1
Ta iaļ eo? Iaļ eo ej n̄an jipan̄ doon meļeļe wōn kōj ilo ad jerbal in karejar n̄an doon.
N̄an n̄a, jerbal in karejar ej kwaļo̧k ļo̧k iakwe eo ekwojarjar.2 Im ilo wāween in jej ejaake juon mejatoto ijo jim̧or rileļo̧k im ribbōke rej jim̧or ikdeleel n̄an ukweļo̧k. Ilo bar juon wāween, jej ukot iaļ ko im itok im kepaakeļo̧k im erom̧ āinwōt ad Rilo̧mo̧o̧r, Jisōs Kraist.
N̄an waanjon̄ok, ejjab menin aikuj ba aolep iien n̄an ro pāleed ak ro nejid aolep ta eo rej aikuj em̧m̧an ļo̧k ie; rejjeļā menin kadede. Ej n̄an ejaake juon mejatoto in iakwe bwe ren kajoorļo̧k n̄an kōm̧m̧an oktak ko remenin aikuj ilo mour ko aer im erom̧ armej ro rem̧m̧anļo̧k.
Ilo wāween ukweļo̧k in ej erom̧ juon jerbal in kōkōm̧anm̧anļo̧k aolep raan im emaron̄ koba joļo̧k bōd kōn likjab ilo m̧wil in m̧akūtkūt. Ij keememej im ij ioone wōt jekjek ko ijo me em̧ōkaj aō ekajet ak erum̧wij aō ron̄jake. Im ilo jemļo̧kin juon raan ilo jar ko aō make, n̄aij en̄jake iakwe in kōkapilōklōk jān lan̄ n̄an ukweļo̧k im erom̧ em̧m̧anļo̧k. Mejatoto in iakwe eo ekar jino ejaak jān m̧am̧a im baba ro, brother eo aō, im sister ro im tokālik jān kōrā eo pāleeō, ajri ro, im ro m̧ōtta em̧ōj aer jipan̄ eō n̄an erom̧ juon armej eo em̧m̧anļo̧k.
Jej aolep jeļā ia eo jej aikuj kōm̧m̧an emmanļo̧k ie. Ejjeļo̧k unin n̄an ālij im kakeememej doon, ak ewōr aikuj n̄an iakwe im jerbal in karejar n̄an doon im, ilo kōm̧m̧an āindein, ej boktok mejatoto in itok limo n̄an oktak.
Ilo ejja mejatoto in wōt, jej ekkatak wōn lukkuun kōj im naaj ta eddo ko ad ilo raan ko āliktata ilo bwebwenato ko an laļ in m̧okta jān Itok eo Kein Karuo an Rilo̧mo̧o̧r.
Eļan̄n̄e kwoj kōļmenļo̧kjeņ kōn ijo koņaam̧, ikōņaan karuwaineneik eok n̄an pukot juon jikin komaron̄ make ie im kajjitōk ippān Jemedwōj Ilan̄ bwe en kwaļo̧k n̄an kwe ewi ijo koņaam̧ n̄an kōm̧m̧ane. Uwaak eo emaron̄ itok jidik kōn jidik innem enaaj alikkarļo̧k n̄e jenaaj lukkuun katōt need ilo iaļan bujen eo im iaļan jerbal in karejar eo.
Jej en̄jake jet iaan apan̄ ko me Josep Smith ear iooni ilo an kar pād ilo “ioļapļap in tariņae in naan ko im lim̧otak in ļōmņak.” Ilo ad riit jān bwebwenato eo an make, ekkā an ba n̄an e make: “Ta ej aikuj in kōm̧m̧an? Wōn iaan aolep jar kein rejim̧we; ak, aolepāer wōj im bōd ke? Eļan̄n̄e juon iaer ejim̧we, ewi in iaer, im ewi wāween aō naaj jeļā kake?”3
Ippān jeļāļo̧kjeņ eo ear loe ilo Bok in Jemes, im ej ba āinwot in, “A eļan̄n̄e jabdewōt iaami ej aikuj mālōtlōt, en kajjitōk kōn e ippān Anij, eo Ej wūjlep n̄an armej otemjej, im jab eņo̧uk kake; im Enaaj leļo̧k n̄an e.”4 Josep “etto aō itok n̄an kōttōpar in n̄an ‘kajjitōk ippān Anij.’”5
Jej wōnm̧aanļo̧k wōt im riiti “ekar alen kein kajuon ilo mour eo [an] [eaar] kōm̧m̧ane kōttōpar rot in, bwe ilubwiljin aolep abņōņō ko [an] [Ej] jan̄in kar, m̧oktaļo̧k kōm̧m̧ane juon kōttōpar n̄an jar eļļaaj.”6
Im emaron̄ bar āinwōt n̄an kōj jinoin tata ilo ad kōnnaan n̄an Rikōm̧anm̧an eo ad ilo juon wāween eo im jejjan̄in kar kōm̧m̧ane m̧okta.
Kōn kōttōpar eo an Josep smith, Jemedwōj Ilan̄ im Eo Nejin, Jisōs Kraist, kar waļo̧k n̄an e, kūr kōn et eo etan, im āinwōt juon tōprak ewōr ad jeļā ealikkarļo̧k kōn wōn kōj im bwe elukkun ļap tokjed.
Jej wōnm̧aanļo̧k wōt im riit bwe ilo iiō in jodikdik eo an Josep “kar matōrtōr eō jān aolep ro ren kar [jeran] im [ro rej aikuj kar] jouj n̄an [e].”7 Im kōn menin jemaron̄ kōtmene jet oktak ko ilo ad mour ilo mour in rikaļoor.
Eļan̄n̄e kwoj kiiō en̄jake ke kom̧ ejjab maron̄ in uwaan orchestra eo im iaļ eo n̄an ukweļo̧k epen n̄an kom̧, jouj jeļā bwe n̄e kom̧ naaj pād wōt ie, eddo eo naaj bōk jān aerar im enaaj mera bar juon alen. Jemedwōj Ilan̄ eban iļo̧k jān kōj eļan̄n̄e jej jipadek ļo̧k E. Jemaron̄ wōtļo̧k im bar jerkak, im E enaaj jipan̄ joļo̧k jān an etoon bukwien neer.
Jet iaad rej kinenej, ak nien first-aid eo an Irooj elōn̄ ie tāāp in kinej ebwe jon̄an n̄an pinej aolepān kinej ko ad.
Ejjeļo̧k oktak jān iakwe, kōn iakwe eo ewāppen jej barāinwōt ņa etan iakwe eo em̧ool ak “iakwe eo erreo an Kraist,”8 im jej aikuji ilo mōko im̧ōd ijo jemed im jined rej karejar n̄an ajri ro im ajri ro n̄an ro jemeer im jineer. Kōn iakwe in, bōro ko renaaj oktak im ļap ikdeleel n̄an kōm̧anm̧an ankilaan.
Ej iakwe eo jej aikuji ilo ad kōm̧m̧an n̄an doon āinwōt ajri ro nejin Jemedwōj Ilan̄ im āinwōt ro uwaan Kabun̄ eo An im emaron̄ kōtļo̧k kōj n̄an kobaik aolep kein kōjan̄jan̄ ko ilo orchestra eo ad bwe jen maron̄ kōjan̄jan̄ ilo aibojooj ippān kuwaer in enjeļ ro ilan̄ n̄e Rilo̧mo̧o̧r enaaj bar itok.
Ej iakwe eo in, me ej kōmeram ro rej aikuj romaak im rome peļaakid ilo ad wōnm̧aanļo̧k ilo mour ko ad kajjojo raan. Armej renaaj lo meram eo im raak ļo̧k n̄an e. En̄ ne ej kain jerbal in mijinede rot eo me ej kepaak kōj n̄an ro jet n̄an “itok im loe, itok im jipan̄, im itok im pād wōt.”9 Jouj, n̄e em̧ōj am̧ bōk kam̧ool eo am̧ kōn jerbal in eļap im ijo koņaam̧ n̄an e, kōtļo̧k bwe jen m̧ōņōņō ippān doon ippān rikanaan eo ad jitōn bōro Josep Smith, eo ekar ba, “Bwe iaar lo juon visōn; ikar jeļā, im iaar jeļā bwe Anij ekar jeļā, im iban kar maron̄ kariab e.”10
Ij kam̧ool n̄an kwe ke ijeļā wōn n̄a, im ijeļā wōn bar kwe. Jej aolep ajri ro nejin Jemedwōj Ilan̄ eo ej iakwe kōj. Ekar jab jilkintok kōj n̄an ijin bwe jen likjab ak bwe jen jepļaak ilo aibojooj n̄an Ippān. Bwe jen aolep itok n̄an meļeļe ijo koņaad ilo jerbal in karejar in eļap bwe jen erom̧ eļapļo̧k āinwōt E n̄e Rilo̧mo̧o̧r enaaj bar itok ej jar eo aō in ilo etan Jisōs Kraist, amen.