Lan̄lōn̄ an Armej ro Rekwojarjar
Lan̄lōn̄ ej itok jān kōjparok kien ko an Kraist, maron̄ anjo̧ ioon būrom̧ōj im m̧ōjņo̧, kōn E, im jān jerbal āinwōt An kar jerbal.
Rikanaan Inōs ilo Bok in Mormon, ļeo jibun Liai, ekar je juon en̄jake me eaar waļo̧k ilo mour eo an. Ke ej kakidudu make iaan ibulōn wōjke ko, Inōs eaar jino kōļmenļo̧kjeņ kōn katak ko an jemen, Jekab. Eaar ba, “Naan ko ekkutkut aō kar ron̄ an jema kōnono kōn mour indeeo, im kōn lan̄lōn̄ an ro doon, raar deļo̧n̄e ilo m̧wilaļ in buruō.”1 Kōn ean̄den eo an ilo jetōb, Inōs eaar bukwelōlō ilo jar, juon jar ekabwilōn̄lōn̄ me eaar bōk aolepen raan im bon̄, juon jar me eaar bōktok eļap revelesōn, lōke, im kallim̧ur.
Ekanooj lōn̄ men n̄an ekkatak jān en̄jake eo an Inōs, ak rainin ta eo ejiktok ilo kōļmenļo̧kjeņ eo aō ej an Inōs keememej an kukutkut an jemen kōnono kōn “lan̄lōn̄ eo an ro rekwojarjar.”
Ilo kweilo̧k in jilu iiō remootļo̧k, Būreejtōn Russell M. Nelson eaar kōnono kōn lan̄lōn̄.2 Ilubwiljin men ko jet, eaar ba:
“Mōņōņō eo jej en̄jake edik jetņakin ilo wāween mour ko ad im aolep men otemjej jej kōm̧m̧ani kōn mije mour ko ad.
“N̄e mour ko ad rej pedped wōt ilo karōk in lo̧mo̧o̧r eo an Anij … Jisōs Kraist im gospel eo An, jemaron̄ en̄jake lan̄lōn̄ jekdo̧o̧n ta eo ej waļo̧k—ak ejjab waļo̧k—ilo mour ko ad. Lan̄lōn̄ ej itok jān im kōn E. … N̄an Armej ro Rekwojarjar, Jisōs Kraist ej lan̄lōn̄!”3
Armej ro Rekwojarjar rej ro raar deļo̧n̄e bujen eo an gospel eo ilo peptaij im rej kajjieon̄ ļoor Kraist āinwōt rikaļoor ro An.4 Aaet, “lan̄lōn̄ an ro Rekwojarjar” kōmeļeļeik lan̄lōn̄ eo n̄an erom̧ āinwōt Kraist.
Ikōņaan kōnono kōn lan̄lōn̄ eo ej itok jān kōjparok kien ko An, lan̄lōn̄ eo ej itok n̄an anjo̧ jān būrom̧ōj im m̧ōjņo̧ kōn E, im lan̄lōn̄ eo n̄an jerbal āinwōt An kar jerbal.
Lan̄lōn̄ n̄an Kōjparok Kien ko an Kraist
Jej mour ilo juon tōre eo ekanooj lōn̄ kajjitōk ko raorōk kōn kien ko an Irooj ak rej kowaani. Ekkutkut, armej rej kowaani kwojarjar eo an āinwōt kien erreeo, jon̄ok an m̧ool, im kwojarjar eo an Jabōt āinwōt mennin jeram̧m̧an im lan̄lōn̄ an men ko rem̧m̧an an mour, ilo tōre in elōn̄ ļo̧k ro rej kōm̧m̧ane jen ro rej kajjieon̄ in pokake. Jet rej jino ļōmņak eļan̄n̄e jibadbad im wūjlepļo̧k eaorōk. Armej in Israel ro etto raar bar elotaan:
“Ejjeļo̧k tokjān jerbal n̄an Anij, im ewi wāween an kar jipan̄ kōm ar kōjparok naan in jiron̄ ko An im etetal im̧an Jeova in inelep?
“Im kiiō kōmij watōk ro ri juwa jeraam̧m̧an; aaet, ro rej kōm̧m̧an nana rekajoorļo̧k; ro rej mālejjon̄e Anij, ejjeļo̧k aer kaje.”5
Irooj eaar ba, baj kattar, m̧ae “m̧weiō e aorōk ilo raan eo. … “Im kom̧naaj … bar lo oktak kōtaan eo kōtaan ro re wānōk im ro renana, im kōtaan e eo ej jerbal n̄an Anij im e eo ej jab jerbal n̄an E.”6 Rinana remaron̄ “lan̄lōn̄ e jerbal ko aer kōn jidik wōt iien,” ak an jidik wōt iien.7 Lan̄lōn̄ an Armej ro Rekwojarjar ej niknik.
Anij ej lo men ko ilo jibadbad eo aer em̧ool, im Ej kwaļo̧k jibadbad in ippād kōn kien ko An, tōl ļo̧k kōj ipeļaakin men ko reppen im jorrāān an mour in ņae lan̄lōn̄ eo indeeo. Rikanaan Josep Smith eaar kōmeļeļeiki: “N̄e kien ko An rej katakin kōj rej iokļo̧k indeeo; bwe jej reilo̧k n̄an Anij āinwōt n̄e jekar pād indeeo.”8
Ijjan̄in lo jabdewōt ro raar oktaktok n̄an gospel in tokālik ro raar jab kōtmene en kar m̧ōkaj. Renaaj ba, “O, kālet im bōd ko iaar anjo̧ jeni.” Kien ko an Irooj rej ad kein tōl n̄an kālet ko rem̧m̧anļo̧k im lan̄lōn̄ ļo̧k. Elmen ad lan̄lōn̄ im kam̧m̧oolol kōn An kwaļo̧k n̄an kōj iaļ eo ejjejet.
Āinwōt juon jodikdik, Sister Kalomba Rosette Kamwanya jān D.R. Congo, kiiō ej jerbal ilo Côte d’Ivoire Abidjan West Mission, kar jitlo̧k im jar jilu raan n̄an bōk tōl jen Anij ta eo ekōņaan bōke. Ilo juon visōn ekabwilōn̄lōn̄ joteen eo, kar kwaļo̧k n̄an e ruo m̧ōn jar im ta eo kiiō ekar juon tampeļ. Eaar jino pukote im tokālik eaar lo m̧ōnjar eo me eaar ettōņake. Jaain eo ekar ba, “Kabun̄ eo an Jisōs Kraist im Armej ro Rekwojarjar ilo Raan Ko Āliktata.” Sister Kamwanya ekar peptaij innām tokālik jinen im brotherr ro an jiljino. Sister Kamwanya eaar ba, “Ke iaar bōk gospel in, iaar en̄jake āinwōt juon bao em̧ōj eanemkwoj. Būruwō eaar obrak kōn lan̄lōn̄. … Iaar jeļā bwe Anij ej iakwe eō.”9
Kōjparok kien ko an Irooj rej kōmaron̄ kōj n̄an en̄jake eļapļo̧k iakwe eo An. Iaļ eo eaidik im ekajim̧we an kien ko, ko rej kajju n̄an wōjke in mour eo, im wōjke eo im le ko leen, eo leen ekanooj tōn̄al im “ilōn̄in aolep,”10 rej pinej jenkwan iakwe eo an Anij im kobrak aō “kōn eļap otem ļap lan̄lōn̄.”11 Rilo̧mo̧o̧r eaar ba:
“Eļan̄n̄e kom̧ij kōjparok kein ko Aō, kom̧ naaj pād ilo Aō yokwe; im barāinwōt Iar kōjparok kein ko an Jema, im Ij pād ilo An yokwe.”
“Men kein Ij kōnono n̄an kom̧, bwe aō lan̄lōn̄ en ped wōt ippami, im bwe ami lan̄lōn̄ en obrak.”12
Lan̄lōn̄ n̄an Anjo̧ kōn Kraist
Men̄e jetiljek n̄an kōjparok kien ko, ewōr apan̄ im jorrāān ko me remaron̄ kakkure lan̄lōn̄ eo ad. Ak ilo ad kajjieon̄ in anjo̧ jen apan̄ kein kōn jipan̄ eo an Rilo̧mo̧o̧r, ej dāpij lan̄lōn̄ eo jej en̄jake kiiō im lan̄lōn̄ eo jej bōke. Kraist make eaar ba n̄an rijilōk ro An, “Ilo laļ kom̧ij en̄taan: a kom̧win lan̄lōn̄; N̄a Iar bōk anjo̧ ioon laļ.”13 Ej n̄an oktakļo̧k n̄an E, pokake E, do̧o̧rļo̧k kōj make n̄an E bwe apan̄ im būrom̧ōj ren oktak n̄an lan̄lōn̄. In kwaļo̧k juon waanjon̄ok.
Ilo 1989, Jack Rushton eaar jerbal āinwōt juon būreejtōn ilo Irvine California Stake ilo United State. Ilo juon iien kakkije an baam̧le eo n̄an California, Jack ekar lōkōr ke ņo eaar bun̄it ļo̧k e n̄an juon dōkā, bwiļlo̧ke kōnwaan im kakkure dii lep eo an. Jack eaar ba tokālik, “Iien eo wōt iaar itaak, iaar jeļā ke emej rājettiu.”14 Eban maron̄ kōnono ak emenono ippān make.15
Baam̧le, ro m̧ōttan, im membōr in stake eo raar rie brother Rushton im kōrā eo ippān, Jo Anne, im, ilubwiljin men ko jet, raar kōkm̧anm̧anļo̧k m̧weeo m̧weer n̄an wiiļjea eo an Jack. Jo Anne eaar erom̧ rikōjparok eo an Jack ilowaan iiō ko 23. Kōnono jān Bok in Mormon kōn wāween an kar Irooj loļo̧k armej ro An kōn en̄taan ko aer im kar kōm̧m̧an bwe eddodo ko aer ren mera,16 Jo Anne eaar ba, “Ekkā aō bwilōn̄ meram in bōro eo ij en̄jake ilo būruwō ilo aō kōjparok ļeo ippa.”17
Em̧m̧anļo̧k ilo tuub in emenono eo an Jack eaar maron̄ kōnono, ilowaan iiō eo, Jack kar kūr āinwōt rūkaki n̄an Gospel Doctrine im stake patriak. N̄e ej leļo̧k juon kōjeraam̧m̧an in petriak, bar juon rikabwijer priesthood eo ej likūt pein ioon pein brother Rushton ioon bōran armej eo ej bōk kōjeraam̧m̧an eo im jebare pein ilo iien kōjeraam̧m̧an eo. Jack eaar mej ilo Raan in Kūrijm̧ōj 2012, ālkin 22 iiō in jerbal in wūjlepļo̧k.
Ilo juon intōrpiu, Jack eaar ba: “Būrabōļōm̧ ko renaaj itok n̄an mour ko ad wōj aolep; ej m̧ōttan mour in ioon laļ in. Im jet armej rej ļōmņak bwe kabun̄ ak bōk tōmak ilo Anij enaaj kōjparok eok jān men ko renana. Ijjab tōmak en̄in ej jibadbad eo. Ij ļōmņak jibadbad eo ej bwe eļan̄n̄e ad tōmak ekajoor, bwe n̄e men ko renana rej waļo̧k, eo me renaaj, jenaaj maron̄ in dipļo̧ki. Aō tōmak ejjamin pere, ak ejjab meļeļein ke ejjeļo̧k aō inepata. Ij ļōmņak ej kab kein kajuon ilo mour e aō, ke ij likab kōn nan̄inmej, im em̧ool ewōr jikin n̄an oktaļo̧k, im kōn menin iaar oktaļo̧k n̄an Irooj, im n̄an rainin, ij en̄jake juon lan̄lōn̄ eo ejjeļo̧k jem̧ļo̧kin.”18
En̄in ej raan eo men ko rej iookļo̧k social media im an armej jum̧ae ro rej kappukot n̄an dāpij jon̄ok ko an Irooj ilo nuknuk, pija, im erreeo. Ekkā an jodikdik ro im rūm̧m̧an ded ro ilubwijin Armej ro Rekwojarjar, barāinwōt kōrā ro im m̧am̧a ro, ro rej en̄taan kōn kajjirere im bar kakkure. Ejjab pidodo anjo̧ jen kōmetak in, ak keememej naan ko an Piter: “Eļan̄n̄e rej kajjirere kake kom̧ kōn etan Kraist, kom̧ij m̧ōņōņō; bwe Jetōb an aiboojoj im an Anij ej pād iomi: ippāer enana etan, ak ilo jān kwe eaibojooj19
Ilo jikin Kallib Eden, Adam im Iv raar pād ilo ejjeļļo̧k jerawiwi, “ejjeļo̧k lan̄lōn̄, bwe reban kar jeļā kōn en̄taan.”20 Kiiō, ke jeļā bōk eddo ej ijjino, jej lo lan̄lōn̄ n̄an anjo̧ jen en̄taan ilo jabdewōt jekjek, men̄e jerawiwi, apan̄, m̧ōjņo̧, ak jabdewōt kapan̄pan̄ ko rej waļo̧k. Lan̄lōn̄ in ej eddōkļo̧k eo ilo iaļen rikaļoor; lan̄lōn̄ eo n̄an “bōk jeorļo̧k in jero̧wiwi ko aer, im kar wōr aer aenōm̧m̧an in bōklōkōt”;21 en̄jake in lan̄lōn̄ eo an juon jetōb im eddōkļo̧k kōn jouj an Kraist.22
Lan̄lōn̄ n̄an Jerbal āinwōt Kraist ej Jerbal
Rilo̧mo̧o̧r ej lo lan̄lōn̄ n̄an bōktok mour jab wabanban im mour indeeo.23 Kōnono kōn Pinmuur eo an Rilo̧mo̧o̧r, Būreejtōn Russell M. Nelson ekar ba:
“Bwe ilo aolep men otemjeļo̧k, Jisōs Kraist ej riwaanjon̄ok eo ad eļap ‘kōn lan̄lōn̄ eṃōj likūt e im̧aan, Ear en̄taan ilo debwāāl,’ [Hibru 12:2]. Ļōmņake mōk men in! Bwe En maron̄ dipuk en̄taan eo ioon laļ in, ad Rilo̧mo̧o̧r eaar mije wōt lan̄lōn̄!
Im ta lan̄lōn̄ eo em̧ōj likūt E im̧aan? Ilo m̧ool ekoba lan̄lōn̄ eo erreeo, emour, n̄an kōkajoorļo̧k kōj; lan̄lōn̄ eo n̄an kōļļāik wōnāān jerawiwi ko an aolep ro renaaj ukweļo̧k; lan̄lōn̄ eo ekōm̧m̧an bwe kōjro en jepļaakļo̧k n̄an kapijuknen ilo—karbab im erreeo—n̄an mour ippān Jined im Jemedwōj Ilan̄ im baam̧le ko.”24
Ejjeļo̧k oktak, “likūt im̧aad” lan̄lōn̄ ej jipan̄ Rilo̧mo̧o̧r ilo jerbal in lo̧mo̧o̧r in An. Āinwōt ro ineen ro nejin Ebream,25 jej bōk koņaad ilo kōjeraam̧m̧an ko an aolep baam̧le ko ioon laļ in, “kōn kōjeraam̧m̧an ko an Gospel eo, ko rej kōjeraam̧m̧an ko an lo̧mo̧o̧r, aaet mour indeeo.”26
Naan ko an Alma raar itok n̄an kōļmenļo̧kjeņ eo aō.
“Enin ej aō aiboojoj, bwe bōlen in maron̄ juon kein jerbal ilo pein Anij n̄an bōktok jān armej n̄an ukweļo̧k; im en̄in ej aiboojoj eo aō.
“Im lo, n̄e ij lo elōn̄ iaan ro jeiū im jatū rem̧ool ilo ukweļo̧k, im rej itok n̄an Irooj aer Anij, innām aō ej obrak kōn lan̄lōn̄. …
Ak ijjab lan̄lōn̄ ilo tōprak eo aō make wōt, ak aō lan̄lōn̄ ej obrakļo̧k kōnke tōprak ko an ļōm̧aro jeiū im jatū, ro raar pād ilo āneo ilōn̄ āneen Nipai. …
“Kiiō, n̄e ij ļōmņak kōn tōprak ko an rein jeiū im jatū aō emootļo̧k, em̧ool n̄an jepelļo̧k eo an jān ānbwinnū, āinwōt kar m̧okta, eļap ej aō lan̄lōn̄.”27
Leen ad jerbal in jipan̄ doon ilo Kabun̄ in rej m̧ōttan lan̄lōn̄ eo “kar karōk n̄an kōj.” Men̄e ilo iien ebbweer ak en̄taan, jej maron̄ in jerbal in karejar eļan̄n̄e jej mije wōt lan̄lōn̄ in n̄an kam̧ōņōņōik Anij n̄an bōktok meram, dood, im lem̧ōņōņō n̄an ro Nejin, ro jeid im jatid.
Kar ilo Haiti allōn̄ eo ļo̧k n̄an aje eo an Port-au Prince Temple, Elder David im Sister Susan Bednar raar ioon juon jiron̄ eo ļeo pāleen ekar mej jet raan remootļo̧k ilo juon itaak in wa. Raar jan̄ ippān doon. Aaet ilo Jabōt eo kōrā in ejitōn bōro ekar pād āinwōt juon rijipan̄ ilo iien aje eo kōn aenōm̧m̧an, ettōn̄dikdik n̄an aolep ro rej deļo̧n̄e tampeļ eo.
Ij tōmak bwe “lan̄lōn̄ an armej ro rekwojarjar” ejjeļo̧k jem̧ļo̧kin eaar waļo̧k n̄an jeļā bwe Rilo̧mo̧o̧r eaar akweļap kōn er,28 “im ejjeļo̧k emaron̄ kwaļo̧k lan̄lōn̄ in me [enaaj kobrak] jetōb ko ad [ilo] ad [ron̄ an Jisōs] jar kōn kōj n̄an Jemen.”29 Ippānļo̧k Būreejtōn Russell M. Nelson, ij kam̧ool bwe lan̄lōn̄ ej juon mennin letok n̄an Armej ro Rekwojarjar retiljek “ro raar niknik ilo debwāāl ko an laļ”30 im ro “rej kajjieon̄ mour kōn juon mour ewānōk, āinwōt kar kwaļo̧k jen Jisōs Kraist.”31 Kōm̧m̧an bwe ami lan̄lōn̄ en obrak, ij jar ilo etan ekwojarjar Jisōs Kraist, amen.