Lōke eo Ejjejet im Pen
Lōke Irooj ekoba lōke karōk eo An im emenin aikuj kijenmej im niknik n̄an anjo̧ jān ļan̄ ko an mour in.
Ļaddik eo nejū Dan eaar lukkuun nan̄inmej ilo mijen eo an ilo Africa im kar bōk e n̄an jikin taktō ijo ejjab bwe kein jerbal ie. Ilo ammim riiti leta eo an jinoin tok n̄an kōmim ālkin an nan̄inmej, kōm kar ļōmņak en kar ebweer, ak ekar je, “Men̄e iaar babu ilo ruum in kōm̧adm̧ad eo, iaar en̄jake aenōm̧m̧an. Ijjan̄in kar en̄jake m̧ōņōņō eo ejjejet im pen ilo mour e aō.”
Ke kōrā eo pāleeō im n̄a kom̧ro kar riiti naan kein, kom̧ro kar en̄jake m̧ōņōņō. Mōņōņō eo ejejjet im pen. Kom̧ro ejjan̄in kar ron̄ wāween kōmeļeļeik lem̧ōņōņō eo, ak naan ko an raar m̧ool. Jaar jeļā bwe lem̧ōņōņō eo eaar kōmeļeļeiki eaar jab kam̧ōņōņō wōt ak juon en̄jake em̧m̧an ak juon aenōm̧m̧an im lan̄lōn̄ me ej itok n̄e jej jurake kōj make n̄an Anij im likūt ad lōke ilo E ilo aolep men otemjeļo̧k.1 Elōn̄ iien ko ilo mour ko ad n̄e Anij ej kōnono aenōm̧m̧an n̄an jetōb ko ad im kōm̧m̧an bwe jen bōk kōjatdikdik ilo Kraist men̄e mour epen n̄an antooneļo̧k.2
Liai eaar kwaļo̧k bwe eļan̄n̄e Adam im Iv ren kar jab wōtļo̧k, “reban kar jeļā kōn en̄taan, jab kōm̧m̧an em̧m̧an, bwe raar jeļā ejjeļo̧k jero̧wiwi; …
“Ak lo, aolep men kar kōm̧anm̧an ilo lotātāt an Eo ejeļā men otemjeļo̧k.
“Adam eaar wōtlo̧k bwe armej ren kar āinwōt, bwe ren maron̄ m̧ōņōņō.”3
Ilo juon wāween, apan̄ im būrom̧ōj ko rej kōpooj kōj n̄an en̄jake lan̄lōn̄ eļan̄n̄e jenaaj lōke Irooj im karōk eo An n̄an kōj. M̧ool in aibojooj ilo an poet eo kar kōmeļeļeik 13th epepen emootļo̧k: “Buromōj ej Kōpooj Eok n̄an Lan̄lōn̄. Eaorōk n̄an juļo̧k men ko ejejet tokjāer jen mour ko am̧ bwe lan̄lōn̄ in ekāāl en wōr jikin n̄an deļo̧n̄. Ej juļo̧k kurbalōklōk ko jān būruwōm̧, bwe menwan kāāl, bōlōk ko remaroro ren eddōk ilo jikier. Ej juļo̧k okar ko renana, bwe okar ko rekāāl en wōr jikier n̄an eddōk. Jekdo̧o̧n būrom̧ōj rōt eo ej jako jen būrowōm̧, men ko rem̧m̧anļo̧k renaaj bōk jikier.”4
Būreejtōn Russell M. Nelson ekar katakin kōj, “Lan̄lōn̄ eo an Rilo̧mo̧o̧r me ej letok n̄an [kōj] … emakijkij, ej kalikkar n̄an kōj bwe ‘en̄taan kein renaaj n̄an jidik wōt iien’ [Katak im Bujen Ko 121:7] im em̧ōj kokwojarjare n̄an jeram̧m̧an eo ad.”5 Melejon̄ im En̄taan ko ad remaron̄ kōm̧m̧an jikin lan̄lōn̄ eļap.6
Nuuj eo em̧m̧an kōn gospel in ejjab kallim̧ur kōn juon mour ejjeļo̧k būrom̧ōj im apan̄ ak juon mour eobrak kōn jibadbad im aorōkin—juon mour ijo būrom̧ōj im kaen̄tanaan ko ad remaron̄ jako ilo lan̄lōn̄ an Kraist.”7 Rilo̧mo̧o̧r eaar ba, “Ilo laļ kom̧ij en̄taan: a kom̧win lan̄lōn̄; N̄a Iar bōk anjo̧ ioon laļ.”8 Gospel eo An ej juon naan in kōjatdikdik. Būrom̧ōj koba kōjatdikdik ilo Jisōs Kraist ej dāpij kallim̧ur in lan̄lōn̄ eo eniknik.
Bwebwenato in ito-itak eo an RiJared ro n̄an ānen kallim̧ur emaron̄ in jerbal āinwōt juon waanjon̄ok n̄an ito-itak in ad ilo mour in. Irooj eaar kallim̧uri ļeo jein im jatin Jared im armej ro an bwe Enaaj “ilo̧k im̧aam[ļo̧k] ilo āneo e makeļo̧k ioon aolep āne ko in laļ.”9 Eaar kakien er n̄an jōk baaj ko, im pokake im ilo̧k im jerbal in jōkjōk ekkar n̄an naan in jiron̄ eo an Irooj. Ijoke, ke jerbal eo ej etal wōt, ļeo jein im jatin Jared eaar inepata bwe ļōm eo an Irooj n̄an baaj ko ekar jabwe. Eaar kūr:
“O Irooj, iaar kōm̧m̧ane jerbal eo Kwaar jiron̄ eō, im iaar kōm̧m̧ani baaj ko ekkar n̄an āinwōt Kwaar tōl eō.
“Im lo, O Irooj, ilowaer ejjeļo̧k meram.”10
“Lo, O Irooj, Kwōn kōtļo̧k ke bwe kōmin naaj kijoone dān in eļap ilo marok jilōn̄lōn̄?”11
Kwonan̄in ke kar leļo̧k am̧ n̄an Anij ilo wāween in? N̄an kajjieon̄ mour kake āinwōt an Irooj kean̄ im wānōk ejjab jerbal, kwonan̄in ke kar ļōmņak eļan̄n̄e kwoj etal ilo marok jilōn̄lōn̄ an mour in?12
Innām brother Jared eaar kwaļo̧k juon inepata eļap kōn maron̄ in mour ilowaan baaj ko. Eaar kūr, “Im barāinwōt kōm naaj jako, bwe ilowaer kōm jamin menono, ijello̧kun menono mejatoto eo ej ilowaer.”13 Apan̄ ko an mour in rekar ke kōm̧m̧an bwe en pen am̧ emenono im kōm̧m̧an am̧ ļōmņak elmen am̧ maron̄ in dōbļo̧ke juon raan, ej kab baj pen ļo̧k wōt n̄an jepļaak n̄an m̧weeo im̧ōm̧ ilan̄?
Ālkin an Irooj jerbal ippān brother Jared n̄an mijaļ inepata eo an, Innām Eaar ba, “Kom̧ij jab maron̄ kijoone m̧wilaļ in eļap ijello̧kin Ij kōpooj [juon iaļ n̄an] kom̧ ņae ņo ko in lo̧jet, im kōto ko raar ilo̧k, im ibwijleplep ko renaaj itok.”14
Irooj eaar lukkuun kalikkare bwe RiJared ro reban tōparļo̧k ānen kallim̧ur n̄e ejjab E. Ejjeļo̧k mennin kōjebwābweik er, im wāween eo wōt remaron̄ kijoone m̧wilaļ in eļap ej lōke E. En̄jake im katak kein jān Irooj raar pedped wōt ioon tōmak eo an brother Jared im an lōke ekajoor ilo Irooj.
Keememej elmen an kar jar ko an oktak jān kajjitōk ko im inepata ko n̄an kwaļo̧k tōmak im lōke:
“Im ijeļā, O Irooj, bwe kwe Am̧ aolep kajoor, im maron̄ kōm̧m̧an jabdewōt men kwōnaaj n̄an jeraam̧m̧an an armej; …
“Lo, O Irooj, Kwo maron̄ kōm̧m̧ane men in. Kōm jeļā bwe Kwo maron̄ kwaļo̧k tok Am̧ kajoor eļap, eo āinwōt edik n̄an meļeļe an armej.”15
Ekar jeje bwe RiJared ro raar “uwe ioon baaj ko … waer, im jerakļo̧k ilo lo̧jet, ajeļo̧k er make n̄an Irooj aer Anij.”16 N̄an ajeļo̧k meļeļein n̄an lōke ak n̄an jurake. RiJared ro raar jab uwe ioon baaj ko kōnke rejeļā elmen an men ko jerbal ilo ito-itak eo aer. Raar uwe kōnke raar ekkatak n̄an lōke kajoor eo an Irooj, em̧m̧an, im tūriam̧o, im kōn menin raar m̧ōņōņō in leļo̧k er make im jabdewōt pere ak mijak n̄an Irooj.
Raan ko ļo̧k, ļaddik eo nejim Abe ekar mijak in iuwe ioon juon iaan menin mour kein ikkure me ej walōn̄ļo̧k im walaļļo̧k. Ekar kōņaan juon me ejjab em̧akūtkūt. Jibun āliktata ekar kipel e ke em̧m̧an ejjab kauwōtata, innem, ilo an ļōke e, ekar iuwe. Innem ekar ba ilo an ettōn̄ dikdik, “Ijjab en̄jake aō koņ, ak em̧m̧an ikoņ.” Bolen en̄in wāween an Ri Jared ro kar en̄jake. Ļōke Anij jemaron̄ jab en̄jake ad koņ ilo jinoin, ak lan̄lōn̄ ej itok ālkin.
Iaļ eo ekar jab pidodo nan Ri Jared ro. “Elōn̄ alen kallib ilo m̧wilaļ ko in lo̧meto, kōnke ņo toļ ko rekar rup ioer.”17 Aaet kar jeje bwe “kōto eo eaar jab bōjrak n̄an uukļo̧k [er] n̄an āneen kallim̧ur.”18 Toon wōt an pen n̄an meļeļe, eļaptata n̄e anjiwiwi ko rekajoor an mour in reppen, jemaron̄ en̄jake aenōm̧m̧an n̄an jeļā bwe em̧m̧an eo an Anij ejjeļo̧k jem̧ļo̧kin ej aolep iien uukļo̧k kōj n̄an kapijuknen.
Jeje ko rej kwaļo̧k, “Im āindein kar kinōōrļo̧k er; im ejjeļo̧k kidudujet in lo̧jet eaar ko̧kkure er, im jab kajorrāān er; im rekar wōr aer meram wōt, men̄e eaar ioon dān ak ium̧win dān.”19 Jej mour ilo juon laļ ijo kidudujet in lo̧jet in mej, nan̄inmej in ānbwin im kōmālij, im apan̄ ko im kaen̄tanaan ko an aolep kain rej ioktok kōj. Aaet, tōmak ilo Jisōs Kraist im kālet n̄an lōke E, jej barāinwōt maron̄ bōk meram, men̄e ioon dān ak ium̧win dān. Jej maron̄ jeļā bwe Anij eaar jab bōjrak n̄an ukkļo̧k kōj n̄an kapijuknen eo ad ilan̄.
Ilo aer pād ilowaan baaj ko, RiJared ro “raar al nebar ko n̄an Irooj; … im [raar] kam̧m̧oolol im wūjtake Irooj aolepān raan eo; im ke bon̄ōn eo eaar itok, rekar jab bōjrak n̄an wūjtake Irooj.”20 Raar en̄jake lan̄lōn̄ im kam̧m̧oolol men̄e ilo kaen̄tanaan ko aer. Er rej jan̄in kar itaaktok ilo ānen kallim̧ur eo, im rekar lan̄lōn̄ ilo kōjeraam̧m̧an ko kar kallim̧ur kaki kōnke raar jejjet im dim ilo lōke E.21
RiJared ro raar peto-petak 344 raan ioon dān.22 Komaron̄ ke antoone ļo̧k? Lōke Irooj ekoba lōke karōk eo An im emenin aikuj kijenmej im niknik n̄an anjo̧ jān ļan̄ ko an mour in.23
Ilo m̧ool, RiJared ro “rekar laurōeļo̧k parijet in āneen kallim̧ur. Im ke rekar likūt neer ioon parijet ko in āneen kallim̧ur rekar badikdik er ioon mejān āneo, im kar kōttāik er im̧aan Irooj, im kar jan̄ dān in jan̄ in m̧ōņōņō im̧aan Irooj, kōnke lōn̄ in jouj ko An ioer.”24
Eļan̄n̄e jej tiljek n̄an kōjparok bujen ko ad, juon raan jenaaj laurōeļo̧k kapijuknen eo ad ejokne im naaj bukwelōlō im̧aan Irooj kōn dānnin kōmjalal kōn lan̄lōn̄ bwe kōn tūriam̧o kake eo An eļap ilo mour ko ad, ekoba burom̧ōj ko raar ļapļo̧k n̄an lan̄lōn̄.25
Ij kam̧ool bwe ilo ad leļo̧k kōj make n̄an Irooj im jejjet im dim ilo ad lōke Jisōs Kraist im jibadbad eo An ekwojarjar ilo mour ko ad, Enaaj lotok kōj n̄an kam̧ool, kōnono aenōm̧m̧an n̄an jetōb ko ad, im kōm̧m̧an bwe jen “kōjatdikdik kōn lo̧mo̧o̧ren eo ilo E.”26
Ijeļā bwe Jisōs ej RiKraist eo. E ej unjen aolep lan̄lōn̄.27 An jouj ebwe, im E ekajoor n̄an lo̧mo̧o̧ren.28 E ej meram eo, mour eo, im kōjatdikdik eo an laļ in.29 Eban kōm̧m̧an bwe jen jako.30 Ilo etan Jisōs Kraist, amen.