Nōbar Etan
Kōn bujen kadkad in im jej pād ie, em̧ōj ān̄inn̄in kōj kōn etan Jisōs Kraist.
Ilo an ro jinen im jemen kōttar an ļootak ajri eo, ewōr aer eddo n̄an kālet juon āt n̄an nin̄nin̄ eo nejier. Bōlen ke kwaar ļotak, kwaar bōk juon āt me ej wōnm̧aanļo̧k ilo epepen ko an baam̧le eo am̧. Ak bōlen ekar bun̄bun̄ āt eo kar lewaj ilo iiō eo ak eria eo kwaar ļotak ie.
Rikanaan Hilamōn im kōrā eo ippān rekar leļo̧k āt ko ewōr meļeļeier n̄an ajri ro nejier Nipai im Liai. Hilamōn tokālik eaar jiron̄ ļōm̧aro nejin:
“Iaar lewōj n̄an kom̧ āt ko etan ro jemād im jined m̧oktata … bwe n̄e kom̧ij keememej āt ko etami kom̧ maron̄ keememej er; im n̄e kom̧ij keememej er kom̧ maron̄ keememej jerbal ko aer … bwe ennaan in, im barāinwōt kar jeje, bwe raar em̧m̧an.
“Kōn menin, ro nejū m̧aan ikōņaan bwe kom̧in kōm̧m̧an men eo em̧m̧an.”1
Etan Nipai im Liai rekar jipan̄ er keememej jerbal ko rem̧m̧an an ro jibweer im jim̧m̧aer im kar rōjan̄ er n̄an kōm̧m̧an em̧m̧an barāinwōt.
Sister ro, jekdoon ia eo jej jokwe ie, kajin ta eo ad, ak men̄e jej 8 iiō ak 108 iiō rūttoid, kōj aolep jej pelōk juon āt ejenoļo̧k me ewōr ie ejja jibadbad in wōt.
“Bwe ro otemjej [iaad] em̧ōj peptaij er ilo Kraist raar kōņak Kraist … bwe [kom̧] otemjej juon ilo Kraist Jisōs.”2
Āinwōt membōr ro an Kabun̄ eo an Jisōs Kraist im Armej ro Rekwojarjar ilo Raan Ko Āliktata, “jej m̧oktata leļo̧k ankilaad n̄an bōk iood etan Kraist … kōn kain̄i eo an peptaij.”3 Jen bujen in, jaar kallim̧ur n̄an iien otemjej keememej E, kōjparok kien ko An, im jerbal n̄an ro jet. Ad ikdeelel n̄an kōjparok bujen in n̄an kōkāāle kajjojo Jabōt ilo ad bōk m̧ōttan kwojkwoj eo im m̧ōņōņō bar juon alen kōn kōjeraam̧m̧an eo n̄an “et[al] ilo mour ekāāl.”4
Āt eo kar letok ilo iien ļotak ej kwaļo̧k kadkadid make im letok n̄an kōj baam̧le eo ad ioon laļ in. Ijoke, ke jaar “bar ļotak” ilo iien peptaij, meļeļe eo ad kōn wōn kōj eaar ļapļo̧k. “Kōnke bujen eo kom̧ ar kōm̧m̧ane naaj ān̄inn̄in kom̧ ro nejin Kraist, … bwe lo, … Eaar keotak kom̧ ilo jetōb; bwe kom̧ij ba bwe būruōmi raar oktak kōn tōmak ilo Etan; kōn menin, kom̧ij ļotak ilo E.”5
Aaet, kōn bujen kadkad in im jej pād ie, em̧ōj ān̄inn̄in kōj kōn etan Jisōs Kraist. Im “ejjeļo̧k naaj bar āt letok ak jabdewōt bar iaļ ak wāween lo̧mo̧o̧r emaron̄ itok n̄an ro nejin armej, ilo wōt im kōn wōt etan Kraist.”6
Etan Jisōs kar jeļā jen etto m̧okta jen An ļotak. N̄an Kiin̄ Benjamin, juon enjeļ eaar kanaan, “Im naaj ān̄inn̄in E Jisōs Kraist, eo Nejin Anij, … im jinen naaj ān̄inn̄in e Meri.”7 An jerbal kōn “iakwe epinmuur”8 kar bar kwaļo̧k n̄an ro nejin Anij ilo iien eo gospel in ej pād ioon laļ in, jān tōre ko an Adam im Iv n̄an tōre in ad, bwe ren maron̄ “jeļā ta rej maron̄ reilo̧k n̄an jeo̧rļo̧k jero̧wiwi ko aer.”9
Iiō eo ļo̧k, Būreejtōn Russell M. Nelson eaar “kwalo̧k akweļap in kanaan in” “n̄an sister ro n̄an kōkōm̧anm̧anļo̧k ilju im jekļaj ilo jipan̄ aiintok Israel jān ejeplōklōk.” Eaar karuwaineneik kōj n̄an riiti Bok in Mormon im “kōkkaļļeiki kajjojo eoon ko me rej kōnono ak kōmeļeļe kōn Rilo̧mo̧o̧r eo.” Innām eaar kajjitōk bwe jen “ekkejel iien otemjej ilo kōnono kōn Kraist, lan̄lōn̄ ilo Kraist, kwaļo̧k kōn Kraist ippān [baam̧le ko ami] im ro m̧ōttami.” Bōlen kwaar jino kile leen kallim̧ur eo an bwe “kom̧ im er naaj epaakeļo̧k Rilo̧mo̧o̧r eo kōn wāween in. … Im oktak ko, aaet kabwilōn̄lōn̄ ko, naaj jino waļo̧k.”10
Kallim̧ur eo ad n̄an iien otemjej keememej Rilo̧mo̧o̧r eo ej letok n̄an kōj kajoor n̄an jutak kōn m̧ool im jim̧we—men̄e jej juon jarlepju ekilep ak jikin ko relo̧urō, ijo ejjeļo̧k juon ejeļā kōn m̧akūtkūt ko ad ijeļo̧kin wōt Anij. N̄e jej keememej E im Etan jej ineeke, ejjeļo̧k jikin n̄an ļōmņak kōn kōj make ak bōd ņae ekajet. Ilo ad mije wōt Rilo̧mo̧o̧r, jej meļeļe wōn lukkuun kōj—juon nejin Anij.
Mour kake bujen eo ad ekakeememej n̄an ukōt ad inepata, oktak pere n̄an peran, im letok kōjatdikdik ilo iien ko rapan̄.
Im n̄e jej tubbok im wōtļo̧k ilo iaļen bujen in ad, jej aikuj in keememej Etan im An jouj n̄an kōj. “Bwe ej An aolep kajoor, aolep mālōtlōt, im aolep jeļāļo̧kjeņ; E meļeļe men otemjeļo̧k, im E ej juon E tūriam̧okake, … n̄an ro renaaj ukeļo̧k im tōmak ilo Etan.”11 Aaet ejjeļo̧k juon men em̧m̧anļo̧k jen etan Jisōs n̄an aolep ro kōn bōro erub im jetōb ettā, kappukot n̄an “kōm̧m̧an em̧m̧anļo̧k im maron̄ em̧m̧anļo̧k.”12
Būreejtōn Nelson eaar kwaļo̧k: “Raan eo emootļo̧k ilo am̧ maron̄ pād waan im bajjōk Rikūrijin. Kabun̄ eo am̧ ejjab baj wōt jadetok n̄an jar ilo Jabōt. Ej n̄an kwaļo̧k āinwōt juon rikaļoor em̧ool jān jibbon̄ in Jabōt n̄an joteen in Jadede. … Ejjeļo̧k men rot kein rikaļoor ‘jimettan iien’ an Irooj Jisōs Kraist.”13
Ad kōņaan bōk iood etan Kraist en ļapļo̧k jen leto letak naan ko. Ejjab juon kallim̧ur bajjōk ak juon kōm̧anm̧an in m̧anit. Ejjab juon kōm̧m̧an bajjōk ak juon tāāk in āt kwoj kōņake. Ejjab juon naan bajjōk me jej likūt ioon juon jāļab ak dipin juon em̧. E ej juon āt me “kōņak,”14 kar jeje ilo būruwōd, im “kar m̧wijiti ilo paotokimi.”15
En̄taan in pinmuur eo an Rilo̧mo̧o̧r eaikuj in keememej, iien otemjej, ilo kōļmneļo̧kjeņ ko ad, m̧akūtkūt, im iiaio̧ ko ad ippān ro jet. E ejjab wōt keememej etad, ak Ej keememej kōj iien otemjeļo̧k. Rilo̧mo̧o̧r eo eaar kwaļo̧k:
“Bwe juon kōrā emaron̄ ke meļo̧kļo̧k nejin ajri ejjab liktūt, bwe en aikuj jab wōr an tūriam̧o kōn ļaddik eo jān lo̧jeen? Aaet, remaron̄ meļo̧kļo̧k, ak Ij jamin meļo̧kļo̧k eok, O m̧weo im̧ōn Israel.
“Lo, em̧ōj Aō je etam̧ illo̧piden Peiū.”16
Būreejtōn George Albert Smith eaar kwaļo̧k, “Nōbar āt ko me kwoj etņaki, kōnke juon raan kwonaaj bōk iien em̧m̧an n̄an kwaļo̧ki … n̄an Jememi Ilan̄ … ta eo kwaar kōm̧m̧ani n̄an [āt ko].”17
Āinwōt āt ko kar kāleti an Nipai im Liai, emaron̄ ke ba im kar je ilo kōj bwe jej rikaļoor ro rem̧ool an Irooj Jisōs Kraist? Jej ke nōbar etan Jisōs Kraist ke jej m̧ōņōņō in bōk iood make? Jej ke jim̧or “juon ri kaki im ri kōnnaan”18 kōn jouj in ettā eo An im kajoor in pinmuur eo An?
Ejjab etto, iaar ron̄jake Bok in Mormon. Ilo jebta eo āliktata in 2 Nipai, Iaar ron̄ an Nipai ba jet men me ijjan̄in kar riiti ilo wāween eo kar m̧okta. Aolepen ļo̧o̧k ko an, ej kwaļo̧k im kam̧ool kōn “Ripinmuur,” eo “Eo Rikwojarjar in Israel,” “Lam an Anij,” im “Messaia.” Ak ke ej kadedeļo̧k ļo̧o̧k eo an, iaar ron̄ an make ba naan kein: “Ij m̧ōņōņō ilo alikkar; ij m̧ōņōņō ilo m̧ool; ij m̧ōņōņō ilo aō Jisōs, bwe Eaar lo̧mo̧o̧ren aō jān hell.”19 Ke iaar ron̄ naan kein, būruwō eaar m̧ōņōņō im iaar bar ron̄ im bar ron̄jake. Iaar kile im kar mour kake eoon in āinwōt aō kar kile im mour kake eta make.
Irooj eaar ba, “Aaet, jeraam̧m̧an ej armej rein ro rej m̧ōņōņō in bōk Eta; bwe ilo Eta naaj ān̄inn̄in er; im renaaj Aō.”20
Āinwōt membōr ro ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata, jen “m̧ōņōņō [bōk iood] etan Kraist”21 n̄an nōbar Etan kōn iakwe, wūjļepļo̧k, kōn jerbal ko rem̧m̧an. Ij kam̧ool bwe E ej “Lam an Anij, em̧ool eo Nejin Jemād Indeeo.”22 Ilo etan eo Nejin ekwojarjar, Jisōs Kraist, amen.