Kom̧win Tiljek, Jab Jatiljek
Jej aikuj lukkuun bōk iien kajjojo raan n̄an kune kein ekkeijel eo ad jān laļ in im ekkeijelļo̧k ippān aelōn̄ in lan̄.
Ejjab to ikar rūj im kōppopo n̄an ekkatak jān jeje ko rekwojarjar. Ikar kotak smartphone eo aō im jijōt ilo juon jea itūrinļo̧k pito̧n̄ eo aō, kōn ļōmņak eo n̄an kōpeļļo̧ke Gospel Library app eo. Ikar kōpeļļo̧k taļeboon eo nejū im kar tōn jino̧ ekkatak ke ikar loe jimettan tōjin kōjeļļā ko n̄an enaan ko im email ko me rekar itōk ilo bon̄. Ikar ļōmņak, “Inaaj m̧ōkaj im lali enaan ko, im n̄e em̧ōj inaaj bar ro̧o̧l n̄an jeje ko rekwojarjar.” Ekwe, ruo awa tokālik iļakar riiti enaan ko ilo text, email ko, kōkadudu in nuuj ko, im kōjeļļā ko ilo mejatoto. Ke ij jeļā awa eo, ikar m̧ōkaj im kōppopo n̄an raan eo. Jibbon̄ eo ikar jab ekkatak jān jeje ko rekwojarjar, innem ikar jab bōk ājmour eo an jetōb me ikar kōjatdikdik n̄an bōke.
Kōkajoorlok ko an Jetōb
Ij tōmak elōn̄ iaad remaron̄ jelōt menin. Kein jerbal ko raan kein rej kōjeram̧m̧an kōj ilo elōn̄ wāween ko. Remaron̄ kōm̧m̧an bwe jen ekkeijelļo̧k ippān ro m̧ōttad im baam̧le ko ad, kōn meļeļe ko, im enaan kāāl ko kōn men ko rej waļo̧k kiiō ipeļaakin laļin. Bōtaab, remaron̄ barāinwōt kapoik kōj jān kein ekkeijel eo aurōktata: ad ekkeijel ippān aelōn̄ in lan̄.
Ij āliji ta eo rikanaan eo ad, Būreejtōn Russell M. Nelson, ekar ba: “Jej mour ilo juon laļ eo epen im eļapļo̧k aitwerōk. Emakijkij an waļo̧k ilo social media im jerbal in etale ko im nuuj ko ilo kajjojo 24 awa rej jum̧ae kōj kōn naan ko rekakjon̄jon̄. Eļan̄n̄e jekōņaan bwe en wōr ippād jabdewōt kōjatdikdik jej lukkuun etale meļeļe ko roktak im katak ko an armej ro me rej jum̧aeik m̧ool eo, jej aikuj in ekkatak n̄an bōk revelesōn.”
Būreejtōn Russell M. Nelson ekar wōnm̧aanļo̧k wōt im kakkōl bwe, “Ilo raan ko rej itok, enaaj maron̄ pen n̄an kajeikiik, tōl, kaenōm̧m̧an, im emakijkji in im̧we ko an Jetōb Kwojarjar.”1
Iiō ko remootļo̧k, Būreejtōn Boyd K. Packer ekar ba kōn juon kurup in menin mour tiōr ko me, kōn eddoin wōtlo̧kin snow ko, rekar ļorak nam̧ōjin ijo jikier im kar ioon kwole. Jet armej ro rejouj, kōn kijejeto n̄an kōjparok tiōr ko, kar illūk ujooj ko rellōn̄ kijen menin mour ipeļaakin eria eo—ejjab men ko tiōr rekkein m̧ōn̄ā, ak rekar kōjatdikdik bwe enaaj dāpij mour ko an tiōr ko ilo iien m̧oļo eo. Būrom̧ōj eo, eiten aolepān tiōr ko rekar mej. Rekar kan̄i ujooj ko, ak ekar jab kōkajoor er, im rekar kole n̄an mej ippān an obrak lo̧jeer.2
Elōn̄ iaan enaan ko me rej kad tok kōj kake ilo iiō in meļeļe eo ejjeļo̧k oktak jān aer naajidik tiōr ko ujooj—jemaron̄ m̧ōn̄āiki aolepān raan eo, ak eban kōkajoor kōj.
Ia eo jej kappukot kōkajoorļo̧k ko an Jetōb? Eiten aolep iien, ejjab bun̄bun̄ ilo mejatoto. Jej loi n̄e jej “iuun [ad] m̧aanļo̧k” ilo iaļan bujen eo, “im jirok likatōttōt wōt ilo aen in dāpdep eo, m̧ae iien raar tōprak im raar wōtļo̧k im m̧ōn̄ā leen wōjke eo.3 Meļeļein bwe jej aikuj lukkuun bōk iien kajjojo raan n̄an kune kein ekkeijel eo ad jān laļ in im ekkeijelļo̧k ippān aelōn̄ in lan̄.
Ilo ettōņak eo an, Liai ekar lo armej ro rekar m̧ōn̄ā jān leen wōjke eo ak rekar joļo̧k e kōn kareel eo an em̧ eo ekiļep im ļap, ej juwa eo an laļ.4 Jodikdik ro remaron̄ kar rūttoļo̧k ilo juon mōn Armej eo Ekwojajar ilo Raan Ko Āliktata, ej kobaļo̧k ilo kweilo̧k ko im kūlaaj ko rejim̧we, barāinwōt bōk koņaan ilo kain̄i ko an tampōļ eo, im kiiō ilo̧k jān e “ilo iaļ ko remo̧ im [raar] jebwābwe.”5 Etke menin ej waļo̧k? Ilo jekjek ko rellōn̄ ej kōnke, men̄e rej etal ium̧win m̧akūtkūt ko an jetōb, rekar jab m̧oolin oktak. Rekar mat ak rekar jab kajoorļo̧k.
Oktak eo, em̧ōj aō ioon elōn̄ iaami Armej ro Rekwojarjar ilo Raan Ko Āliktata ro remālōtlōt, rekajoor, im retiljek. Kwojeļā ke bwe kom̧ ļaddik ro im leddik ro nejin Anij im bwe E ewōr juon an jerbal n̄an kom̧ n̄an kōm̧m̧ane. Kwoj iakwe Irooj kōn aolepān “būruōmi, ami maron̄, ļōmņak im kajoor.”6 Kwōj kōjparok bujen ko am̧ im jerbal n̄an ro jet, ijjino ilo mōko. Kwoj kōjerbal tōmak, ukweļo̧k, im eddōkļo̧k kajjojo raan, im menin enaaj bōktok n̄an eok lan̄lōn̄ ejjeļo̧k jem̧ļo̧kin. Kwoj kōppopo n̄an kōjeraam̧m̧an ko an tampeļ im iien ko rem̧m̧an konaaj jelm̧aiki āinwōt rikaļoor ro an Rilo̧mo̧o̧r rem̧ool. Im kwoj jipan̄ kōpooj laļ in n̄an Itok eo Kein Karuo, kūr aolep n̄an itok n̄an Kraist im bōk kōjeraam̧m̧an ko an Pinmuur eo An. Kwoj ekkeijelļo̧k ippān aelōn̄ in lan̄.
Aaet, kwoj jelm̧ae mālijjon̄ ko. Ak āindein bar aolep epepen. Raan ko kein ej ad, im jej aikuj tiljek, jab jatiljek. Ij kam̧ool bwe Anij ejeļā kōn apan̄ ko ad, im kōn tōl an Būreejtōn Nelson, E ej kōpooj kōj n̄an iooni. Ij tōmak bwe kūr eo an rikanaan eo n̄an kabun̄ in ej pedped ioon mōko, jej rejtake kōn ta ko jej kōm̧m̧ani ilo mōn jar ko,7 kar karōke n̄an jipan̄ kōj mour—em̧ool eddōkļo̧k—ilo rain in jabwe ōn ilo jetōb.
Pedped ioon Mōko M̧okta
Ta meļeļein kabun̄ in ej pedped ioon mōko m̧okta? Mōko remaron̄ lukkuun oktak kalimjōki ilo peļaakin laļ in. Komaron̄ tok jān baam̧le eo me ejjan̄in pād ilo Kabun̄ in ilo elōn̄ epepen ko. Ak bōlen kwe wōt eo membōr in Kabun̄ in ilo baam̧le eo am̧. Komaron̄ juon eo em̧ōj an m̧are ak eo ejjan̄in, elōn̄ ajri ak ejjeļo̧k ajri ilo mōko.
Mekarta apan̄ ko am̧, komaron̄ kōm̧m̧an bwe m̧weo im̧ōm en pedped ioon ekkatak im mour an gospel. Ej meļeļein bōk make eddo n̄an oktak eo am̧ make im eddōkļo̧k ilo jetōb. Ej meļeļein ļoore katak eo an Būreejtōn Nelson “n̄an [bar karōke m̧weo] im̧ōm̧ n̄an juon jikin ekwojarjar an tōmak.”8
Rikapo eo enaaj kajjieon̄ kipel eok n̄an ļōmņak bwe kōkajoorļo̧k ko an jetōb rejjab aorōk ak, eļapļo̧k an ejjeļo̧k tokjān, me emaron̄ kōttar. E ej irooj in ļōkapokpok im irooj in aepādpād. Enaaj kajjieon̄ bōktok men ko jet me remaron̄ ilo lale menin ekairir n̄an kam̧ad eok, ak ilo m̧ool rejjab aorōk. Emaron̄ kar kōm̧m̧an bwe kwon likkuun “inepata kōn elōn̄ men ko” bwe kwon kaarmejete “juon men [me] eļap aikuji.”9
Eļap aō kam̧oolol kōn “jema im jinō ro rem̧m̧an,”10 ro rekar karūttoļo̧k baam̧le eo aer ilo juon em̧ eo emakijkij an kōkajoorļo̧k jetōb ko iien otemjej, jemjerā in iakwe ko, im m̧akūtkūt ko rekalimomo im rellōn̄. Katak kein kar katakin eō ke ikar juon jodikdik im ekar dāpij eō ilo jerbal em̧m̧an. Pāāren ro, jouj im kalōk jemjerā ko rekajoor ippān ajri ro nejūm̧. Rej aikuj eļapļo̧k iien ko am̧, ejjab dik.
Pedped ioon Kabun̄ in M̧okta
Ilo am̧ kōm̧m̧ane, Kabun̄ in ej pād n̄an jipan̄ eok. Makūtkūt ko ad ilo mōn jar eo emaron̄ rie kōkajoorļo̧k ko an jetōb ko me rej kōm̧m̧an ilo mōko. Jidiktak ilo iiō in, em̧ōj am lo jipan̄ in an Kabun̄ in im Jabōt Jikuuļ im Būraimere. Jenaaj lo eļapļo̧k ilo kweilo̧k ko bar an Likao ro im Jiron̄ ro barāinwōt. Jino jān Jāwōde in, curriculum eo n̄an kweilo̧k kein enaaj oktak jidik. Enaaj ejja pedped wōt ioon unin kōnono ko an gospel, ak unin kōnono ko me rejejjet wōt ippān Itok, Ļoor Eō—N̄an Kajjojo Armej im Baam̧le ko. Menin ej juon oktak edik, ak emaron̄ juon oktak eo eļap ilo kōkajoorļo̧k ko an jetōb an jodikdik ro.
Ta jipan̄ ko jet Kabun̄ in ej letok? Ilo mōn jar eo jej bōk kwojkwoj eo, eo ej jipan̄ kōj bar kōm̧m̧ani kallim̧ur ko ad n̄an Rilo̧mo̧o̧r kajjojo wiik. Im ilo mōn jar eo jej koba ippān ritōmak ro jet im em̧ōj aer kōm̧m̧ane ejja bujen kein wōt. Jemjerā ko rem̧m̧an jej kalōk ippān rikaļo̧o̧r ro jet an Jisōs Kraist remaron̄ erom̧ kein jipan̄ ekajoor n̄an rikaļloor ro me rej pedped ioon mōko mokta.
Ke ekar 14 aō iiō, baam̧le eo aō rekar em̧m̧akūtļo̧k n̄an juon bukōn ekāāl. Kiiō, menin ilo kalimjōkļo̧k emaron̄ juon men eļap an nana n̄an eok, ak ilo ļōmņak eo aō, ilo iien eo, ekar juon men ekabūrom̧ōjm̧ōj. Ekar meļeļein bwe inaaj pād ilubwilijin armej ro ijaje kajjeer. Kar meļeļein bwe aolepān ļaddik jodikdik ro ilo ward eo aō renaaj pād ilo juon jikuul oktak jān n̄a. Im ilo kōļmenļo̧kjen in an juon eo 14-iiō, ikar ļōmņak, “Etke jinō im jema rekar kōm̧m̧an āindein n̄an eō?” Ikar en̄jake āinwōt n̄e mour eo aō em̧ōj jerwane.
Bōtaab, jān m̧akūtkūt ko an Doulul Eo An Likao ro, ikar maron̄ n̄an kalōk jemjerā ko ippān ro jet uwaan doulul eo, im rekar jino erōm̧ m̧ōtta. Ilo kakobaba, ro uwaan bisoprik im rikapilōk ro an Priesthood eo an Aron rekar jino itok limoer ilo mour eo aō. Rekar itok n̄an iien ikkure ko aō. Rekar jeje naan in rōjan̄ me ikar kakoņi n̄an rainin. Rekar wōnm̧aanļo̧k wōt im enaan wōt ippa ālikin aō kar etal n̄an college im ke ikar em̧m̧akūt n̄an mijen. Juon iaer jon̄an ekar pād ilo airport eo ke ikar ro̧o̧ltok. Inaaj aolep iien kam̧oolol kōn brother ro aō rem̧m̧an im koba in aer iakwe im kōjatdikdik eļap. Rej tōl eō n̄an Jemedwōj Ilan̄, im mour eo aō ekar jino meram, em̧ōņōņō, im lan̄lōn̄.
Ekōjkan ad, āinwōt m̧am̧a im baba ro im ritōl ro, jipan̄ jodikdik ro jeļā bwe rejjab make iaer ilo aer etetal ilo iaļan bujen eo? Ilo kakobaba n̄an kalōk jemjerā ko ad make, jej kūr er n̄an iien koba kein reļļap im dik—jān kweilo̧k ko an N̄KJ im iien camp ko n̄an doulul ko kajjojo wiik im m̧akūtkūt ko an kūlaaj. Jab pere kajoor eo me ej itok jān ad ippān doon ippān ro jet me rej barāinwōt kajjieon̄ bwe ren kajoor. Bisop ro im ritōl ro jet, jouj im mije wōt ilo kōkajoorļo̧k ajri im jodikdik ro ilo ward eo am̧. Rej aikuji eļapļo̧k iien ko am̧, ejjab dik.
Men̄e kwoj juon ritōl, juon ritūrin, juon membōr in doulul eo, ak juon iaan Rikwojarjar, eļan̄n̄e ejjejōt iien eo n̄an am̧ ukot mour eo an juon jodikdik, jipan̄ e ļāeo ak e lieo ekkeijelļo̧k ippān aelōn̄ in lan̄. Waanjon̄o̧k eo am̧ emaron̄ lukkuun “pedped ioon Kabūn in” me rūm̧m̧an ded eo ej aikuji.
Ro jeiū im jatū, ij kam̧ool bwe Jisōs Kraist ej bōran Kabun̄ in. E ej kōketak ritōl ro ad im tōl kōkajoorļo̧k ko an jetōb me jej aikuji n̄an mour im eddōkļo̧k kaki ilo raan ko āliktata. Kōkajoorļo̧k eo an jetōb enaaj jipan̄ kōj tiljek im jab jatiljek. Ilo etan Jisōs Kraist, Amen.