Ineek Dōbwāāl Eo Ad
Bōk iood make dōbwāāl ko ad im ļoor Rilo̧mo̧o̧r eo ej meļeļein wōnm̧aanļo̧k kōn tōmak ilo iaļ eo an Irooj im jab kobaļo̧k ilo m̧wil ko an mour in.
Ro jeiū im jatū rejitōn bōro, jekar bōk katak ko rem̧m̧an jān ritōl ro ad ilo raan ko ruo remootļo̧k. Ij kam̧ool n̄an eok bwe eļan̄n̄e kajeon̄ mour kōn katak kein kar im̧we im kōm̧m̧an ilo jejjōt in iien ilo mour ko ad, Irooj, kōn iakwe eo An, enaaj jipan̄ kajjojo iaad ineek dōbwāāl eo ad im kōm̧m̧an bwe edodo ko ad ren mera.1
Ke raar pād ilo jikin eo an Caesarea Philippi, Rilo̧mo̧o̧r eo ekar kwaļo̧k n̄an rikaļoor ro An ta eo enaaj en̄taan kake ilo pā ko pein elder ro, pris ro routiej, im scribe ro ilo Jerusalem. Ekar ļap an kar katakin er kōn mej im Jerkakpeje aibojooj eo An.2 Ilo ejja iien eo wōt, Rikaļoor ro An rekar jab lukkuun meļeļe kōn mijen eo ekwojarjar An ioon laļ in. Pita make, ke ekar ron̄ ta eo Rilo̧mo̧o̧r eo ekar ba, ekar bōk E im kauwe E, im ba, “En ettoļo̧k jān Kwe, Irooj: menin e jāmin pād Ippam̧.”3
N̄an jipan̄ rikaļoor ro An meļeļe bwe kijejeto n̄an jerbal eo An ekūtbuuj leļo̧k ad im en̄taan, Rilo̧mo̧o̧r eo ekar kwaļo̧k ilo alikkar:
“Jabdewōt eo e kōņaan ļoor Eō, en make kaarmejjete, im ineek debwāāl eo an, im ļoor Eō.
“Bwe jabdewōt eo e kōņaan lo̧mo̧o̧ren mour eo an, mour enaaj jako jān e; im jabdewōt eo mour enaaj jako jān e kōn N̄a, enaaj lo e.
“Bwe ekōjkan kakajooror armej eļan̄n̄e ej jibadek aolepen laļ im e jako an? Ak ta eo armej e enaaj lelōm wiaik an?”4
Kōn naan in kean̄ in, Rilo̧mo̧o̧r eo ekar kalikkar bwe aolep ro rej m̧ōņōņō n̄an ļoor E rej aikuj kaarmejete er make im kajebwābweik kōņaan ko aer, an̄ūrlep ko, im men ko rej iakwi, wūjlepļo̧k men otemjej, barāinwōt mour in eļan̄n̄e emenin aikuj, ilo lukkuun wūjlepļo̧k n̄an kilaan Jemed—āinwōt An kar.5 Menin ej, ilo m̧ool, wōnāān eo n̄an kōļļaik lo̧mo̧o̧r eo an juon jetōb. Jisōs ekar kōjerbal kōkaļļe in debwāāl eo kōn wōr unin im keidi n̄an jipan̄ rikaļoor ro An em̧m̧anļo̧k aer meļeļe ta lukkuun naaj meļeļein en̄taan im kijejeto n̄an Irooj. Pija eo an juon debwāāl kar ļap jeļn̄ kake ilubwilijin rikaļoor ro An im ro raar jokwe ilo iien ko Empire eo an Rome kōnke riRome ro rekar kōjerbal debwāāl meļeļe eo n̄an n̄an kabōjrak jum̧ae im kaamijak armej ro rekar anjo ioer.6
Kar ālikin wōt Jerkakpeje eo An ke kōļmenļo̧kjeņ ko an rikaļoor ro rekar peļļo̧k n̄an meļeļe aolepān men ko kar je kōn E7 im ta eo enaaj kar menin aikuj jān er jān iien eo m̧aanļo̧k.8
Ilo ejja jekjek eo, kōj aolep aikuj meļeļe eļapļo̧k kōn m̧ool in bōk iood make debwāāl ko ad im ļoore E. Jej ekkatak jān jeje ko rekwojarjar bwe ro rej kōņaan bōk debwāāl eo aer ioer make rej iakwe Jisōs Kraist ilo juon jekjek eo me rej kaarmejete er make jān aolepān men ko an laļ in im jān an̄ūrlep ko an laļ in im kōjparok kien ko An.9
Kijejeto eo ad n̄an joļo̧k aolep men ko rejōkkar n̄an ankilaan Anij im n̄an wūjlepeļo̧k aolepān men ko kar kajjitōk ippād n̄an leļo̧k im n̄an ļoor katak ko An enaaj jipan̄ kōj niknik ilo iaļ eo an gospel an Jisōs Kraist—men̄e ilo iien jorrāān otemjej, jetōb ko ad rej m̧ōjņo̧, ak ankeke eo an ikitōltōl im katak ko an laļ in im rej jum̧ae katak ko An.
N̄an waanjon̄o̧k, n̄an ro rejjan̄in lo eo juon karejeran n̄an indeeo im emaron̄ en̄jake ajimakeke im ejjeļo̧k kōjatdikdik, ak n̄an ro em̧ōj aer jepel im en̄jake atajinemjen im em̧ōj meļo̧kļo̧k e, ij kam̧ool n̄an kwe bwe bōk kūr eo an Jisōs n̄an kotak debwāāl ko ami ioomi make im ļoor E ej meļeļein wōnm̧aanļo̧k kōn tomak ilo iaļ eo an Irooj, dāpij wōt juon jekjek in m̧ool, im jab po ilo m̧wil ko an laļ in me renaaj jidik jidik bōk kōjatdikdik eo ad ilo iakwe im jouj an Anij.
Ejja katak kein wōt rej n̄an kom̧ ro rej deel ilo en̄jake an m̧aan n̄an m̧aan im kōrā n̄an kōrā im en̄jake pere im m̧ōjņo̧. Im bōlen kōn un in jejjo iaami emaron̄ en̄jake bwe gospel eo an Jisōs Kraist ejako an kiiō n̄an kwe. Eļan̄n̄e un eo in, ij kwaļo̧k n̄an eok bwe elōn̄ kōjatdikdik aolep iien ilo Anij eo Jemed im ilo karōk in m̧ōņōņō eo An, ilo Jisōs Kraist im pinmuur eo An, im ilo mour kōn kien ko Aer rem̧m̧an. Ilo jeļāļo̧kjen eo An ejjab likjab, kajoor, ekajet jim̧we, im tūriam̧o, Irooj emaron̄ kapen kōj bwe en An, bwe jān maron̄ bar jepļaakļo̧k n̄an Ippān im bōk mour indeeo, eļan̄n̄e jej pen im dim im tōt ilo kōjparok kien ko an10 im kōm̧m̧ani jerbal ko rem̧m̧an aolep iien.11
N̄an ro em̧ōj aer kōm̧m̧an jerawiwi ko reļļap, bōk ejja kūr in wōt ej meļeļein, ippānļo̧k men ko jet, n̄an kōttāik eok make im̧aan Anij, n̄an kōnono ippān ritōl ro an Kabun̄ in, im n̄an ukweļo̧k im etal jān jerawiwi ko am̧. Wāween in enaaj barāinwōt kōjeram̧m̧an aolep ro renaaj jum̧ae an̄ūrlep ko rekajoor, ekoba uno ko, uno ko rekajoor, dānin kadōk, im pija ko renana. Bōk bun̄tōn kein ej boktok eok n̄an ippān Rilo̧mo̧o̧r, eo emaron̄ kajju karo̧o̧ļļo̧k eok jān ajļo̧k, būrom̧ōj, im kam̧akoko ko an jetōb im ānbwin. N̄an kakobaba, komaron̄ barāinwōt kōņaan kappukot jipan̄ jān baam̧le eo am̧, ro m̧ōttam̧, im rimālōtlōt ro retijemļo̧k an ājmour im kapilōk.
Jouj im jab bōjrak ālkin elōn̄ iien ko ejjeļo̧k tōprak im kwōj kile eok make ejjeļo̧k am̧ maron̄ n̄an joļo̧k jerawiwi ko im eļļā jān an̄urlep ko. Kwojjab maron̄ bōjrak am̧ kajeon̄ im tokālik wōnm̧aanļo̧k ilo m̧ōjņo̧ im jerawiwi! Kate eok aolep iien n̄an kōm̧m̧an jon̄an eo komaron̄ e, kwaļo̧k ilo jerbal ko am̧ kōņaan eo n̄an karreo būruwōd, āinwōt kar katakin jān Rilo̧mo̧o̧r eo.12 Jet iien uwaak ko n̄an jet apan̄ ko ej itok ālkin allōn̄ ko im allōn̄ ko in kijejeto ko rej wōnm̧aanļo̧k wōt. Kallim̧ur eo ilo Bok in Mormon me “ej jān jouj jej mour, ālikin aolep ijo jemaron̄ kōm̧m̧ane make,”13 ej peļļo̧k ilo jekjek kein n̄an kōj aolep. Jouj im keememej bwe menin letok in jouj eo an Rilo̧mo̧o̧r eo ejjab n̄an jidik wōt iien n̄an ‘ālikin’ aolep men jemaron̄ kōm̧m̧an make. Jemaron̄ bōk jouj eo An m̧okta, lukon, im ālkin iien eo n̄e jej kōdepakpakļo̧k kijejeto ko ad make.”14
Ij kam̧ool bwe ilo ad wōnm̧aanļo̧k wōt im kate kōj n̄an anjo̧ ioon idajon̄jon̄ ko, Anij enaaj kōjeram̧m̧an kōj kōn menin letok ko an tōmak n̄an bōk ājmour im kōn jerbal in menin bōlōn̄ ko.16 Enaaj kōm̧m̧ane n̄an kōj ta eo jejjab maron̄ n̄an kōm̧m̧ane n̄an kōj make.
Barāinwōt, n̄an ro rej en̄jake nana, illu, ļōkatip, ak em̧ōj pauti kōn aen in būrom̧ōj kōn juon men kwoj en̄jake an jab kar aikuj waļo̧k, n̄an kotak an juon debwāāl im ļoor Rilo̧mo̧o̧r ej meļeļein n̄an kate n̄an likūt en̄jake ko im oktakļo̧k n̄an Irooj bwe E en maron̄ kōrōļo̧k kōj jān kōļmenļokjen rōt in im jipan̄ kōj kappukot ainem̧m̧an. Ijo wōt ke, eļan̄n̄e jej dāpij ļōmņak kein im en̄jake ko renana, jemaron̄ lo bwe jenaaj mour kōn ejjeļo̧k tōl jān Jetōb eo an Irooj ilo mour ko ad. Jejjab maron̄ ukweļo̧k n̄an armej ro jet, bōtaab jemaron̄ joļo̧k aer bōd—ilo ad jab kōtļo̧k kōj n̄an kōm̧akoko jān ro raar kōmetak kōj.16
Jeje ko rekwojarjar rej katakin bwe elōn̄ juon iaļ n̄an diwojļo̧k jān jekjek kein—ilo ad kūrtok Rilo̧mo̧o̧r n̄an jipan̄ kōj ukot bōro ko ad redekāke ippān bōro ko rekāāl.17 Bwe menin en waļo̧k, jej aikuj itok n̄an Irooj kōn m̧ōjņo̧ ko ad, kōttāik kōj make im̧aan E18 im eowo̧r jipan̄ im An jeorlo̧k ad bōd,20 eļaptata ilo iien eo ekwojarjar n̄e jej bōk kwojkwoj eo kajjojo Jabōt. Jān kappukot tūriam̧o eo An im Jipan̄ eo An im jān bōk juon men aorōk im bun̄tōn epen jān joļo̧k an ro raar kōmetak kōj bōd bwe kinej ko ad ren maron̄ jino moļo̧k. Ij kallim̧uri eok bwe ilo am̧ kōm̧m̧ane menin, bon̄ ko am̧ renaaj obrak kōn ineem̧m̧an me ej itok jān kōļmeļo̧kjen eo aenōm̧m̧an ippān Irooj.
Ke raar pād ilo jikin kalbuuj Liberty ilo 1839, Rikanaan Josep Smith ekar je juon leta n̄an ro uwaan Kabun̄ in eo epād ie kanaan ko me eļap aer ekkar n̄an aolep jekjek im wāween kein. Ekar je, “Aolep tūroon ko im mo̧jen ko, tōln̄an ko im kajoor ko, naaj kwaļo̧ki im likūti ioon aolep ro rekar kijenmej ilo peran kōn gospel eo an Jisōs Kraist.”20 Āindein, ro jeiū im jatū rejitōn bōro, ro rej bōk ioer make āt eo etan Rilo̧mo̧o̧r, lōke ilo kallim̧ur ko An im niknik n̄an jem̧ļo̧kin, enaaj mour21 im emaron̄ jokwe ippān Anij ilo wāween m̧ōņōņō eo ejjeļo̧k jem̧ļo̧kin.22
Jej aolep jelm̧ae mālijjon̄ ko an laļ in ilo mour ko ad me remaron̄ kōmm̧an bwe jen būrom̧ōj, ejjeļo̧k maron̄, jako kōjatdikdik, im jet iien m̧ōjņo̧. Jejjo iien en̄jake kein remaron̄ tōl kōj n̄an kajjitōkin Irooj; “Etke ij ioone jekjek rōt kein?” ak “Etke kōtmene ko ad rejjab tōprak? Āliktata, ij kōm̧m̧ane aolep men ilo kajoor eo aō n̄an kotak debwāāl eo aō im ļoor Rilo̧mo̧o̧r!”
Ro m̧ōtta rejitōn bōro, jej aikuj keememej bwe bōk iood debwāāl eo ad make ekūtbuuj ettā im lōke ilo Anij im ilo jeļāļo̧kjen eo An ejjeļo̧k jem̧ļo̧kin. Jej aikuj kile bwe E ejeļā kōn kajjojo iaad im aikuj ko ad ilo ad. Ej barāinwōt menin aikuj n̄an meļeļe kōn m̧ool eo bwe awa eo an Irooj eoktak jān eo ad. Jet iien jej kappukot juon kōjeram̧m̧an im kōjenolo̧k juon iien ekadu n̄an Irooj n̄an kakūrm̧ool e. Jejjab maron̄ kwaļo̧k ad tiljek ilo ad kāletļo̧k iien n̄an E n̄an uwaake kōņaan ko ad. N̄e jej kōm̧m̧ane menin, jej āinwōt riNipai ro eļap pere ippāer jān iien ko etto, ro raar kajirere kōn brother im sister ro aer im ba bwe iien eo emootļo̧k n̄an kakūrm̧ool e naan ko kar ba jān Samuel riLaman eo, kōm̧m̧an pok ilubwilijin ro rej tōmak.23 Jej aikuj lōke Irooj ebwe n̄an tōt im jeļā bwe E ej Anij, bwe E ejeļā men otemjej, im bwe E ejeļā kōn kajjojo iaad.24
Jidik iien emootļo̧k ikar bōk iien eo n̄an kwaļo̧k n̄an juon kōrā emej pāleen etan sister Franca Calamassi, eo ekar en̄taan jān juon naninmej ekam̧ōjņo̧ņo̧. Sister Calamassi ekar membōr eo m̧oktata ilo baam̧le eo an n̄an kobaļo̧k ippān Kabun̄ in an Jisōs Kraist me em̧ōj an jepļaaktok. Men̄e ļeo ippān ekar jab peptaij, ekar wōnm̧aanļo̧k im ekkatak ippān mijenede ro im kijon̄ etal n̄an kweilo̧k ko an Kabun̄ in. Jekdoon menin kapan̄pan̄ kein, Sister Calamassi ekar pād wōt im tōmak im karūttoļo̧k ajri ro emān nejin ilo gospel eo an Jisōs Kraist. Juon iiō ālkin an mej ļeo pāleen, Sister Calamassi ekar bōk ajri ro nejin n̄an tampeļ eo, im rekar pād ilo kain̄i ko rekwojarjar im kar liape er ippān doon āinwōt juon baam̧le. Kallim̧ur ko rej kobaļo̧k ippān kain̄i kein kar boktok kōjatdikdik eļap n̄an e, lan̄lōn̄, im m̧ōņōņō me ekar jipan̄ e wōnm̧aanļo̧k wōt ilo mour in.
Ke kōkaļļe ko jinoin an naninmej eo kar jino waļo̧k, bisop eo an ekar leļo̧k n̄an e juon kōjeram̧m̧an. Ilo iien eo ekar ba n̄an bisop eo an bwe epojak n̄an bōk kilaan Irooj, kwaļo̧k an tōmak n̄an bōk ājmour barāinwōt tōmak eo an n̄an kate m̧aanļo̧k kōn nan̄inmej eo an n̄an jem̧ļo̧kin.
Ilo iien loļo̧k eo aō, ke ikar jibwe pein Sister Calamassi im kalimjōkļo̧k mejen, ikar lo meram in enjeļ ej waļo̧k jān turin mejen—ej kwaļo̧k lōke eo an ilo karōk eo an Irooj im kōjatdikdik eo an emeram ilo Iakwe eo an Jemed im karōk eo An n̄an e.25 Ikar en̄jake kije eo edim eo an n̄an niknik ilo tōmak eo an m̧ae āliktata ilo an kotak debwāāl eo an, jekdo̧o̧n mālijjon̄ ko ej iooni. Mour in an sister in ej juon kam̧ool kōn Kraist, juon kam̧ool kōn tōmak eo an im kijejeto eo an n̄an E.
Ro jeiū rejiten bōro, ij kam̧ool n̄an eok bwe kotak debwāāl ko ad iood im ļoor Rilo̧mo̧o̧r eo aikuj bwe jān ļoor waanjon̄ok ko an im kajeon̄ erom̧ āinwōt E,26 kijenmej ilo jelm̧ae idajon̄jon̄ ko an mour in, kaarmejete kōņaan ko an armej ilo lukkuun pikitokin, im kōttar ippān Irooj. Juon Rijeje Al ekar jeje:
“Kwōn kattar Jeova, kwōn kajoor, im būruom̧ en peran wōt, aet, kwōn kattar Jeova.”27
“E am Ri jipan̄ im am likōpejn̄ak.”28
Ij kam̧ool n̄an eok bwe ilo ad ļoor jenkwan ne ko neen M̧aajta eo ad im kōttar E eo ej ri kāājmour eo em̧ool ilo mour ko ad enaaj letok kakkije n̄an jetōb ko ad im kōm̧m̧an bwe ad eddodo ren pidodo im mera.29 Kōn men kein Ij kam̧ool ilo etan ekwojarjar Jisōs Kraist, amen.