Kien ko Ruo Reļļap
Jej aikuj jim̧or kōjparok kien ko ruo reļļap. N̄an kōm̧m̧an āindein jej etetal ilo juon iaļ kōtaan kien im iakwe.
Ro jeiū im jatū jitōn bōro ilo gospel in an Jisōs Kraist, ij iakiakweik kom̧ āinwōt ribōk eddo ro rekwojarjar kōn baam̧le eo indeeo. Būreejtōn Russell M. Nelson ekar katakin kōj, “Kabun̄ in ekar jepļaaktok bwe baam̧le ko ren maron̄ ejaak, liāp, im mour indeeo.”1 Katak in eaorōk ejelet armej ro rej kile er lesbian, kajpila, m̧ōm̧ an kanniōk, ak ukōt m̧ōrāer, āinwōt ba er LGBT.2 Būreejtōn Nelson eaar bar kakeememej kōj bwe jej jab “aikuj [aolep iien] errā ippān doon, bwe jen iakwe doon.”3 Kanaan in katak kein raorōk n̄an ekōnono ko an baam̧le n̄an uwaake kajjitōk ko an ajri ro im jodikdik ro. Iaar lukkuun jar n̄an pukot im̧we n̄an kōnono n̄an jarlepju in kōnke ejelet kom̧ kajjitōk kein, eo me ekajju im jejjet n̄an kajjojo baam̧le ilo Kabun̄ in.
I.
Inaaj jino kōn ta eo Jisōs eaar kwaļo̧ke kōn kien ko ruo reļļap
“Kwōn yokwe Irooj am̧ Anij kōn aolepen būruom̧ im kōn aolepen am̧, im kōn am̧ ļōmņak otemjej.
“En̄in ej kien eo eļap im m̧oktata.
“Im eo kein ka ruo āinwōt in, Kwōn yokwe ri turum̧ im āinwōt kwe.”4
Meļeļein kar kakien kōj n̄an iakwe jabdewōt, jen kar būrabōļ in katak eo an Jisōs kōn riSamaria eo em̧m̧an bwe aolep rej ro riturur.5 Ak kōttōbar eo ad n̄an kōjparok kien eo kein karuo ejjab aikuj kōm̧m̧an bwe jen meļo̧kļo̧k eo m̧oktata, n̄an iakwe Anij kōn aolepen būruwōd, ad, im ļōmņak. Jej kwaļo̧k iakwe in ilo “kōjparok kien ko [An].”6 Anij ekōņaan bwe jen pokake kien ko An kōnke kōn wōt pokake, ekoba ukweļo̧k, jemaron̄ jepļaak n̄an im̧aan Mejen im erom̧ wāppen āinwōt E.
Ilo kōnono eo an n̄an rūm̧m̧an ded ro an Kabun̄ in, Būreejtōn Russell M. Nelson eaar kōnono kōn ta eo jej ņaetan “jemdoon eo ekajoor kōtaan iakwe eo an Anij im kien ko An.”7 Kien ko rej jerbal n̄an katak ko reinļo̧k wōt n̄an kile ro āinwōt LGBT ilo kien ko an Anij kōn m̧are im jemjerā eo kōn kien erreeo. Rej aorōk jim̧or ilo karōk in lo̧mo̧o̧r eo an Jemed Ilan̄ n̄an ro Nejin. Āinwōt an kar Būreejtōn Nelson kwaļo̧k, “kien ko an Anij rej kajju waļo̧k jen iakwe eo An ejjeļo̧k jem̧ļo̧kin n̄an kōj im kōņaan eo An n̄an kōj ej n̄an erom̧ aolep men eo jemaron̄ in erom̧.”8
Būreejtōn Nelson ekar katakin: “Elōn̄ laļ ko … kōmālim m̧are kōtaan ļeo n̄an ļeo im lieo n̄an lieo. Āinwōt membōr ro an Kabun̄ in, jej kautiej kien ko an laļ eo … , ekoba kien m̧are. Mool eo, ijoke, bwe ilo jinoin … m̧are kar ekkapit in Anij! Im n̄a rainin kar kōmeļeļe jen E āinwōt kōtaan juon em̧m̧aan im juon kōrā. Anij ekar jab ukōt An kōmeļeļeik m̧are.”
Būreejtōn Nelson ekar wōnm̧aanļo̧k wōt “Anij ekar jab bar ukōt An kien kōn kien erreeo. Kien ko n̄an deļo̧n̄e tampeļ ekar jab oktak.”9
Būreejtōn Nelson eaar kakeememej kōj bwe “jerbal eo ad āinwōt Rijilōk ro ej n̄an katakin jaab jabdewōt ak m̧ool. Jerbal in ejjab letok n̄an [Rijilōk ro] mālim eo n̄an ukōtļo̧k kien eo ekwojarjar.”10 Aaet, kōrā ro jeiū im jatū, ritōl ro an Kabun̄ in rej aolep iien kwaļo̧k katak eo eaorōk kōn m̧are kōtaan juon em̧m̧aan im juon kōrā im jemdoon eo kōn kien erreeo.
II.
Jerbal eo an Kabun̄ eo an Jisōs Kraist im Armej ro Rekwojarjar ilo Raan Ko Āliktata ej kanooj kea kake n̄an kōpooj ro nejin Anij n̄an aelōn̄ in celestial, im eļaptata n̄an aiboojoj eo eutiejtata, mour ippān Anij ak mour indeeo. Mejenkajjik in eutiejtata ej maron̄ in waļo̧k wōt kōn m̧are n̄an indeeo.11 Mour indeeo ekoba kajoor eo n̄an ejaak ilo koba eo an em̧m̧aan im kōrā eo12—ta revelesōn eo raan kein ej kōmeļeļeiki kōn “ej wōnm̧aanļo̧k wōt in ine ko ineero indeeo im indeeo.”13
Ilo kōnono eo an n̄an jodikdik ro, Būreejtōn Nelson ekar katakin, “Pād wōt ippān kien ko an Anij enaaj kōjparok eok ilo eddōkļo̧k eo am̧ n̄an ijo eutiejtata”14—en̄in bwe, n̄an erom̧ āinwōt Anij, kōn mour eo eutiejtata im jibadbad eo ekwojarjar an Jined im Jemedwōj Ilan̄. En̄in ej mejenkajjik eo jej kōņaan n̄an aolep ro jej iakwe. Kōn iakwe in, jeban kōtļo̧k ad iakwe en bōk jikin kien ko im karōk im jerbal eo an Anij, eo jej jeļā enaaj bōktok ro jej iakwe m̧ōņōņō eo aer eļap.
Ak elōn̄ ro jej iakwe, ekoba ro raar bōk gospel in em̧ōj an kar jepļaaktok, ro rejjab tōmak ilo ak kālet n̄an jab ļoor kien ko an Anij kōn m̧are im kien erreeo. Ak er?
Katak eo an Anij ej kwaļo̧k bwe kōj aolep rej ajri ro Nejin im bwe Eaar kōm̧anm̧an kōj n̄an bōk m̧ōņōņō.15 Revelesōn eo raan kein ej kwaļo̧k bwe Anij eaar letok juon karōk n̄an mour wababan in eo me aolep remaron̄ kālet n̄an pokake n̄an pukot kōjeraam̧m̧an ko reļļap ak kōm̧m̧ani kālet ko me ej tōl ļo̧k n̄an juon iaan aiboojoj ko reddikļo̧k.16 Kōn iakwe eo eļap an Anij n̄an aolep ro Nejin, aiboojoj kein reddikļo̧k rej aiboojoj wōt ijeļo̧kkin maron̄ keidi n̄an mour wabanban in.17 Pinmuur eo an Jisōs Kraist ekōm̧m̧an bwe menin ej jerbal, ilo An “kaiboojoj Jemen, im kōjparok aolep jerbal ko an Pein.18
III.
Iaar kōnono kōn kien eo m̧oktata, ak ta eo kein karuo? Elmen ad kōjparok kien n̄an iakwe ro riturur? Kōmij kipel membōr ro am̧ bwe ro rej ļoor lesbian, kajpila, m̧ōm̧ an kanniōk, ak ukōt m̧ōran katak ko im m̧akūtkut ko reaikuj in kōm̧m̧an ilo iakwe an ad Rilo̧mo̧o̧r eo eaar kipel kōj n̄an kwaļo̧ke n̄an aolep ro riturur. Mekarta, n̄e pālele kōtaan m̧aan n̄an m̧aan ak kōrā n̄an kōrā kar kwaļo̧k ke emālim ilo United States, Būreejtōnji eo Kein Kajuon im Doulul eo an Jon̄oulruo Rijilōk ro rekar kwaļo̧k: “Gospel eo an Jisōs Kraist ej katakin kōj n̄an iakwe im kōm̧m̧an n̄an aolep armej kōn jouj im meanwōd—aaet men̄e jejjab errā. Kōmij kapene bwe ro rej kōm̧m̧ani kakien ko ak kōmālim kakien eo ilo jikin ekajet eo kōn m̧are kōtaan ļeo n̄an ļeo im lieo n̄an lieo jej aikuj in kautiej er.”19
Mekarta, jejjab aikuj kōjekdoon ro rejjab kwaļo̧k tōmak im kallim̧ur ko ad.20 Ekaburom̧ōjm̧ōj, jet armej rej jelm̧ae men kein im en̄jake ke ewōr tokjeer im kowaan jen membōr ro im ritōl ro ilo baam̧le ko ad, ward, im stake. Jej aikuj aolep kajjieon̄ in jouj im kemaanwa.
IV.
Kōn elōn̄ un ko jejjab meļeļe, ewōr ad apan̄ ko reoktak ilo mour wabanban in ad. Ak jej jeļā bwe Anij enaaj jipan̄ kōj kajjojo anjo̧ jen apan̄ kein eļan̄n̄e jej lukkuun pukot jipan̄ eo An. Ālkin en̄taan im ukweļo̧k jen kar kakkure kien ko kar katakin kōj, jej aolep jipadōkļo̧k juon iaan aiboojoj ko. Ilo eļaptata im ekajet eo āliktata enaaj kōm̧m̧an jen Irooj, eo enaaj kitbuuj jeļāļo̧kjeņ, mālōtkōt, im jouj n̄an ekajete kōj kajjojo.
Ilo tōrein, jej aikuj aikuj jim̧or kōjparok kien ko ruo reļļap. N̄an kōm̧m̧an āindein jej etetal ilo juon iaļ kōtaan kien im iakwe—kōjparok kien ko im etetal ilo iaļen bujen in, ilo ad iakwe ro riturur. Etetal ilo iaļen bujen in ekōm̧m̧an bwe jen pukot im̧we eo ekwojarjar kōn ta n̄an jipan̄ im ta n̄an jum̧ae im kilen iakwe im ron̄jake im wāween katakin. Etetal ilo iaļen bujen in ad me jeban keidi ilo kien ko ak kwaļo̧k juon jon̄ak in meļeļe elikio im iakwe. Etetal in ad eaikuj in ļōmņak kōn ajri ro rejjab jeļā kōn m̧ōm̧ an kanniōk, ak ekabweer jokkon in mour kōnke, aolep ajri, aolep iien ajri ro eddik aorōk eo aer.21 Etetal ilo iaļen bujen in ad ej jum̧ae rijerbal ro ad jān iaļen bujen in, n̄an kaarmejet jipan̄ n̄an jabdewōt ro rej tōl ļo̧k armej ro jān Irooj. Jen aolepen menin jen keememej bwe Anij ej kallim̧ur kōn kōjatdikdik im m̧ōņōņō im kōjeraam̧m̧an ko ejjeļo̧k jem̧ļo̧kin n̄an aolep ro rej pokake kien ko An.
V.
M̧am̧a im baba ro im kōjwōj aolep jej eddo n̄an katakin jim̧or kien ko ruo reļļap. N̄an kōrā ro an Kabun̄ in, Būreejtōn Spencer W. Kimball kōmeļeļeiki bwe jerbal eo ilo kanaan in eļap: “Elōn̄ iaan wōnm̧aanļo̧k ko reļļap rej waļo̧k ilo Kabun̄ in ilo raan ko āliktata kōnke elōn̄ kōrā ro rem̧m̧an ilo laļ in … renaaj kobatok ilo Kabun̄ in kōn oran bōnbōn eo eļap. Menin enaaj bōk jikin n̄an jon̄an eo me kōrā ro ilo Kabun̄ in renaaj romak kōn wāppen im bōk koņaer ilo mour ko aer n̄an jon̄an eo me kōrā ro jet ilo Kabun̄ in rej loe er āinwōt rejenoļo̧k im oktak—ilo wāween ko rekam̧ōņōņō—jān kōrā ro jet ilo laļ in.” Enaaj waanjon̄ak ko an kōrā ro an Kabun̄ in ro renaaj erom̧ juon kareel eo ekajoor ilo jim̧or oran im eddōkļo̧k in jetōb an Kabun̄ in ilo raan ko āliktata.”22
Kōnono kōn kanaan in, Būreejtōn Russell M. Nelson eaar kwaļo̧k bwe “raan eo me Būreejtōn Kimball eaar kanaan ej rainin. Kom kōrā ro eaar kanaan kake er!”23 Kōj ro jaar ron̄ kanaan in 40 iiō ko remootļo̧k kar jab kile bwe ilubwiljin kōrā ro an Kabun̄ in renaaj lo̧mo̧o̧ren ro m̧ōttaer rejitenbōro im baam̧le ko me rej m̧weiir kiiō kōn men pata im m̧oņ ko an laļin. Aō jar im kōjeraam̧m̧an ej bwe kom̧ naaj katakin im m̧akūtkūt n̄an kakūrm̧ool kanaan in, ilo etan Jisōs Kraist, amen.