Manatsara ny zavatra iainantsika any amin’ny tempoly

Nosoratan’ny Fiadidiana Voalohany

“Ny tempoly masina no ampahany manan-danja indrindra amin’ny Famerenana amin’ny laoniny. Manan-danja amin’ny fanomanana ny olona izay vonona ny handray ny Mpamonjy amin’ny Fiaviany fanindroany ireo ôrdônansy sy fanekempihavanana masin’ny tempoly.”¹

Indraindray ny Fiadidiana Voalohany dia nanao fanovana mikasika ireo fitafiana sy fizotran’ny zavatra atao any amin’ny tempoly mba hanatsarana ny zavatra iainan’ireo mpikambana any amin’ny tempoly sy mba hanampiana ny rehetra izay miditra ao anatin’izany hahatsapa fifandraisana akaiky kokoa amin’ Andriamanitra ao anatin’izany toerana masina izany.

Anisan’ny ao anatin’ny zavatra iainana ao amin’ny tempoly ny fanaovan’ny mpikambana fitafiana fanao rehefa manao ireo fombafomba ao amin’ny tempoly izay misy dikany ara-potopampianarana ary ara-tandindona, izay azo soritana miverina mankany amin’ny fitsaohana ao amin’ny tempoly ao amin’ny Testamenta Taloha (jereo ny Levitikosy 8 sy ny Eksodosy 28).

Nisy fanovana vitsivitsy natao mikasika ny fitafiana fanao rehefa manao ireo fombafomba ao amin’ny tempoly. Tsy maneho fanovana momba ireo tandindona sy fotopampianarana ao amin’ny tempoly akory ireo fanovana ireo fa natao mba hahatonga ny zavatra iainana ao amin’ny tempoly ho tsotra sy mampahazo aina ary mora takatra kokoa amin’ny alalan’ny fanaovana ny fitafiana ho mora hanaovana sy ho mora karakaraina sy ho mora azo.

Ny sasany amin’ireo fanovana ireo dia ahitana:

Fanatsorana kokoa ny endriky ny voaly sy ny akanjo lava.
Fanesorana ilay fanenjanana vita amin’ny plastika eo amin’ny satroka sy ilay tady kely famatorana eo amin’ny satroka sy ny voaly.
Fampiasana lamba izay maharitra kokoa ka mitovy izany ho an’ireo akanjo lava sy satroka ary ny fehikibo mba hampateza azy ireo kokoa sy mba hahamora karakaraina azy ireo.

Manantena izahay fa ireo fanovana ireo dia hanampy amin’ny fanatsarana izany zavatra masina iainana izany ho anao rehefa mampiditra ny fitsaohana any amin’ny tempoly ho anisan’ny zavatra atao tsy tapaka eo amin’ny fiainanao ianao.

Valin’ireo fanontaniana misy mametraka matetika

Moa ve aho afaka manohy mampiasa ny fitafiana fanao rehefa manao ireo fombafomba ao amin’ny tempoly izay efa ananako?

Eny. Azo tohizana ny fampiasana ireo zavatra ireo izay mbola tamin’ny endriny teo aloha mandra-panoloana azy ireo.

Ahoana no fomba fanariana araka ny tokony ho izy ireo fitafiana taloha izay fanao rehefa manao ireo fombafomba ao amin’ny tempoly ?

“Rehefa simba ireo fitafiana fanao rehefa manao ireo fombafomba ao amin’ny tempoly ka tsy hampiasa izany intsony ny mpikambana dia tokony hopotehiny ilay fitafiana amin’ny alalan’ny fanetezana izany mba tsy hahafantarana intsony ny zavatra nampiasana izany tamin’ny voalohany” (Boky Torolalana 2: Fitantanana ny Fiangonana [2010], 21.1.42).

Afaka manova ny fitafiana ananako amin’izao fotoana izao ve aho mba hifanaraka amin’ireo fanovana vaovao?

Eny. Afaka mahita fampahalalana bebe kokoa momba izany ianao ao amin’ny store.ChurchofJesusChrist.org/ceremonialclothing rehefa miditra amin’ny alalan’ny kaonty maha-mpikambana anao ianao na amin’ny alalan’ny fitsidihina ireo Sampan-draharaha mpaninjara ary manontany ny tompon’andraikitra ao amin’ny fivarotana.

Afaka manao fanomezana ilay fitafiana taloha izay fanao rehefa manao ireo fombafomba ao amin’ny tempoly ve aho?

Rehefa mety dia afaka manolotra amin-katsaram-panahy fitafiana efa nampiasaina ho an’ireo olona ao amin’ny fianakaviana na namana izay nandray fanafiana masina ianao. Saingy tsy tokony homena ny tempoly na ny Deseret Industries na izay mety toerana ahafahana manakalo fitafiana ny fitafiana fanao rehefa manao ireo fombafomba ao amin’ny tempoly na manao ahoana na manao ahoana ny hatsarany.

Ahoana no fomba hahazoako ilay fitafiana vaovao fanao rehefa manao ireo fombafomba ao amin’ny tempoly?

Mba hahazoana fampahalalana mikasika ny vidin’izany sy ny fisian’izany any amin’ny faritra misy anao, dia midira ao amin’ny store.ChurchofJesusChrist.org/ceremonialclothing na mitsidiha Sampan-draharaha mpaninjara.