Na iDola na iTukutuku
Meda vakasaqara, ena sala kece sara eda rawata, meda rogoci Jisu Karisito, e vosa vei keda ena kaukauwa mana kei na veiqaravi ni Yalo Tabu.
Kemuni na taciqu kei na ganequ, ni keitou kidavaki kemuni mai ki na koniferedi raraba vaka irogorogo oqo ni Epereli 2020 ni Lotu i Jisu Karisito ni Yalododonu Edaidai, ena inaki o ni kila vinaka, au tu ena dua na vale lala!
Au sega sara ni namaka, ena yalayala au cakava vei kemuni ena koniferedi raraba ni Okotova 2019 ni na dua na koniferedi “guilecavi dredre” ka “tawa guilecavi rawa,” na koniferedi ni Epereli niu na mai vosa ki na dua na ivavakoso e lailai mai na 10 na tamata au raica rawa ka na yaco sara kina me dua na koniferedi guilecavi dredre ka tawa guilecavi rawa vei au! Ia noqu kila tu ni o ni vakaitavi tiko ena biau livaliva, kei na totoka ni sere mai na matasere ni “It Is Well with My Soul,” e kauta mai ki yaloqu na vakacegu.
Me vaka o ni sa kila, na vakaitavi ena koniferedi oqo e vakatabui ka yalani baleta na neitou gagadre meda lewenivanua vinaka ki na vuravura ka tarova na dewa ni mate na COVID-19. Sa dua na ka vakaitamera ni revurevu na mate oqo ki vuravura. Esa mai veisautaka na noda soqoni ni Lotu, veiqaravi ni kaulotu, kei na cakacaka e valetabu.
Ena vakatatabu ni gauna nikua kei na kena veisemati ki na mate dewa oqo, na veivakatovolei ni bula yadua e tete yani ka sivia na mate dewa oqo. Na veivakatovolei e rawa ni yaco mai ena vakacala-ka, leqa tubu koso, se dua na mate ni uto sega ni namaki.
Ena rawa vakacava meda sotava na mataqali veivakatovolei oqo? Sa tukuna vei keda na Turaga “kevaka dou sa vakarau vinaka tu, dou na sega sara ni rere.”1 Sa dina sara, e rawa ni da maroroi wai, kakana, kei na ilavo. Ia, e tautauvata talega ni bibi sara meda vakatawana na noda ilololo vakayalo yadua ena vakabauta, dina, kei na ivakadinadina.
Na noda sasaga uasivi ni bula sai koya na noda vakavakarau meda sotava na noda Dauveibuli. Eda vakayacora na veika oqo ena noda saga ena siga yadua meda vakataka na noda iVakabula, o Jisu Karisito.2 Eda vakayacora oqori ena noda veivutuni e veisiga ka ciqoma na Nona veivakasavasavataki, veivakabulai, kei na veivakaukauwataki mana. Sa na rawa kina ni da sotava na vakacegu kei na reki dina, ena gauna saraga ni veilecayaki. Sai koya oqori sa vunauci keda kina na Turaga meda tudei tiko ena vanua tabu ka “kakua ni yavalati rawa.”3
Na yabaki oqo, eda vakananuma nai ka 200 ni yabaki ni dua na gauna bibi ena itukutuku vakairogorogo ni veigauna kei vuravura—sai koya na, rairai mai ni Kalou na Tamada kei na Luvena Dua Bau ga, o Jisu Karisito, vei Josefa Simici. Ena raivotu duadua oqo, e dusi Jisu Karisito na Kalou na Tamada ka kaya: “Oqo na Noqu Gone ni Toko. Mo Rogoci Koya!”4
Na ivakaro oqori ka soli vei Josefa e sa baleti keda kece. Meda vakasaqara, ena sala kece sara eda rawata, meda rogoci Jisu Karisito, e vosa vei keda ena kaukauwa mana kei na veiqaravi ni Yalo Tabu.
Na inaki ni koniferedi raraba oqo kei na vei koniferedi raraba kece sara me vukei keda meda rogoci Koya. Keimami sa masu, ka sureti iko mo masu, me tiko vakayauyau vata kei keda na Yalo ni Turaga me rawa ni o rogoca na itukutuku ni iVakabula e nomu vakatabakidua—na itukutuku ena kauta mai na vakacegu ki yalomu. Na itukutuku ena vakabula na yalo sa kavoro. Na itukutuku ena vakaramasetaka na nomu vakasama. Na itukutuku ena vukei iko mo kila na cava mo cakava ka na toso tiko ga kina ena veigauna drakidrakita veivakatovolei oqo.
Sa neitou masu ni na guilecavi dredre ka tawa guilecavi na koniferedi oqo baleta na vei itukutuku o na rogoca, na veika ena kacivaki, kei na veika o na sureti mo vakaitavi kina.
Me ivakaraitaki, ni mai cava na soqoni ni mataka ni Sigatabu, eda na vakayacora e dua na soqoni tabu vakavuravura ena noqu na liutaka na kaila ni Osana. Sa neitou masu ni na dua na gauna vakayalo vei iko ena noda duavata e vuravura ena noda vakavinavinaka vua na Kalou na Tamada kei na Luvena Dua Bau ga ena veivakacaucautaki vei Rau ena sala matalia oqo.
Na veika tabu oqo, eda na vakayagataka na itavoi vulavula savasava. Ia, kevaka e sega na nomu, sa rawa ga ni ko yalova na ligamu. Ni oti na Kaila ni Osana, ena duavata na ivavakoso kei na matasere ena lagati ni “Na Yalo ni Noda Kalou.”5
Kemuni na taciqu kei na ganequ, ena vakasakiti na talei ni koniferedi oqo. Na yabaki oqo ena duidui sara ni da na vakanamata ena yalodina vua na iVakabula kei na Nona kosipeli vakalesui mai. Na revurevu balavu duadua ni koniferedi vakairogorogo oqo sai koya ni na veisau na yaloda ka da saga vakagumatua meda rogoci Koya ena noda bula taucoko.
Ni sa kidavaki mai ki na Koniferedi raraba ni Epereli 2020! Au kila tiko ni nanumi keda tiko na Kalou na Tamada Vakalomalagi kei na Luvena, o Jisu Karisito. E Rau na tiko vata kei keda ena veisoqoni ni rua na siga lagilagi oqo ena noda vakasaqarai Rau ka torovoleka yani vei Rau ka rokovi Rau. Ena yaca tabu i Jisu Karisito, emeni.