![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fa5%2Fc4%2Fa5c4fd678d5370cb746f9c70f1b6cfaf69aab7ff%2Fa5c4fd678d5370cb746f9c70f1b6cfaf69aab7ff.jpeg/full/!250,/0/default)
Na Matabete i Melikiseteki kei na iDola
Ena loma ni Lotu, na lewa ni matabete e vakayagataki ena ruku ni veidusimaki ni dua na iliuliu ni matabete koya e taura tiko nai idola ni matabete.
Au sa digitaka meu vakuria na vosa me baleta na matabete ni Kalou, na ulutaga eratou sa vosa oti kina e lewe tolu ka ratou a vakavulici keda me baleta na sala e vakalougatataki ira kina na goneyalewa, cauravou, kei na marama na matabete.
Na matabete e sa dua na kaukauwa kei na lewa vakalou e tauri tu ena nuidei me vakayagataki ena cakacaka ni Kalou me yaga vei ira kece na Luvena. Na matabete e sega ni o ira era sa tabaki ki na dua na itutu ni matabete se o ira era vakayagataka na kena lewa. O ira na turaga era taura tu na matabete era sega ni matabete. Ni sega ni dodonu meda vakatokai ira na turaga tabaki mera matabete, e sa veiganiti meda vakatokai ira mera lewe ni matabete.
Na kaukauwa ni matabete e tu ruarua ena Lotu kei na matavuvale. Ia na kena vakayagataki na kaukauwa ni matabete kei na lewa ni matabete ena Lotu e duidui ki na kena ena matavuvale. Na ka kece oqo sa vakatau ki na ivakavuvuli eso sa virikotora tu na Turaga. E sa inaki ni ituvatuva ni Kalou oya me tuberi ira na Luvena ki na bula tawamudu. Na matavuvale vakayago e sa bibi ki na ituvatuva oya. E sa tu na Lotu me vakarautaka na ivakavuvuli, na lewa, kei na cakacaka vakalotu eso e yaga me vakatubura na veimaliwai vakamatavuvale ki na veigauna tawamudu. Okoya gona, e sa dua kina na veimaliwai dei ni duavata ni matavuvale kei na Lotu i Jisu Karisito. Na veivakalougatataki ni matabete—me vaka na taucoko ni kosipeli kei na cakacaka vakalotu eso me vaka na papitaiso, veivakadeitaki kei na ciqomi ni isolisoli ni Yalo Tabu, na edaumeni ni valetabu, kei na vakamau tawamudu—e sa vakarautaki tu vei ria na turaga kei na marama. 1
Na matabete eda veivosakitaka tiko oqo sa ikoya na Matabete i Melikiseteki, a vakalesui mai ena itekivu ni Vakalesui mai ni kosipeli. Erau a tabaki o Josefa Simici kei Oliva Kauderi mai vei Pita, Jemesa, kei Joni, ka ratou a tukuna “ni sa tu vei iratou na idola ni matanitu vakalomalagi, ka vakakina na itabagauna ni taucoko ni gauna” (Vunau kei na Veiyalayalati 128:20). Eratou a ciqoma na iApositolo qase oqori na lewa oya mai vua na iVakabula vakaiKoya. Na vakaitutu se na vakailesilesi kece sara ena matabete era sema ga ki na Matabete i Melikiseteki (raica na Vunau kei na Veiyalayalati 107:5), baleta “e koto kina na dodonu ni mataveiliutaki, ka tiko kina na kaukauwa kei na dodonu ni veiliutaki ena veitutu kece sara ena lotu ena veitabagauna kecega e vuravura” (Vunau kei na Veiyalayalati 107:8).
Ena loma ni Lotu, na lewa ni matabete e cake, na Matabete i Melikiseteki, kei na kena e ra se Matabete i Eroni e vakayagataki ena ruku ni veidusimaki ni dua na iliuliu ni matabete, me vaka na bisopi se peresitedi, okoya e taura tu na idola ni matabete oya. Me kilai vinaka na vakayagataki ni lewa ni matabete ena Lotu e dodonu meda kila na ivakavuvuli ni idola ni matabete.
Na idola ni Matabete i Melikiseteki ni matanitu a soli mai vei Pita, Jemesa, kei Joni, ia a sega ni vakataucokotaki kina na vakalesui mai ni idola ni matabete. E so na idola ni matabete a qai muri mai. Veimuri kei na kena vakatabui na imatai ni valetabu ni itabagauna oqo e Katiladi, Oaio, ratou na tolu na parofita—Mosese, Iliesa, kei Ilaija—vakalesuya mai “na idola ni tabagauna oqo,” oka kina na idola me baleta na nodra vakasoqoni vata mai na Isireli kei na cakacaka ni veivaletabu ni Turaga (raica na Vunau kei na Veiyalayalati 110), me vaka sa vakamacalataka vakavinaka ko Peresitedi Eyring.
Na ivakaraitaki kilai vinaka duadua ni itavi ni idola sa ikoya ena kena dau vakayacori na cakacaka vakalotu eso ni matabete. Na cakacaka vakalotu e sa dua na veiqaravi vakalou e vakaraitaka tiko na caka ni veiyalayalati kei na yalataki ni veivakalougatataki. Ena loma ni Lotu, e dau vakayacori na cakacaka vakalotu kece ena ruku ni lewa ni iliuliu ni matabete o koya e taura tu na idola me baleta na cakacaka vakalotu oya.
Na cakacaka vakalotu e dau vakavuqa e qaravi mai vei ira era sa lesi ki na dua na itutu ena matabete ni ra cakacaka tiko ena veidusimaki nei dua e tu vua na idola ni matabete. Me ivakaraitaki, o ira na lewe ni vei itutu eso ni Matabete i Eroni era veiqaravi ena cakacaka vakalotu ni sakaramede ena ruku ni idola kei na veidusimaki nei bisopi, o koya e tu vua na idola ni Matabete i Eroni. Na ivakavuvuli vataga oqori e kovuta na cakacaka vakalotu ni matabete ka ra veiqaravi kina na marama ena valetabu. Dina ga ni ra sega ni taura tu na marama e dua na itutu ena matabete, era sa dau vakayacora na cakacaka vakalotu bibi ni valetabu ena ruku ni lewa ni peresitedi ni valetabu, o koya e tu vua na idola me baleta na cakacaka vakalotu eso ni valetabu.
E dua tale na ivakaraitaki ni lewa ni matabete ena ruku ni veidusimaki ni dua e tu vua na idola sa ikoya na ivakavuvuli ni turaga kei na marama era kacivi me vakavulica na kosipeli, se ena vei kalasi ena nodra dui tabanalevu se ena buturara ni kaulotu. Na ivakaraitaki tale eso oya o ira era taura tu na itutu ni veiliutaki ena tabanalevu ka vakayagataka na lewa ni matabete ena nodra veiliutaki ena vuku ni nodra veikacivi kei na ruku ni veivakatikori kei na veidusimaki ni iliuliu ni matabete o koya e tu vua na idola ena tabanalevu se na iteki. Oqo na ivakarau e vakayagataki ka taleitaki kina na lewa kei na kaukauwa ni matabete ena Lotu i Jisu Karisito ni Yalododonu Edaidai.2
Na lewa ni matabete e dau vakayagataki talega ka dau rawati na kena veivakalougatataki ena veimatavuvale ni Yalododonu Edaidai. Na veimatavuvale e kena ibalebale e dua na turaga lewe ni matabete kei na dua na marama erau veiwatini kei ira na luvedrau. Au okata talega na veiveisau mai na veimatavuvale matau vaqori ka vu mai na mate se veisere.
Na ivakavuvuli ni na rawa ga ni vakayagataki na lewa ni matabete ena veidusimaki nei koya e tu vua na idola me baleta na itavi oya e bibi sara ena Lotu, ia e oqo sega ni dau vakakina ena matavuvale. Me ivakaraitaki, e dua na tama e vakatulewa ka vakayagataka na matabete ena nona matavuvale ena lewa ni matabete e taura tu o koya. E sega ni gadreva o koya na nona veidusimaki se veivakadonui e dua ka taura tiko na idola ni matabete me rawa kina ni vakayacora nona itavi eso ni matavuvale. Oqo e oka kina na veivakasalataki ena nona vuvale, vakayacora na bose vakamatavuvale, solia na veivakalougatataki vei watina kei ira na luvena, se solia na veivakalougatataki ni veivakabulai kina nona lewe ni matavuvale se vei ira na tani.3 O ira na iliuliu ni Lotu era vakatavulici ira na lewe ni matavuvale ia era sega ni dusimaka na vakayagataki ni lewa ni matabete ena loma ni matavuvale.
Na ivakavuvuli vataga oqori e yaco ni yali o tama ka sa iliuliu ni matavuvale o tina. O koya e sa vakatulewa ena nona matavuvale ka vakaitavi ena kena kau mai na kaukauwa kei na veivakalougatataki ni matabete ki na loma ni nona matavuvale ena vuku ni nona edaumeni kei na veivauci ena valetabu. Dina ni sega ni soli vua na lewa me solia na veivakalougatataki vakamatabete ka rawa ga ni solia vua e dua ka taura tiko e dua na itutu vakatabakidua ena matabete, sa rawa ni vakayacora o koya na itavi kece tale eso ni veiliutaki ni matavuvale. Ena kena vakayacori oqori sa vakayagataka o koya na kaukauwa ni matabete me yaga vei ira na gone ka vakatulewa vei ira o koya ena nona itutu ni veiliutaki ena matavuvale.4
Kevaka era na vakalevulevuya na nodra matabete na tama ena nodra dui matavuvale, ena rawa ni tosoya sara yani na ilesilesi ni Lotu mai na veika kece era na rawa ni cakava. O ira na tama era taura tu na Matabete i Melikiseteki e dodonu mera vakayagataka na nodra lewa “ena veivakauqeti, na vosota vakadede, na yalomalua, na yalomalumalumu, kei na loloma e sega ni veivakaisini” (Vunau kei na Veiyalayalati 121:41). Na ivakatagedegede cecere oqori ni kena vakayagataki na lewa ni matabete e sa bibi sara ena matavuvale. O ira era taura tu na matabete e dodonu mera muria na ivunau me rawa ni tiko vei ira na kaukauwa ni matabete mera solia kina na veivakalougatataki ki na nodra lewe ni matavuvale. E dodonu mera bucina na veimaliwai ni veilomani vakavuvale me rawa ni ra vinakata kina na lewe ni matavuvale mera kerea na veivakalougatataki mai vei ira. Ka dodonu mera dau vakauqeta nai itubutubu me vakalevu taki na veivakalougatataki ni matabete ena loma ni matavuvale. 5
Ena soqoni ni koniferedi oqo, ni da vakasaqara meda rurugi mai na noda veileqa vakayago mai na mate dewa vakarerevaki, eda sa vakavulici ena vei ivakavuvuli cecere ni tawamudu. Au sa vakauqeti keda yadua me tu vei keda na mata e sa “vakatabakidua” me ciqoma na veidina ni bula tawamudu oqo me “rarama kina” na yagoda (3 Nifai 13:22).
Ena Nona ivunau vei ira na lewevuqa ka volai tu ena iVola Tabu kei na iVola i Momani, a vakatavulica na iVakabula ni yagoda mate rawa sa rawa me sinai ena rarama se sinai ena butobuto. O keda, vakaidina, eda vinakata meda vakasinaiti ena rarama, ka a vakatavulica vei keda na noda iVakabula na sala meda rawa ni vakayacora vakakina. E dodonu me da vakarorogo ki na itukutuku eso ni veidina ni bula tawamudu. A vakayagataka o Koya na ivakaraitaki ni matada, okoya eda ciqoma kina na rarama ki na yagoda. Kevaka “sa vakatabakidua” na matada—ena vosa tale eso kevaka eda sa vakanamata tiko ena ciqomi ni rarama kei na kila ka—a vakamacalataka o Koya, “ena rarama kina na yagomu taucoko” (Maciu 6:22; 3 Nifai 13:22). Ia kevaka “sa rai na matamu ki na ca”—oya kevaka eda vaqara na ca ka taura ki na yagoda—a vakasalataka o Koya, “ena sinai na yagomu ena butobuto” (tikina e 23). Ena vosa tale eso, na rarama se na butobuto ena yagoda e vakatau ena sala eda raica—se ciqoma— kina na veidina tawamudu eda sa vakavulici kina.
E dodonu meda vakamuria na veisureti ni iVakabula meda vakasaqara ka kerea meda kila kina na veidina ni bula tawamudu. E yalataka o Koya ni sa lomasoli na Tamada mai Lomalagi me vakavulici ira kecega era vakasaqara na dina (raica na 3 Nifai 14:8). Kevaka eda gadreva oqo ka rai vakatabakidua na matada meda ciqoma, sa yalataka na iVakabula ni “na dolavi vei” keda na veidina ni bula tawamudu (3 Nifai 14:7–8)
Ena kena veibasai, sa maqusa o Setani me vakaseseya noda vakanananu se me muataki keda vakatani ena veika bibi me vaka na kena cakacakataki na matabete ni Kalou. A veivakasalataki na iVakabula me baleta ira na “parofita vakailasu, era sa lako mai vei kemuni ka vakaisulu vaka na sipi, a ra sa wolifa daukata e lomadra” (3 Nifai 14:15). A solia vei keda o Koya na veivakatovolei oqo me vukei keda me digitaka na dina mai na maliwa ni ivakavuvuli duidui eso ka na rawa ni vakasesei keda: “Mo ni na kilai ira ena vuadra,” a vakatavulica o Koya(3 Nifai 14:16). “E sega na kau vinaka me vuataka rawa na vua ca, se na kau ca me vuataka rawa na vua vinaka” (tikina e 18 Okoya gona, e dodonu meda rai ki na kena macala—“na vuadra”—na ivakavuvuli eso era sa vakatavulici kei ira na parofita era vakavulica. Oqori na isaunitaro vinaka duadua ki na vuqa na veiba eda rogoca ni saqata na Lotu kei na kena ivakavuvuli kei na lawatu kei na veiliutaki. Vakamuria na veivakatovolei a vakatavulica na iVakabula. Rai ki na vuadra—na kena macala.
Ni da vakasamataka na vua ni kosipeli kei na Lotu i Jisu Karisito vakalesui mai, eda reki ena sala esa tete kina na Lotu, ena nodra bula kece na lewenilotu nikua, mai na ivavakoso itaukei eso ena Intermountain West ki na veivanua era sa vakaitikotiko kina e vuqa vei ira na 16 na milioni na lewena ena veimatanitu ena taudaku kei Amerika. Ena tubu oqori, keitou sa mai vakila na tubu ena kena rawa ni veivuke na Lotu vei ira na lewenilotu. Eda veivukei ena muri ni vunau, ena kena yalodina taki na itavi ni vakavulici ni kosipeli vakalesui mai, ena vakasokumuni i Isireli, kei na kena tara na vei valetabu ena veiyasai vuravura.
Eda sa liutaki mai vua e dua na parofita, o Peresitedi Russell M. Nelson, okoya sa vakayagataka na nona veiliutaki na Turaga me rawata na toso ki liu eda sa vakila ena loma ni rua na yabaki ni nona veiliutaki. Oqo eda sa kalougata meda vakarorogo vei Peresitedi Nelson, ka na vakavulici keda ena sala meda na toso tiko ga ki liu ena Lotu i Jisu Karisito sa vakalesui mai ena veigauna dredre oqo.
Au vakadinadinataka na dina ni veika oqo ka’u duavata kei kemuni ena masu me baleta noda parofita okoya eda sa na vakarorogo kina oqo, ena yaca i Jisu Kaisito, emeni.