Bradley R. Wilcox

iKarua ni Daunivakasala ena Mataveiliutaki Raraba ni Cauravou

Ni a vakaitavi tiko ena dua na koniferedi ni itabagone e California, o Baraca Bradley (Brad) R. Wilcox a sotava e dua na cauravou ka a sega ni vinakata me tiko ena koniferedi oya. A mani tomani koya sara na cauravou oya ena ruku ni dua na vunikau ruguruguwa, ka sega ni dede erau sa veivosakitaka tiko na ulutaga taleitaki ni itabagone oya—na vaqiqi ena siketi.

A kerei koya sara o Baraca Wilcox me vakaraitaka vua eso na ivukivuki ni vaqiqi ena siketi. Ni vakauqeti kina, a sureti koya na itabagone oya me cakava e dua na ivakaraitaki vaqiqi ena siketi ena Especially for Youth (Vakatabakidua vei ira nai Tabagone) ena vula ikatakata o ya. A vorata mada na cauravou ia a mani qai vakadonuya. Ena EFY (VVT), a sotava o koya e dua na gauna ni veisautaki-bula ka kunea kina na nona ivakadinadina ni kosipeli.

“A yaco mai o koya ki na EFY ena dua na siketi vaqiqi, ia a qai biubiu vaka dua na daukaulotu,” e kaya o Baraca Wilcox.

“Au sa vakayagataka na noqu bula vata kei ira na gone kei na yabaki tinivakacaca,” a kaya o Baraca Wilcox, “ka’u lomani ira na itabagone.”

A sucu o Bradley Ray Wilcox e Provo, Utah, Amerika, e nai ka 25 ni Tiseba, 1959, vei Ray T. Wilcox kei Val C. Wilcox. A susu cake o koya e Provo vakavo ga na vica na yabaki ni nona gauna ni gone e Iciopea.

Ni oti nona veiqaravi vakadaukaulotu tudei ena Tabana ni Kaulotu e Chile Viña del Mar, a vakamautaki Deborah Gunnell o Baraca Wilcox ena valetabu e Provo Utah e nai ka 7 ni Okotova, 1982. Erau sa nodratou itubutubu e lewe va na gone.

O Baraca Wilcox a ciqoma na nona koroi ni bachelor kei na koroi ni master mai na Brigham Young University kei na nona doketa ni vuli mai na Univesiti ni Wyoming. A sa vakacerecerei o Baraca Wilcox ena vica na icocovi me baleta na nona cakacaka ena vuli, ka sa vagoleya e sivia e 30 na yabaki ki na parokaramu ni Especially for Youth ni BYU, ka marautaka vakalevu na nona dauveivakavulici ena Campus Education Week.

O Baraca Wilcox kei na nona matavuvale eratou a sa vakaitikotiko oti mai Niu Siladi kei Sipeni ni a vakasalataka voli na parokaramu ni vuli tu tani ni BYU. E sa vola o koya e vica na ivola ka ena gauna oqo e dua tiko o koya na parofesa ena Tabacakacaka ni iVolanikalou Makawa e BYU.

A sa veiqaravi oti o Baraca Wilcox vaka peresitedi ni Tabana ni Kaulotu na Chile Santiago East ka vaka lewe ni matabose raraba ni Matawilivola ni Sigatabu, daunivakasala ena dua na mataveiliutaki ni iteki, ka bisopi ni dua na tabanalevu ni itabagone qase cake. Ena gauna a kacivi kina, e a veiqaravi voli vaka dua na lewe ni matabose e cake, ka vaka peresitedi ni iteki ni Cauravou.