Dolava na Lomalagi me Veivuke Mai
Me da matanataka na noda vakabauti Jisu Karisito!
Sa dua na soqoni duatani ka vakasakiti na soqoni oqo! Vinaka vakalevu, Laudy kei Enzo. Drau sa rui matataki ira vakavinaka sara na goneyalewa kei na cauravou vakasakiti ni Lotu.
Kemuni na taciqu kei na ganequ, sa levu na ka eda rogoca nikua baleta na Vakalesui mai ni Lotu—na Lotu sara ga a mai tauyavutaka na noda iVakabula, o Jisu Karisito, ena gauna ni Nona veiqaravi e vuravura. Na Veivakalesui mai oqori a tekivutaki ena 200 na yabaki sa oti ena vulaitubutubu oqo, ena nodrau rairai na Kalou na Tamada kei na Luvena, ko Jisu Karisito vua na cauravou ko Josefa Simici.
Ni oti e tini na yabaki mai na raivotu vakairogorogo oqo, eratou a kacivi o Josefa Simici kei na lima tale me ratou isevu ni lewe ni Lotu vakalesui mai ni Turaga.
Mai na ilawalawa lailai ka soqoni vata ena ika 6 ni Epereli, 1830, sa yaco oqo me dua na isoqosoqo ni vuravura taucoko ka sivia na 16 na milioni na lewena. Sa kilai vakararaba na vinaka e dau vakayacora na Lotu oqo e vuravura taucoko me vukea na leqaleqa vakatamata ka laveta na kawatamata. Ia na kena inaki taumada me vukei ira na tagane, yalewa kei na matavuvale me ra muria na Turaga ko Jisu Karisito, muria na Nona ivakaro, ka vakadonui ki na veivakalougatataki cecere duadua mai vei ira na veivakalougatataki kecega—sai koya na bula tawamudu vata kei na Kalou kei ira na nodra daulomani.
Ni da vakananuma na kena tavoci na Veivakalesui mai ena 1820, sa ka bibi me da nanuma ni da vakarokorokotaki Josefa Simici me vaka ni dua na parofita ni Kalou, ia oqo e sega ni lotu nei Josefa Simici, e sega talega ni lotu i Momani. Oqo na Lotu i Jisu Karisito. A vakarota sara ga mai vakadodonu na yaca me vakatokai kina Nona Lotu: “Ni sai koya oqo na yaca ena kacivi kina na noqu lotu ena veisga e muri, io Na Lotu i Jisu Karisito ni Yalododonu Edaidai.”
Au sa vosa oti e liu ena kena vakadodonutaki na ivakarau eda cavuta kina na yaca ni Lotu. Tekivu mai na gauna ko ya, sa vakayacori e levu na cakacaka me taucoko kina na veivakadodonutaki oqo. Au sa vakavinavinaka vakalevu vei Peresitedi M. Russell Ballard kei ira kece ena Kuoramu ni iApositolo Le Tinikarua, sa levu sara na ka era cakava me ra liutaka na sasaga oqo vakakina na veika e semati ena dua tale na sasaga au na kacivaka ena bogi nikua.
Era sa vakayagataka tu oqo na yaca dodonu ni Lotu na iliuliu ni Lotu kei na veitabacakacaka, bisinisi veiwekani, kei na milioni vakamilioni na lewenilotu—kei na so tale. Sa veisau na style guide vakadonui ni Lotu. Na mataveilawa taumada ni Lotu ena gauna oqo sa na ChurchofJesusChrist.org. Sa vakadodonutaki na itikotiko ni imeli, yaca ni mataveilawa, kei na sala ni itukutuku raraba. Na noda matasere lomani sa na “Matasere ni Valecavu ena Lomanibai ni Valetabu.”
Eda sa yacova yani na iwalewale ni sasaga bibi vakaoqo baleta ni gauna eda kauta tani kina na yaca ni Turaga mai na yaca ni Nona Lotu, eda sa kauti Koya tani kina vakacalaka mai na itakele e vakanamata kina noda sokalou kei na noda bula. Ni da taura na yaca ni iVakabula ena noda papitaiso, eda sa yalataka me da vakadinadinataka ena noda vakasama kei na ivalavala, ni o Jisu na Karisito.
“Au a yalataka vei kemuni kevaka eda “solia noda igu me da vakalesuya na yaca donu ni Nona Lotu na Turaga,” o Koya ena “sovaraka mai Nona mana kei na veivakalougatataki e uluda na Yalododonu Edaidai, me vaka eda se bera vakadua ni bau raica.” Au vakavouya na yalayala oya nikua.
Me vukea noda nanumi Koya ka vakatakilakilataki Na Lotu i Jisu Karisito ni Yalododonu Edaidai ni Lotu ni Turagaeda marau me vakaveikilaitaki e dua na ivakatakarakara ena vakaraitaka na Nona idabedabe ko Jisu Karisito e lomadonu ni Nona Lotu.
Na ivakatakarakara oqo e oka kina na yaca ni Lotu ena loma ni dua na vatunitutu. Sai Jisu Karisito na vatuivakadei.
Ena lomadonu ni ivakatakarakara sa toka kina nai vakatakarakara kei Karisito ceuti ena mapolo maivei Thorvaldsen na Christus. Sa kena ivakatayaloyalo na Turaga sa tucake tale ka bula tiko ni dodoliga tiko yani me ciqomi ira kece era na lako mai ki Vua.
Na ivakatakarakara, e tucake tu ko Jisu ena ruku ni dua na vucu. Na vucu e vakananuma vei keda na iVakabula sa vakaturi cake ni sa biuta mai na ibulubulu ena ikatolu ni siga ni oti Nona Vakamatei ena Kauveilatai.
Na ivakatakarakara oqo e dodonu me vakaibalebale vei ira e lewelevu, me vaka ni sa balavu na noda dau semata vata na kosipeli vakalesui mai kei na Karisito vakaturi cake ka bula tiko.
Sa na vakayagataki na ivakatakarakara oqo me ivakatakilakila vakaraitaki ni ivola vakadonui, na itukutuku raraba, kei na soqo ni Lotu. Ena vakananuma ki na tamata kecega ni oqo na nona Lotu na iVakabula kei na veika kece eda cakava, ni da lewe ni Nona Lotu, e kena itakele o Jisu Karisito kei na Nona kosipeli.
Oqo, kemuni na taciqu kei na ganequ, ena mataka na Sigatabu ni Curu Vakatui, ka sa veivakavulici kina o Elder Gong. Ni da curuma yani na macawa bibi oqo ni vakarau me da yacova yani na Siganimate. Ni da imuri nei Jisu Karisito, ka bula donumaka na gauna sa yavalati vuravura tiko kina vakalevu na matetaka levu na COVID-19, me da kakua ni tukuni Karisito se vunautaki Karisito se vakayagataka wale tikoga e dua na ivakatakarakara i Karisito.
Me da matanataka na noda vakabauti Jisu Karisito!
Me vaka ko ni kila, o keda na lewe ni Lotu eda dau vakarokorokotaka na lawa ni lolo ena dua na siga e veivula.
Na ivunau ni lolo na ka makawa. Era sa dau bulataka na tamata qaqa vakaivolatabu ena veigauna taumada. Ko Mosese, Tevita, Esera, Niemaia, Esiteri, Aisea, Taniela, Joeli, kei na vuqa tale era dau lolo ka vunautaka na lolo. Ena ivola i Aisea, sa kaya na Turaga: “Sa sega li ni vakaoqo na lolo kau sa vinakata? Mo dou sereka na ivesu sa sega ni dodonu, ka luvata na ikaukau bibi, ka sereki ira na bobula me ra lalaga?”
A vakauqeti ira na Yalododonu mai Korinica o Paula me ra “lalaga ki na lolo kei na masu.” E kaya na iVakabula ni so na ka “sa sega ni vakasevi tani wale ena dau masu ga kei na lolo.”
Au a kaya toka ena dua na vidio ena tabana ni tukutuku raraba “me vaka niu vuniwai ka dauveisele, au sa dokai ira vakalevu sara na kendau ena tabana ni bula, na dauvakadidike, kei ira tale eso era cakacaka tiko ena bogi kei na siga me ra tarova na dewa ni COVID-19.”
Niu Peresitedi ni Lotu i Jisu Karisito ni Yalododonu Edaidai ka dua na iApositolo i Jisu Karisito, au kilani Kalou “sa tu vua na kaukauwa kece, kei na yalomatua, kei na kila ka, ka sa kila na ka kecega, ka sa yalo loloma sara ko Koya, sa vakabulai ira kecega, sa veivutuni ka vakabauta na yacana.”
O koya, ena veigauna ni leqa bibi, me vaka ni sa yaco mai na matetaka lelevu, na ka vakatamata duadua eda rawa ni cakava me da kaciva na Tamada Vakalomalagi kei na Luvena—na Dauveivakabulai Levu—me rau vakaraitaka na Nodrau kaukauwa vakasakiti me ra vakalougatataki na kai vuravura.
Ena noqu itukutuku ena vidio, au a sureta kina na tamata kecega me da duavata ena lolo ena Sigatabu, 29 ni Maji, 2020. E vuqa vei kemuni sa raica beka na vidio ka a duavata ena lolo. Eso beka e sega. Oqo eda se gadreva tiko ga na veivuke mai lomalagi.
Ena bogi nikua, taciqu kei na ganequ, ena yalo vakai iratou na luvei Mosaia, ka ratou soli iratou ki na lolo kei na masumasu,ka me tiki ni noda koniferedi raraba ni Epereli 2020, au sa kaciva kina e dua tale na lolo ni vuravura raraba. Vei kemuni kece e rawa vei kemuni, me da lolo, masu, ka vakaduavatataka tale na noda vakabauta. Me da kerea ena masumasu me da vueti mai na matetaka levu sa roboti vuravura tu oqo.
Au sureti kemuni kece,oka kina o ira eda sega ni vakabauta vata, meda lolo ka masumasu ena Vakaraubuka ni Siganimate, nai ka 10 ni Epereli, me lewai vakamatau na matetaka, ra maroroi na dauveiqaravi, vaqaqacotaki na bula vakailavo, ka lesu tale kina kena itutu makawa na bula.
Eda na lolo vakacava? Rua na kana se 24 na auwa me vaka sa matau tu vei keda. Mo vakatulewa se cava na nomu solibula, ni o nanuma na solibula cecere a vakayacora ena vukumu na iVakabula. Me da duavata ena noda kerea na veivakabulai ki vuravura raraba.
Na siganimate na siga uasivi sara me rau rogoci kedakina na Tamada Vakalomalagi kei na Luvena!
Kemuni na taciqu kei na ganequ, au vakaraitaka na noqu loloma titobu baleti kemuni, salavata na noqu ivakadinadina ena vakalou ni cakacaka eda vakaitavi kina. Oqo na Lotu i Jisu Karisito ni Yalododonu Edaidai. E tu e uluna o Koya ka dusimaka na veika kece eda cakava. Au kila ni na bokaca o Koya na nodra vakatakekere na Nona tamata. Au vakadinadinataka, ena yaca i Jisu Karisito, emeni.