Elder Thierry K. Mutombo

Vakaitutu Raraba ni Vitusagavulu

O Elder Thierry K. Mutombo a tu vua e dua na ivakadinadina kaukauwa ni kosipeli ena gauna a ciqoma kina na nona veikacivi ni kaulotu ni sa cauravou tiko. A papitaiso o koya kei na nona matavuvale ni sa yabaki 10, ka a vakadinadinataka na sala kaukauwa a veisautaka kina na nona matavuvale na kosipeli.

Ia ni vakavakarau o koya me laki kaulotu ena Tabana ni Kaulotu e Côte dIvoire Abidjan, a se sega ni tiko vua e dua na ivakadinadina kaukauwa sara ni iVola i Momani. A se bera vakadua ni wilika o koya.

A qai bolei koya na nona Bisopi dauveivakauqeti me wilika na iVola i Momani ena veisiga ni bera ni lako ena nona kaulotu. A solia sara mada ga o koya vei Thierry e dua na idola ni valenilotu me rawa ni vuli o koya ena vakacegu.

A wiliwili o Thierry e veisiga me tolu na vula. Ena gauna a laki kaulotu kina, sega walega ni sa rawata o koya e dua na ivakadinadina kaukauwa sara ni iVola i Momani, ia a taracake talega na ivakarau ni vuli ka a vukei koya sara vaka dua na daukaulotu.

“Na iyaya ni cakacaka cecere duadua e tu vei keda me kauti ira mai na tamata ki na rarama ni kosipeli ka vakasoqoni Isireli sa veiseyaki sa ikoya na iVola i Momani,” a kaya koya.

A sucu o Thierry Kasuangi Mutombo e Kinshasa, Democratic Republic mai na Congo, e nai ka 31 ni Janueri, 1976, vei Antoine Kasuangi Mutombo kei Marie Therese Matsanga Mutombo. A vakamautaki Tshayi Nathalie Sinda o koya ena dua na soqoni vakamatanitu e nai ka 29 ni Noveba, 2002. Erau a qai vauci emuri ena Valetabu e Johannesburg Ceva kei Aferika e nai ka 19 ni Noveba, 2004. E ono na luvedrau.

O Elder Mutombo a taurivola ena 2010 mai na Univesiti ni Cepromad ena dua na koroi ni cicivaki bisinisi kei na dua na koroi ni bejila ni veiliutaki ni ivurevure vakatamata ena 2012. A cakacaka o koya me baleta na Lotu ena Democratic Republic mai na Congo vaka manidia ni Tabacakacaka ni Tuva Kawa kei na iVurevure Vakatamata ka vaka supavaisa ena Tabacakacaka ni Lewai ni iYaya.

Ena gauna a kacivi kina me Vakaitutu Raraba ena Vitusagavulu, a veiqaravi tiko o Elder Mutombo vaka-peresitedi ni Tabana ni Kaulotu e Maryland Baltimore. Taumada a veiqaravi o koya vaka dua na peresitedi ni iteki, daunivakasala ena dua na mataveiliutaki ni iteki, iliuliu ni kaulotu ena tabanalevu, qasenivuli ni Matawilivola ni Sigatabu, ka sekeriteri liu ni iteki.