Elder Kelly R. Johnson

Vakaitutu Raraba ni Vitusagavulu

O Elder Kelly R. Johnson e nanuma vinaka toka na siga a kacivi kina me bisopi ni yabaki 31. Ena siga vata oya a laurai kina vei koya na Bell’s palsy—e dua na ituvaki ka vakavuna me paralase ka malumalumu na viciko ena dua na yasa ni matana.

Sa dua na gauna dredre, sega walega ena vuku ni lomaleqa kei na madua e vu mai na ituvaki, ia ena vuku talega ni vuqa ni nona itavi vou. Ia a yaco na gauna dredre o ya me dua na veivakalougatataki.

“Ni sega ni kilai se na vakacava na balavu ni ituvaki, au a taracake kina e dua na yalololoma me baleti ira na tamata yadua ka sa tu ga vata kei au ena vo ni noqu bula,” a kaya o koya. “Au a vulica dina ni tamata era lako curuma na veika rarawa ka dredre era sega ni lewa rawa ka dau lai vakilai ena nodra rawa ka, nanuma, kei na nuidei.”

Ena so na gauna, e sega ni rawarawa na veiqaravi ena Lotu ni Turaga. Ia me vaka ga na tisaipeli ni iVakabula “sa biuta sara tu na nodrau lawa” (Maciu 4:20) ka muri Koya, “se cava ga eda sa kerei meda cakava, eda sa tu vakarau me da cakava,” kaya o Elder Johnson.

Se evei ga na vanua sa kacivi koya kina se na nona matavuvale na Turaga, eratou na lako ena yalo kei na loma rawarawa, ka vakasaqara tiko me kunea na ka vinaka se cava ga na nodratou ituvaki.

A sucu o Kelly Ray Johnson e Pleasant View, Utah, e nai ka 16 ni Janueri, 1963, vei Harold Raymond Johnson Jr. kei Helen Cragaun Johnson. A tubu cake o koya e Ogden, Utah, ka vakamautaki Teressa Lynn Bartrum ena Valetabu e Salt Lake City e nai ka 27 ni Maji, 1986. E lima na luvedrau.

O Elder Johnson a taurivola mai na Weber State Univesiti ena 1987 ena dua na koroi ni bejila ni ni daunivika ka ciqoma na nona koroi ni masita ni veiliutaki vakabisinisi mai na Brigham Young Univesiti ena 1989. A sa cakacaka o koya vaka dua na daunilavo veivaqaqai ena KPMG International Cooperative ka wale tikoga oqo a cakacaka vaka-daunilavo veivaqaqai ka itokani vei Norman, Townsend, kei Johnson.

O Elder Johnson, ka a veiqaravi voli vaka-Vitusagavulu ni iWasewase ena gauna a kacivi kina, sa veiqaravi oti vaka peresitedi ni Tabana ni Kaulotu e Bangkok Thailand, na vanua ka a veiqaravi vaka daukaulotu tudei kina, ka vaka dua na peresitedi ni iteki, daunivakasala ena dua na mataveiliutaki ni iteki, lewe ni matabose e cake, bisopi, peresitedi ni kuoramu ni italatala qase, iliuliu ni kaulotu ni tabanalevu, ka qasenivuli ni vakavakarau ki na kaulotu ena iteki.